Ацы бон махæн зынаргъ у. Канд нæлгоймæгтæн нæ, фæлæ Ирыстоны æппæт адæмæн дæр, уымæн æмæ зонæм сабырдзинады аргъ аргъ. Ацы бон у хъайтардзинад æмæ æхсардзинад, уарзондзинад æмæ æнувыддзинад, сæрыстыр ирон хæстоны кадджын номы нысаниуджытæй йемыдзаг бон.
1989 азӕй суанг 2008 азмӕ гуырдзиаг тыхæйисджыты ныхмæ тохты бабын бирӕ хъӕбатыр, фӕндвидар æмæ зондджын фӕсивӕд. Уыцы азты хӕстхъом фӕсивӕд царды амонды фæндæгтыл балцы бӕсты, райстой хӕцӕнгарз ӕмӕ хъахъхъӕдтой нӕ фыдӕлты зӕхх, цæмæй дзурæм не ‘взагыл, æххæст кæнæм фыдæлты кадджын традицитæ æмæ сæ нæ фидæны фæлтæртæм сæрыстырæй дæттæм.
Ацы бæрæгбон у Фыдыбæстæ хъахъхъæнджыты алы фæлтæрты бæрæгбон дæр. Фыдыбæстæ хъахъхъæнын у алы адæймаджы цытджын æмæ æвæджиаг хæс, йæ цард Фыдыбæстæйæн чи снывонд кодта, уыдонæй алчидæр йе стыр хуын бахаста æддагон æфсæддон агрессийы рæстæджы фыдызнаджы ныхмæ.
Стыр Фыдыбæстæйон хæсты Сырх Æфсад цы хъайтардзинад æмæ патриотизм æвдыстой, уый абоны фæлтæртæн у фæзминаг. Фыдыбæстæйон хæсты цытджын ветеранты фæрцы советон адæм æрмæст сæ Райгуырæн зæхх не ссæрибар кодтой, фæлæ æгас Европæ фервæзт морæгъуыз емынæйæ.
Историон барæнтæм гæсгæ бирæ азтæ нæ рацыд, Ирыстоны бахъуыд фашизмы ног хуызы ныхмæ тох кæнын. Нæ хуссайраг сыхæгтæ тынг архайдтой, цæмæй нæ бауырныдтаид, нæ зæххыл уазджытæ кæй стæм æмæ нын расидтысты цалдæр геноциды. Хуссар Ирыстоны адæмæй бирæ фæлтæртæ сæ царды хуыздæр азтæ снывонд кодтой Республикæйы æнæфæцудгæ рæзтæн. Хуссар Ирыстоны адæм кад æмæ намысджынæй лæууыдысты сæрибардзинад æмæ хæдбардзинадмæ уæззау фæндагыл. Гуырдзиаг-ирон ныхмæлæууынады рæстæджы нæ Гарзджын тыхты дæлхæйтты службæгæнджытæ æмæ бархионтæ æнæмсæр тох кæй кодтой знаджы ныхмæ. Кæй зæгъын æй хъæуы, Уæрæсейы æфсæддон дæлхæйтты æххуысы руаджы махæн бантыст нæ адæмы бахъахъхъæнын æмæ нæ къухы бафтыд æфсæддон æмæ ма политикон уæлахиз дæр. Уæрæсейаг æфсадимæ сразыдзинæдты бындурыл нæ зæххыл ныртæккæ ис сабырад æмæ æдасдзинад.
23 февраль у, сæхи чи снывонд кодтой æфсæддон службæйæн уыдоны профессионалон бæрæгбон. Фæлæ кæддæриддæр Райгуырæн бæстæ бахъахъхъæнын уыд æмæ ныр дæр у алкæйы хæрзæгъдаудзинады хæс. Æфсæддон службæйæн алыхатт дæр адæмы ‘хсæн уыд уæлдай кад, æмæ нæ райгуырæн бæстæйæн тæссаг сахаты та, стырæйчысылæй, йæ бон хæцæнгарз райсын кæ-мæн уыд, уыдон æй хъахъхъæдтой.
Рагон традицитæ хъахъхъæнгæйæ, ацы бон мах кад кæнæм, Фыдыбæстæйыл æнувыддзинады тыххæй ард чи бахордта, уыдонæй алкæмæндæр, нæ сæртæй ныллæг кувæм Стыр Фыдыбæстæйон хæсты ветеранты, хæстонтæ-интернационалистты раз. Уыдон æхсарджынæй сæххæст кодтой се службæйон æмæ æфсæддон хæс æндæр паддзахадты территоритыл, не ‘мфыдыбæстæйонты раз, хæцæнгарз сæ къухты афтæмæй бахъахъхъæдтой нæ Ирыстоны.
Сæрибардзинадмæ фæндæгтыл цæугæйæ, Фыдыбæстæ хъахъхъæнджытæ хызтысты карз фыдæвзарæнты сæрты. Зыдта сæ алчидæр – Фыдыбæстæйы сæрвæлтау тох кæнын, нæй хиуыл ауæрдæн, нæй лæмæгъ уæвын.
Ныртæккæ мах æвдисæн стæм ирон хъæбатыр хæстонтæ хъæбатыр тох кæй кæнынц сæрмагонд æфсæддон операцийы украинаг нацизмы ныхмæ. Сæ хъæбатырдзинад æмæ фæндвидардзинад айхъуыст дзыллæтыл.
Кæдфæндыдæр, мингай азты дæргъы æппæт тохты дæр Ирыстоны хæстонтæ, Райгуырæн бæстæ хъахъхъæнгæйæ, æвдыстой се ‘хсар æмæ хъомыс, хъæбатырдзинад æмæ удуæлдай тох уæлахизы сæраппонд, нæдæр знагыл, нæдæр сæхиуыл нæ ауæрстой.
Бирæтæ нал æрæздæхтысты хæсты быдырæй. Мах хæсджын стæм уыдоны хъуыды кæнын.
23 февралы Хуссар Ирыстон нысан кæны ноджы иу нысаниуæгджын бон – Республикæйы Хъахъхъæнынады министрады сырæзты бон. Ирыстоны хæстонты ног фæлтæртæ дарддæр кæнынц фыдæлты кадджын традицитæ, кадимæ хæссынц службæ æмæ æххæст кæнынц сæ хæс Райгуырæн бæстæйы раз.
Райгуырæн Ирыстоны абоны хъахъхъæнджытæ сты сæ фыдæлты стыр æфсæддон кады аккаг бындартæ.
КЪÆБУЛТЫ Маринæ
