Ирыстон хъæздыг у зынгæ адæймæгтæй. Уыдон сæ чысыл Райгуырæн Ирыстонæн скад кодтой сæ хорз хъуыддæгтæй. Ахæмтæн сæ нæмттæ зындгонд сты æрмæст Ирыстоны нæ, фæлæ уымæн æддейæ дæр. Уыдонæй иу у РЦИ-Аланийы Фарны хъæуккаг Хъæллæгаты Зелимхан Арсæмæджы фырт.
Æрæджы Дзæуджыхъæуы Ветеранты советы сæрдар Лалыты Лев æмæ организацийы секретарь Зозырты Георги Республикæ Абхазы хорзæх – «За победу»-йы майдан радтой Хъæллæгаты Зелимханæн. Ирон лæгæн хорзæх саккаг кодтой Республикæ Абхазы президент Аслан Бжанияйы барамындæй.
Рахизфарсы районы цæрæджы «За победу»-йы майданæй схорзæхджын кæныны тыххæй абхазаг лидер йæ къух æрфыста 2018 азы сентябры мæйы, фæлæ æмбæлон хорзæх Зелимханæн бæрæг аххосæгтæм гæсгæ радтой æрмæстдæр æхсæз азы фæстæ. Хорзæх йæ хицауыл сæмбæлд Лалыты Левы фæрцы.
Ветерантæн æххуысы фæдыл Республикæ Абхазы æхсæнадон хæрзаудæн организаци «Абраскил»-имæ æмгуыст кæнгæйæ, организацийы сæрдары хæдивæг Кучкан Еник Владимиры фыртимæ иумæ сæ къухты бафтыд Хъæллæгаты Зелимханы сссарын. Лалыты Лев æмæ йæм Зозырты Георги бацыдысты æмæ йын раарфæ кодтой хорзæхы тыххæй. Бузныджы ныхæстæ йын загътой, æфсæддон хæсыл æнувыддзинад, æхсардзинады æмæ рæзгæ фæлтæрæн цæвиттойнаг кæй у, уый тыххæй.
Уæдæ цы хъайтардзинад равдыста Хъæллæгайы фырт? Фыццаджыдæр уый, æмæ равзаргæ тæссаг æмæ зын профессийæн æнувыдæй лæггад кæнын. Зелимхан у æфсæддон, дæлбулкъон.
Райгуырд æмæ схъомыл Фарны хъæуы. Нырма скъоладзау уæвгæйæ, йæ разы æрæвæрдта хæс – мундир сæрыстырдзинадимæ хæссын. Æмæ йæ къухты бафтыд. Скъола каст фæуыны фæстæ æнтыстджынæй бацæуæн фæлварæнтæ радта Сергей Кировы номыл Уæрæсейы Федерацийы Мидхъуыддæгты министрады Орджоникидзейы уæлдæр æфсæддон ахуыргæнæндонмæ. Ахуыры фæстæ Зелимхан Арсæмæджы фырт æрвыст æрцыд Мордовийы горæт Саранскы Советон Цæдисы Мидхъуыддæгты министрады 36-æм дивизимæ дарддæр службæ рацæуыны тыххæй. Инспекторон басгæрст ауадзыны фæстæ æвзонг адæймаг бацыд Ленинграды æфсæддон институтмæ. Каст æй куы фæцис, уæд нысан æрцыд мидхъуыддæгты æфсæдты Красноярскы дивизийы физикон цæттæдзинады хистæрæй.
Профессионалон архайды йе стыр æнтыстытæ йын фадат радтой карьерон рæзтæн. Радон инспекторон басгæрсты фæстæ Хъæллæгты Зелимхан æрвыст æрцыд Ленинграды уæлдæр æфсæддон-политикон ахуыргæнæндонмæ, цыран бакуыста цалдæр азы.
1978 аз разынд фæлдзæуæн аз. Уæд Афганистаны ссыгъд хæсты цæхæр. Уæрæсейаг æфсады сконды службæ кодта уым. 1989 азы нæ хъайтар фæллой кодта Мæскуыйы «АМЗОН»-ы цур. Уым цæттæ кодтой Афганистаны территорийыл тохты хайад исыны тыххæй спецназы дæлхайы. Не ‘мзæххон сын амыдта æмбуар хæст.
Ирон адæмæн уæззау æмæ зын рауад 1992 аз. Ирон-мæхъæлон хæсты рæстæджы Хъæллæгайы фырт аскъуыддзаг кодта Райгуырæн бæстæмæ æрбаздæхын æмæ ОМОН-ы штабы сæргъ слæууын. Æртæ азы хæстонты цæттæ кодта хæстон архайдтыты хайад райсыны тыххæй. Службæйæ куы ацыд, уæд бацыд адæмон хæдæфсады къордмæ. Уым дæр куыста милицийы сæрмагонд нысаниуæджы къордтимæ.
Зелимхан хайад райста цалдæр хæсты: Сумгаит (Азербайджан), Хæххон Къарабах (1980 азты кæрон – 1990 азты райдиан), Хуссар Ирыстон æмæ Абхазы хæстыты.
Хæстон сгуыхтдзинæдты тыххæй хорзæхджын æрцыд Георгийы дзуарæй, «Во славу Осетии»-йы майданæй, корнет Лакрбайы номыл майданæй, кæцыйы сфидар кодта Абхазы хъазахъхъæгты цæдис. Афтæ ма не ‘мзæххоны арсеналы ис бирæнымæц Кады грамотæтæ æмæ арфæйы фыстæджытæ.
Ныртæккæ пенсиисæг цæры йæ райгуырæн хъæу Фарны. Фæхонынц æй Фарны хъæуы, стæй Рахизфарсы районы æндæр ахуырадон уагдæттæм дæр. Уый рæзгæ фæлтæрæн радзуры йе службæйы, æфсæддон профессийы ахсджиагдзинады тыххæй.
Фидарæй зæгъæн ис, Зелимханы хуызæн адæймæгтæй фидауы нæ цард. Уый у «Славный сын России»-йы кадджын номхæссæг.
ДЖИОТЫ Екатеринæ
