Ивгъуыд къуырийы кæрон Ленингоры районмæ кусæгон балцы æрцыдысты Армавиры Паддзахадон университеты минæвæрттæ. Уыдоныл фембæлд Ленингоры администрацийы сæргълæууæг Гæджиты Иларион. Фембæлды рæстæджы уазджытæ куыд загътой, афтæмæй сæ фæнды Ленингоры районы ахуырады центр бакæнын, цыран архайдзысты уырыссаг æвзаг популяризаци кæныныл.
Районы разамынад уазджытæн лæмбынæг радзырдта, цы этнокультурон объекттæ сæм ис, уыдоны æмæ уырыссаг æвзаг ахуыр кæныны мæдзæлтты тыххæй. Уый фæстæ уазджытимæ иумæ азылдысты районы культурон уагдæттыл, цæмæй сæхицæн равзарой кусæн бынæттæ.
Уырыссаг æвзаг ирон мадæлон æвзаджы æмрæнхъ Хуссар Ирыстоны у паддзахадон. Абон æмæ фидæны дæр уырыссаг æвзаг ахъаз уыдзæн нæ адæмы размæцыдæн. Æрвылаз дæр сæдæгай ирон лæппутæ æмæ чызджытæ ахуыр кæнынмæ ацæуынц Уæрæсейы Федерацимæ æмæ уым райсынц уæлдæр ахуырад. Кæй зæгъын æй хъæуы, уым ахуыр цæуы уырыссаг æвзагыл. Уырыссаг æвзаг Ленингоры районы популяризаци кæнгæйæ, фæсивæды раз ноджы уæрæхдæр байгом кæндзæн фæндæгтæ сæ дарддæры царды. Ленингоры районы цы центр конд цæуы, уый ахъаз уыдзæн бынæттон цæрджытæн æндæр ахсджиаг æмæ нысаниуæгджын хъуыддæгты дæр.
УАЗÆГТЫ Марфæ
