Ныр æртыккаг аз Украинæйы цы сæрмагонд æфсæддон операци цæуы, уырдæм Ирыстоны фæсивæд цæуынц æхсарджынæй Райгуырæн бæстæ нацисттæй бахъахъхъæнынмæ. Æмæ тохы быдыры æвдисынц диссаджы сгуыхтдзинæдтæ. Уæззау уаргъ æрхауд ирон хъæбатыр фæсивæдмæ. Хъахъхъæнынц Уæрæсейы адæмы æмæ сæхи Фыдыбæстæйы дæр.
Базонгæ уæ кæндзыстæм уыцы хъайтартæй (зынгхуыст) дыууæйы хæстон сгуыхтдзинæдтимæ. Гвардийы сержант, 58-æм армийы хæстон, Хъæбатырдзинады ордены кавалер (йæ амæлæты фæстæ) Хуриты Рустам Платоны фырт хъæбатырæй фæмард 2022 азы 2-æм марты сæрмагонд æфсæддон операцийы зонæйы йæ хæстон хæс æххæст кæнгæйæ.
Танк Т-72-йы наводчик-оператор, Хурийы фырт Уæрæсейы Федерацийы Гарзджын тыхты службæ кодта 18 азы дæргъы. Уыцы рæстæгмæ хайад райста Цæгат Кавказы контртеррористон операциты, 2008 азы августы Хуссар Ирыстон бахъахъхъæныны фæдыл хæстон архайдтыты, афтæ ма йæ хæстон хæс æххæст кодта Сирийаг Арабаг Республикæйы дæр.
Сæрмагонд æфсæддон операцийы райдайыны фыццаг бонтæй фæстæмæ Хуриты Рустамы танкон экипаж хайад иста карз тохты. Йæ хæстон машинæ уый размæ иу ахæм тохы бахъыгдард æмæ йæ хъуыд цалцæг кæнын, фæлæ Рустам фæсчъылдым нæ баззад, аскъуыддзаг кодта æндæр экипажы сконды размæбырст адарддæр кæнын.
Уыцы æнамонд боны Хурийы фырты танк æнæмсæр тохы бацыд ныхмæлæууæджы мотофистæг æфсады дæлхайимæ. Йæ хæстон фæлтæрддзинады фæрцы ныхмæлæууæгыл æрцыд бирæнымæц уды зиæнттæ, хъыгдард баййæфта сæ техникæ. Рустам цы модернизацион танкы уыд, уый знаг комкоммæ сцæф кодта танкæты ныхмæ фæрæзтæй, фæлæ экипаж нæ рахызт æмæ дарддæр æххуыс кодта æфсæддон службæгæнджытæн. Ныхмæлæууæджы ПТУР-ы радон цæф сæмбæлд, Хуриты Рустам кæм бадт, уыцы бынатыл – танкы мæсыджы галиу фарсæрдыгæй… Фæцис мæлæтдзаг цæф, райста контузи. Хæстон машинæ спиллон калдта. Иннæ дыууæ хæстон æмæ сæм æххуысмæ чи фæзынд, уыцы хæстонтæ дæр фæлвæрдтой судзгæ танкæй Рустамы раласынмæ, фæлæ сæ бон не ссис. Уымæн æмæ сæ цуры хаудтой æмæ пырх кодтой снарядтæ. Спырх, танкы ма сæм цы хæстон комплект баззад, уый дæр…
Гвардийы сержант Хуриты Рустам хъæбатырæй фæмард, йæ фæстаг сулæфты онг йе ‘фсæддон хæс æххæст кæнгæйæ.
Хуриты Рустамыл цыд 37 азы. Æнæ фыдæй баззадысты æртæ чысыл сывæллоны… Хæстон æнустæм æнцойад ссардта Джызæлы хъæуы уæлмæрды.
