Налцыччы уагъд цыд, 16 азы онг кæуыл цæуы, уыцы спортсменты ‘хсæн Цæгат Кавказы Федералон зылды чемпионат стъолы теннисæй. Уым РЦИ-Аланийы лæппуты æмбырдгонды сконды хайад истой хуссарирыстойнаг теннисисттæ Балдан Дашиев æмæ Ролан Кулишев. Чызджыты æмбырдгонды та архайдтой Майя Касрадзе, Цхуырбаты Иринæ, Тедеты Алинæ, Къуылыхты Заринæ æмæ Хъуылымбегты Виктория.
Командон хыгъды лæппутæ æмæ чызджыты командæтæ бацахстой æртыккаг бынæттæ. Хисæрмагонд хыгъды дыккаг финалы фыццаг бынат бацахста Къуылыхты Заринæ, æртыккаг финалы та фыццаг ссис Майя Касрадзе.
Спортсменты бацæттæ кодтой Джиоты Мириан, Остъаты Лидия æмæ Уалыты Иринæ.
Уæлдæр спортивон дæсныйады скъолайы тренер Джиоты Мириан бузныг зæгъы спортсменты бацæттæ кæныны тыххæй сын чи баххуыс кодта, уыдонæн – Кæсойты Ларисæ æмæ Изетæ, Кокойты Амандæ æмæ Максим Ведмедеряйæн.
Ныр спортсментæ сæхи цæттæ кæнынц, 14 азы онг кæуыл цæуы, уыцы теннисистты ‘хсæн Цæгат Кавказы Федералон зылды чемпионатмæ.
ХУРИТЫ Батрадз
