Беларусийы республикæйы горæт Бобруйскы 17 январæй 20-æм январмæ нæ республикæйы Уæлвæткон уавæрты министрады кусджыты иу хай архайдтой Ирвæзынгæнæджы боны цытæн ерысты.
Ацы турнир Беларусийы ауадзынц æрвылаз. Хуссарирыстойнаг командæ фыццаг хатт райстой хайад турниры. Сæ тыхтæ ма уым æвзæрстой Уæрæсейы æмæ Абхазы республикæйы командæтæ. Цы фæстиуджытимæ æрыздæхтысты, уыимæ нæ информацийы æмæ мыхуыры комитеты пресс-центры базонгæ кодтой Уæлвæткон уавæрты министры хæдивæг Алан Захаров æмæ министрады цæттæдзинады хайады сæргълæууæг Инал Захаров.
Алан Захаров куыд радзырдта, афтæмæй беларусаг коллегæтæ тынг хорз фембæлдысты хуссарирыстойнаг делегацийыл. Фæхуыдтой сæ Стыр Фыдыбæстæйон хæсты паддзахадон музеймæ. Фæуазæг ма сты Беларусийы Уæлвæткон уавæрты министрады центрмæ. Центр сæ дисы баппæрста йæ ифтонгадæй, йæ размæдзыд технологитæй.
Министрады цæттæдзинады хайады сæрдар Инал Захаров куыд загъта, афтæмæй хуссарирыстойнаг командæ ерыстæм йæхи бацæттæ кодта иу мæйы æмгъуыдмæ. Цæттæгæнæн рæстæджы сæмбæлдысты зындзинæдтыл. Беларусийы республикæйы территоримæ хуссарирыстойнаг паспортимæ кæй нæй цæуæн, уый аххосæй лæппутæй тыхджындæр чи уыдис, уыдон, хъыгагæн, нæ бахаудтой командæйы скондмæ. Фæлæ чи бацыд командæйы скондмæ, уыдон цъус рæстæджы æмгъуыдмæ сæхи бацæттæ кодтой хорз, арæзтой æппæт дæр, цæмæй командæ æвзæр фæстиуджытимæ ма æрыздæха фæстæмæ.
«Хуссар Ирыстоны командæйы сконды уыд 7 адæймаджы. Иууыл хистæрыл цыд 40 азæй уæлæмæ. Йæ азтæм нæкæсгæйæ, уый ерыс кодта æвзæнгты æмрæнхъ, иууыл кæстæрыл та цыд 26 азы. Æрмæст нæ командæйы нæ, фæлæ иннæ командæты дæр уыд уыцы кары адæймæгтæ. Уыдон ерыс кодтой спорты 4 хуызы. Æртыккаг бынат райстам бæндæн ивазынæй, мини-футболæй бацахстам фæндзæм бынат æмæ асины цыппæрæм уæладзыгмæ хизынæй та райстам æхсæзæм бынат. Уый у хорз фæстиуæг, уымæн æмæ мах тох кодтам дунейы ныры чемпионтимæ. Уымæй дарддæр ма ерысты хайадисджыты фылдæр процент уыдысты ацы хуызты спорты мастертæ», – загъта Инал Захаров.
Алан Захаров куыд радзырдта, афтæмæй Хуссар Ирыстоны командæ равдыста хорз фæстиуджытæ.
«Нæ командæ турниры хайадисджытимæ бастдзинæдтæ сарæзта æмæ нæ фæхуыдтой мадзæлттæм Калининград, Наро-Фоминск æмæ Абхазмæ. Кæй зæгъын æй хъæуы, нæ министрад дарддæр дæр исдзæн хайад ахæм ерысты. Иннæ азмæ нæхи ноджы хуыздæр бацæттæ кæндзыстæм. Хъыгагæн, махæн нæ бон нæу ам бынаты ауадзын ахæм æмвæзадыл ерыстæ, уымæн æмæ техникон æгъдауæй цæттæ нæма стæм. Ацы хъуыддаджы бирæ нюанстæ ис æмæ уыдонмæ хъæуы лæмбынæгæй æркæсын».
ТАНДЕЛАТЫ Виленæ
