9-æм майы немыцаг фашисттыл Стыр Уæлахизы 78 азы сæххæсты цытæн Дзауы районы дæр цытджын æгъдауæй банысан кодтой ацы историон бæрæгбон. Хъыгагæн, районы цæрджытæ буц æмæ сæрыстыр кæмæй уыдысты, уыцы хæстон ветерантæй абоны бон иу дæр сæрæгас нал у, фæлæ сын адæм нæ рох кæнынц сæ нæмттæ. Кæстæр фæлтæртæн традицион æхсардзинады урокты ахуыргæнджытæ радзурынц 1941-1945 азты хæстон истори æмæ уæд хицæнæй æрдзурынц Ирыстоны хъайтартыл дæр.
Райцентры «Мысæн аллея»-йы Стыр Фыдыбæстон хæсты хъайтарты номыл цы цырт æвæрд ис, уый размæ адæм æмæ скъоладзау фæсивæд бæрæгбонвæлыстæй хастой дидинджытæ, уæлахизхæсджыты нæмттæ æрымысыны тыххæй. Ам ма цытджын æгъдауæй сæвæрдтой веноктæ, Кады гирляндæ. Айзæлыдысты Хуссар Ирыстоны æмæ Уæрæсейы Федерацийы гимны зæлтæ. Æмæ æфсæддон къамисар Санахъоты Юри адæмы зæрдыл æрлæууын кодта Стыр Фыдыбæстон хæсты азтæ, ирон хæстонты хъазуатон тох æмæ хъайтартыл уыд йæ ныхасы сæр. «Азтæ дугъон бæхау лидзынц, фæлæ махæй нæ рох кæ-ны, уыцы фондзазон уæззау фæлварæны нæ дадатæ æмæ нанатæ цы бавзæрстой, уый. Гитлер йæ хотыхджын æфсадимæ европæйаг бæстæты басæтгæйæ, æнхъæлдта æмæ цалдæр къуыримæ ССР Цæдисы дæр ныппырх кæндзæн æмæ йæ фашистон фæндон сæххæст уыдзæн. Фæлæ фыдæнхъæл фæцис. Гитлер æмæ немыцаг хæстонты фыст ныхæсты фæрцы историктæ равзæрстой, уыдон диссагæн кæй хастой Сырх Æфсад æмæ хæстонты удыхъæд, сæ хъару æмæ хъайтардзинад. Уый равдыста истори дæр æмæ абон мах нысан кæнæм Стыр Уæлахизы бæрæгбон. Стыр Фыдыбæстæйон хæсты ветерантæ алкæмæй хуыздæр зыдтой ацы бонæн йæ аргъ. Уæлахизы хæствæллад салдаттæ канд нæ бæстæйы хъысмæт не скъуыддзаг кодтой, фæлæ ма æппæт адæймагадæн рамбылдтой аккаг царды бар. Кадимæ æххæст кодтой сæ хæс Фыдыбæстæйы раз сæ нæмттæ сæнусон кодтой. Уæлахизы бæрæгбон-иу куы нысан кодтам, уæд-иу нæ поселочы уынгты арæхæй цыдысты нæ цытджын ветерантæ, арæхстгай-иу дзырдтой сæ хæс-тон фæндæгтыл, сæ зæрдæтæ-иу суынгæг сты, афтæмæй. Ныр уыдон нал сты не ‘хсæн æмæ сæ нæ хъæуы рох кæнын.
Ногæй фашизм Украинæйы зæххыл сдардта йæ сæр æмæ та нæ лæппуты дæр уырыссаг хæстонтимæ иумæ бахъуыд тох кæнын. Нæ иумæйаг фæндон уадз æмæ сæххæст уа æмæ та фашизм дæрæн куыд æрцæуа, уый Хуыцау саккаг кæнæд», – банысан кодта Юри. Ацы ныхæстæм Уæлахизы бæрæгбоны иу уысм æмырæй алæугæйæ ссардтой Стыр Фыдыбæстæйон хæсты æмæ сæрмагонд æфсæддон операцийы чи фæмард, уыдоны рухс нæмттæ.
Уæлахизы бæрæгбоны сæраппонд адæмæн раарфæ кодта Дзауы районы администрацийы сæргълæууæг Тыбылты Вандæ дæр. Уый фæстæ уыдис чысыл концерт. Хайад дзы райстой районы сфæлдыстадон къордтæ. Зарæггæнджытæ Къæбысты Маир æмæ Санахъоты Алан та азарыдысты æфсæддон зарджытæ.
Цхуырбаты Лариса
