11-æм майы Милицийы сæрмагонд нысаниуæджы къорды бындурæвæрæг æмæ йæ фыццаг командæгæнæг Гæззаты Вадимыл сæххæст уыдаид 66 азы. Мидхъуыддæгты министрады къухдариуæгад Гуыцмæзты Аланы сæргълæудæй æмæ ОМОН-ы кусджытæ ссыдысты легендарон командиры ингæнмæ – сæвæрдтой йын дидинтæ æмæ йын йæ ном иу уысм æдзæмæй алæугæйæ ссардтой.

Гæззаты Вадим Герсаны фырт райгуырд 1957 азы горæт Цхинвалы. 1974 азы каст фæцис 5-æм астæуккаг скъола æмæ службæ кæнынымæ ацыд Советон Æфсады рæнхъытæм. Фæстæмæ æрыздæхгæйæ, бацыд кусынмæ милицимæ æмæ æвзыгъд кусæг кæй уыд, уымæ гæсгæ йæ арвыстой горæт Ташкентмæ уæлдæр ахуыргæнæндонмæ мидхъуыддæгты министрады хаххыл. Фæстæдæр милицийы куыста алыгъуызон бынæтты – фадыгон инспекторæй, уголовон фæдагуырды хайады, рæстæгмæдарæн изоляторы.

Гуырдзиаг агрессийы рæстæджы Вадим дæр слæууыд иннæ ирон хъайтар лæппуты æмрæнхъ – хъахъхъæдта йæ райгуырæн бæстæ тугдзых знæгтæй. Хæстон архайдтыты рæстæджы алыхатт дæр æхсæнады фæзыны хæццæдзинад, фыдракæндтæ бæрæг фæфылдæр вæййынц æмæ фæтк æрæвæрын зын вæййы ахæм уавæрты. Уæлдайдæр та, æрыгон хæстон лæппуты къухты æхсæнгарз куы вæййы, уæд сæм сдзырд нал вæййы, зноны хъайтартæй бирæтæ ныллæууынц криминалы фæндагыл. Уымæ гæсгæ бахъуыд сæрмагонд мадзæлттæ райсын.

Гæззаты Вадимы хъæппæрисæй 1992 азы 15-æм февралы арæзт æрцыд Милицийы сæрмагонд нысаниуæджы къорд. ОМОН-æн йæ хæстæ дзæвгар уыдысты, фæлæ йæ авналæнтæ та – къуындæг. Цухдзинад æййæфтой алцæмæйдæр, фæлæ уæддæр, зындзинæдтæм нæ кæсгæйæ, æппынæдзух архайдтой, цæмæй бынæттон цæрджыты бахизой фыдгæнджытæй. Уæды рæстæджы не ‘рыгон республикæ æгæр лæмæгъ уыд, нæ дзы уыд ахæм гоймæгтæ, кæцытæ сæ ныфс бахастаиккой криминалон элементтæн сæ ных бакъуырынмæ. Уымæ гæсгæ ОМОН-ы бахъуыд хотыхифтонг къордтимæ комкоммæ ныхас кæныны сæр. Иу ахæм конфликтон уавæры 1993 азы 13 июны Гæззаты Вадимы фыдмард акодтой. Йемæ ма уыдысты æртæйæ æмæ уыдоныл дæр нæ бацауæрстой.

Гæззаты Вадим 36 азы йеддæмæ нæ рацард, фæлæ йæ фæстæ ныууагъта кадджын ном, у цæвиттон æрыгон фæлтæртæн. Абоны бон ОМОН хæссы йæ ном. Горæты уынгтæй дæр иу у Гæззаты Вадимы номыл. 2010 азы Президенты барамындмæ гæсгæ Гæззаты Вадим хорзæхджын æрцыд «Уацамонгæ»-йы орденæй.

ДЖИОТЫ Алыксандр

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.