Ацы бонты республикæйы райдыдтой, тагъд Сочийы цы Æппæтдунеон фæсивæдон фестиваль райдайдзæн, уымæ бацæттæ кæнынæн организацион мадзæлттæ.
Фестиваль арæзт цæуы Уæрæсейы Президент Владимир Путины Указмæ гæсгæ. Йæ нысан у фæсивæды дунеон æмгуыстады рæзт, кæрæдзийы фæлтæрддзинад базонын ахуырады, бизнесы, культурæйы, спорты, хæрзаудæн хъуыддæгты æмæ æхсæнады бирæ æндæр къабæзты.
Фестивалы дунейы алы рæттæй архайдзæн 20 мин адæймаджы. Цæудзæн 1 – 7 мартъимæ. Фæсивæды хъуыддæгты фæдыл комитеты сæрдар Джусойты Руслан куыд фехъусын кодта, афтæмæй Цæгат Ирыстонæй фестивалы архайынмæ куырдиæттæ æрбалæвæрдтой 845 цæрæджы 14 азæй 35 азмæ. Уыдонæй равзардзысты 150 адæймаджы. Фæсивæды минæвæрттæ та цыппæрдæсæй ацæудзысты волонтертæй организацион хъуыддæгты баххуыс кæнынмæ.
Уымæй дарддæр, фестивалы сæ арæхстдзинад æвдисдзысты нæ аивады дæснытæ, уыдзæн дзы национ дзаумæттæ, музейон экспонаттæ æмæ хæринæгты равдыстытæ, мастер-къластæ, ахуыргæндтæ кæсдзысты лекцитæ нæ историйæ.
Фестиваль кæд Сочийы уыдзæн, уæддæр йæ фæлгæтты бæрæгбоны мадзæлттæ цæудзысты алы регионты. Цæгат Ирыстонмæ дæр æрцæудзæн цыппор адæймаджы фæсарæнты алы бæстæтæй. Фæсивæды хъуыддæгты фæдыл комитет дзуапп дæтты делегаттæн стыр культурон программæ бацæттæ кæныныл, экскурсион балцытæ сын скæнын, базонгæ сæ кæнын ирон адæмы традицитимæ, культурæйы уагдæттæ æмæ сын стыр сæудæджерадон куыстуæттæ фенын кæнын, нæ зындгонд спортсментимæ сæ базонгæ кæнын.
«Ахæм кадджын мадзалмæ нæ хъæуы нæхи хорз бацæттæ кæнын. Мæн ныфс ис нæ курдиатджын фæсивæдæй, кæцытæ Ирыстоны кад бахъахъхъæндзысты. Бæрнон адæймæгтæн сæ разы хæс æвæрын, цæмæй æппæтдæр бæстон бакæной. Фылдæр æргом аздахын хъæуы фæсарæйнаг делегацимæ. Хъуамæ се ‘ппæт дæр банкъарой ирон адæмы уазæгуарзондзинад, базонгæ уой нæ хъæздыг истори æмæ культурæимæ, сфидар кæнæм нæ хæлардзинады тæгтæ», – загъта Хицауады Сæрдар Дзанайты Барис.
Нæ уацх.
