Нæ горæты æвзонг фæлтæры физикон культурæйыл, сæйраджыдæр та футболыл цайдагъ кæнынмæ стыр бавæрæн хæссы æхсæнадон-хæрзаудæн фонд «Фæранк»-ы коллектив, хонынц ма йæ «Лига» дæр. Фонды хистæр у Къæбысты Славик æмæ нысанмæздæхт архайд кæны къорд азты дæргъы. Зæгъын æмбæлы, райдайгæ футболуарзджытæн иузæрдион æмæ хъаруджын куыст чи кæны, уыцы тренерты тыххæй. Нæ футболуарзджытæн хорз зындгонд уыд, Цхинвалы «Спартак»-ы раздæры къулдуаргæс чи уыд, уыцы фæлтæрд æмæ арæхстджын футболист Цхуырбаты Никъала. Уый иу æмæ дыууæ хатты нæ фервæзын кодта ныхмæлæуджыты голæй. Фæстæдæр ацы æвзыгъд футболисты фæхуыдтой Цæгат Ирыстоны сæйраг командæмæ æмæ йын уым дæр уыд æнтыстытæ. Нæ уарзон командæйы ныфс æмæ сæрæн футболисттæ ма уыдысты Мæргъиты Славик, Кокойты Юри, Къобаладзе Рамаз, Бекъойты Булат æмæ æндæртæ. Фæлæ азты цыдимæ футболисттæ хæрзбон загътой хъазтæн, æрмæст бынтон нæ ацыдысты футболæй. Ныр та сæ сæйраг хæс у сомбонæн аккаг футболисттæ схъомыл кæнын æмæ уыцы ахсджиаг тренерон куыстæй иу бон дæр иппæрд не сты. Лигайы разамынад æппæт дæр аразы, цæмæй ам кæстæртæ сæ хъомылгæнджыты разамындæй сæхи фæлтæрой æмæ уыимæ иумæ фидардæр кæна се ‘нæниздзинад дæр.
Райдайгæ футболисттæ ифтонг сты пуртитæ æмæ спортивон дарæсæй. Фæлæ æрмæст ууыл нæ фæуд кæны хæрзаудæн æххуыс, тренировкæты фæстæ сын вæййы сæхи ныннайыны фадат дæр. Æдæппæт ацы футболон фæзуаты тренировкæ кæнынц 300 æвзонг лæппуйы, уыцы иурæстæджы та дзы 2 тренерæн сæ бон у сæ хъомылгæнинæгтимæ алыхуызон фæлтæрæнтæ уадзын. Уыимæ иумæ «Лига»-йы разамынад сæ уавæры бацæуы æндæр организацитæн æмæ сæ уый тыххæй баззайынц райгондæй. Цæвиттон, амæйраз-мæ сæм нæ республикæйы Физикон культурæ æмæ спорты комитет бахатыд, цæмæй сын спортивон мадзæлттæ ауадзынæн радтаиккой сæ фæзуат æмæ сын сæ фæндоныл сразы сты. Къæбысы фырт ма банысан кодта, зæгъгæ, нæ горæты уæвынад кæны футболон скъола, ис сын тренертæ дæр, фæлæ сын, хъыгагæн, нæй, кæм хъазой, ахæм фæзуат. Уыдоны фæндоныл дæр сразы вæййынц.
Зæгъын хъæуы, сæрдыгон тæвд рæстæджы тренировкæ кæнын æмæ хъазын дæр æнцон нæ вæййы. Уыцы хъуыддаг дæр хынцыд æрцæуы æмæ изæрыгон, иугæр тренировкæ куы фæкæнынц, уæд рухсытæ ссудзынц æмæ сыгъдæг уæлдæфы сæ спортивон рæстæг арвитынц. Æппæт уæлдæр ранымадгонд хæрдзтæ «Лига» исы йæхимæ æмæ сæ бафиды æнæкъуылымпыйæ. Уæддæр æмæ уæддæр ахæм æххуыс чи кæны нæ рæзгæ фæлтæрæн, æдзухдæр сыл чи ауды, уымæ дæр æнæмæнг æххуысы къух фæдаргъ кæнын хъæуы. Уый домы разамынад йæхæдæг дæр.
Хуыбиаты Никъала