Рустамы хæлар, легендарон танкист, Уæрæсейы хъайтар Есенаты Таймураз йе ‘мбалы амæлæты тыххæй фехъусгæйæ, ацыд знæгтæй йын йæ маст райсынмæ æмæ æбæргæй фесæфт Донбассы фронты…
Цыбыртæй уын уæ зæрдыл лæууын кæнæм хъайтары сгуыхтдзинæдты тыххæй. Батальонон тактикон къорды сконды хистæр сержант Есенаты Таймуразы командæйы бын танкы экипаж стратегион ахсджиаг цæрæн пунктмæ бацæугæйæ, тохы бацыд, йæ тыхтæ бирæ фылдæр кæмæн уыдысты, уыцы ныхмæлæууæгимæ. Арæхстджынæй маневртæ аразгæйæ, Есенаты Таймуразы хæстон машинæ спырх кодта знаджы дыууæ бронемашинæйы æмæ скуынæг кодта 30 украинæйаг националисты бæрц. Карз тохы рæстæджы знæгтæ ракетон комплексæй сцæф кодтой Таймуразы танк. Экипажы уæнгты цард бахъахъхъæныны тыххæй æфсæддон службæгæнæг бардзырд радта йæ дæлбар хæстонтæн, танкæй рахизын æмæ æввахсдæр къохы хи бааууон кæныны тыххæй, цæмæй æхсæвы уæрæсейаг æфсæдты районмæ ацыдаиккой.
Экипаж æмбæхсгæ-æмбæхсгæ рацыд УФ-йы Гарзджын тыхты дæлхæйтты дислокацийы бынаты ‘рдæм, фæлæ бахаудтой украинæйаг националистты æрхъулайы. Тохы рæстæджы Есенаты Таймураз фæцæф æмæ бауадзыг, йе ‘муд куы æрцыд, уæд æй бамбæрста амынæты кæй бахаудта, уый. Хистæр сержант не сразы националисттимæ ныхас кæныныл æмæ сын уæрæсейаг гарзджын тыхты тыххæй информаци радтыныл. Уæд æй неонацисттæ тыхджын фæнадтой æмæ та Таймураз ногæй фæсур. Цасдæр рæстæджы фæстæ та нацисттæ ногæй бафæлвæрдтой УФ-йы гарзджын тыхты равæрды тыххæй информаци райсыныл, фæлæ та сæ фæндæй ницы рауад. Йæ цардæн тæссаг кæй у, уый æмбаргæйæ, йе ‘фсæддон хæсыл æнувыдæй баззайгæйæ æмæ тыхджын рыстытæ уромгæйæ, Есенаты Таймураз фæхъæр кодта: «Кæд хæдзармæ æрыздæхон, уæд райсдзынæн автомат æмæ фæстæмæ æрцæудзынæн сымах, фашистты марынмæ!».
Абоны онг дæр Есенаты Таймураз нымад цæуы æбæрæгæй сæфтыл…
Банысан кæнын хъæуы уый дæр æмæ, Фыдыбæстæ хъахъхъæнджытыл баст кæй у нæ фидæн. Хъæбатырты фыццаг рæнхъыты сты ирыстойнаг хæстонтæ – контрактмæ гæсгæ æфсæддон службæгæнджытæ, бархионтæ. Уыдон хъæбатырæй дæрæн кæнынц знæгты æмæ афтæмæй фыссынц ног истори. Аразынц сгуыхтдзинæдтæ. Сæрмагонд æфсæддон операцийы хайадисджытæй æппæт Уæрæсейы Федерацийы Уæрæсейы хъайтары ном саккаг кодтой 280 адæймаджы бæрцæн. Се ‘хсæн сты æртæ ироны – Есенаты Таймураз, Даттиаты Алан æмæ Абайты Юри. Тæхæг Даттиаты Алан иу атахтæн скуынæг кодта знаджы æртæ нысаны. Стæм цау… Уый домдта бæрзонд дæсныдзинад æмæ æгæрон хъæбатырдзинад. Ахæм миниуджытæй та хайджын вæййы æцæг хъайтар.
ДЖИОТЫ Екатеринæ
