2-æм апрелы Санкт-Петербурджы теракты рæстæджы фæмард зынгæ æфсæддон уацхæссæг Владлен Татарский (йе ‘цæг ном Максим Фомин). Срæмыгъд æрцыд горæты центры кафейы, цыран фембæлд уыд æфсæддон журналистимæ. Рæмудзæн æрмæджы хъомысад уыд 200 тротилæй фылдæр. Теракты рæстæджы ма фæцæфтæ сты 32 адæймагæй фылдæр. Уыдонæй бирæтæ сты уæззау уавæры æмæ дохтыртæ архайынц сæ фервæзын кæныныл.
Куыд банысан кодтой, афтæмæй кафейы хицау у ЧВК «Вагнер»-ы саразæг Евгений Пригожин. Уым улæфтбонты æрæмбырд вæййы дискуссион клуб «Кибер Z фронт». Донецкы Адæмон Республикæйы фæсарæйнаг хъуыддæгты министрады раздæры сæргълæууæг Константин Долговы бæрæггæнæнтæм гæсгæ, фембæлдмæ, гæнæн уыдис, æрбацыдаид Пригожин йæхæдæг дæр.
Дзыллон информацийы фæрæзты хъусынгæнинæгтæм гæсгæ, рæмудзæн æрмæг æвæрд уыд статуэткæйы, кæцыйы Татарскийæн уырдæм æрбахаста æвзонг чызг. Æфсæддон уацхæссæгимæ фембæлды организатор «Кибер Z фронт»-ы змæлд сарæзта хъусынгæнинаг, зæгъгæ, æдасдзинады мадзæлттæ ист цыдысты. Фæлæ, хъыгагæн, уыдон фаг нæ разындысты æмæ æрцыд æвирхъау трагеди.
Владлен Татарский райгуырд 1982 азы 25 апрелы, Донецкы Адæмон Республикæйы шахтерон горæт Макеевкæйы. Донбасс хъахъхъæнынмæ ацыд 2014 азы, архайдта Горловкайы бархионты къорды. Уый фæстæ ссис дæлхай «Витязь»-ы хæстон. Хæцыд батальон «Восток»-ы. Службæйæ куы ацыд, уæд ссис блогер Владлен Татарскийы псевдонимы бын æмæ æппæт уыцы рæстæджы æвдыста Донбассы цæуæг цаутæ. Хæстон архайдтытæ куы фæактивондæр сты, уæд æрбаздæхт фронты раззаг хахмæ æфсæддон уацхæссæгæй.
«Уый цыд хæсты тæккæ цæхæрмæ. Иумæ ацыдыстæм Мариуполмæ, активон хæстон архайдтытæ дзы куы цыдысты, уæд. Уыд раст адæймаг, тынг бирæ сарæзта «боны фæтк» саразынæн, кæцы нæ цыд киеваг режимы зæрдæмæ. Теракт дæр уыд йæ ныхмæ арæзт, уымæн æмæ амарынц ахæмты, кæцытæ æрмæст дзургæ нæ кæнынц, фæлæ лæмбынæг æмбарын кæнынц æппæт цауты тыххæй дæр. Ацы æнæадæймæгтæ фæлварынц Дарья Дугина æмæ Татарскийы хуызæн адæймæгты скуынæг кæнынмæ», – банысан кодта Донецкы Адæмон Республикæйы Сæргълæууæджы æххуысгæнæг Ростислав Антонов.
Татарский оперативонæй информаци лæвæрдта фронтæй. 2022 азы Уæрæсемæ Донецк æмæ Луганскы Адæмон Республикæты æрбаиу кæныны тыххæй Владимир Путин йæ къух барамындыл куы æрфыста, уæд церемонийы хайадисæг Владлен Татарский залæй рахызт ахæм ныхæстимæ: «Мах алкæуыл дæр фæуæлахиз уыдзыстæм», зæгъгæ.
2021 азы ныффыста чингуытæ «Бег» æмæ «Война». Иу азы фæстæ та – чиныг «Медитация».
Мах дæр мæсæллæй зæгъæм Татарскийы хиуæттæн, уæрæсейаг журналистон æмæхсæнадæн.
