Тыбылты Алыксандры номыл паддзахадон университеты байгом æвзонг нывгæнджыты равдыст «Цхинвал – Санкт-Петербург – Цхинвал»
Сфæлдыстадон къорд «Tskhinval 5»-ы æвзонг нывгæнджытæ равæрдтой 60 куыстæй фылдæр нывкæнынады æмæ графикæйы жанрты. Нывгæнджыты куыстытæ сты ирд æмæ тынг цымыдисон, æвдыст сæ цæуы куыд Ирыстоны рагон культурæйы рæсугъддзинад, афтæ йæ нырыккон цард дæр. Ацы куыстытæ æвдыстой Санкт-Петербурджы Чехойты Асланы Ног музейы дæр.
Цытджын церемонийы хайад райстой паддзахады сæргълæууæг Гаглойты Алан, Хуссар Ирыстоны Уæрæсейы Федерацийы æххæстбарджын минæвар Марат Кулахметов, Парламенты Сæрдар Æлборты Алан, Президенты Администрацийы къухдариуæггæнæг Мæргъиты Алан, Культурæйы министр Зæгъойты Радæ, нæ республикæйы интеллигенци æмæ æхсæнады минæвæрттæ. Гаглойты Алан загъта æвзонг нывгæнджытæн, уæ куыстытæ се ‘ппæт дæр сты уæлдæр æмвæзадыл.
«Уæ нывты сымах равдыстат ирон культурæ æмæ национ аивад. Сымах стут уникалон, курдиатджын адæймæгтæ, нæ паддзахады фидæн. Республикæйы разамынад алы хатт дæр уыдзæн уæ фарсмæ æмæ уын алы хатт дæр æххуыс кæндзæн. Мах уæ сæрыстыр стæм. Мæ зæрдæ уын зæгъы дарддæры æнтыстытæ. Уæ райгуырæн бæстæйы ном дарддæр дæр бæрзонд хæссут», – загъта паддзахады сæргълæууæг.
ХИПУ-йы ректор Тедеты Вадим раарфæ кодта нывгæнджытæн сæ уникалон куыстыты тыххæй. Бузныджы ныхæстæ загъта Президент æмæ мадзалы организатортæн, æвзонг нывгæнджытæн кæй баххуыс кодтой, уый тыххæй. «Ацы стыр нысаниуæгджын бæрæгбон уагъд цæуы Культурæйы министрадимæ иумæ. Фидарæй мæ бон зæгъын у, Хуссар Ирыстоны паддзахадон университет кæй ссис республикæйы культурон центртæй сæ иу», – загъта ректор.
Зæгъойты Радæ куыд банысан кодта, зæгъгæ, æвзонг нывгæнджытæ се сфæлдыстады пайда кæнынц ирон нывкæнынады аивады хъæздыг традицитæй.
«Сымах пропагандæ кæнут нæ фыдæлты исбон канд Ирыстоны нæ, фæлæ уымæн æддейæ дæр. Уæ куыст ма ныууадзут, разæй уæм стыр фидæн æнхъæлмæ кæсы. Мæн уырны æмæ уæ фæрцы нæ аивад размæ кæй цæудзæн», – загъта Культурæйы министр.
Равдыстмæ æрбацæуджытæ арфæ кодтой æвзонг нывгæнджытæ Саулохты Георги, Дыгъуызты Мария, Джиоты Магрез, Дзигойты Каринæ, Кокойты Мария, Гаглойты Дзерассæ, Æлборты Лирæ æмæ Гурциты Элинæйæн сæ диссаджы куыстыты тыххæй.
Сфæлдыстадон къорд «Tskhinval 5»-ы хайадисджытæй сæ иу, Саулохты Георги стыр бузныг загъта Президент Гаглойты Алан, Хуссар Ирыстоны Культурæйы министрад æмæ ХИПУ-йы ректор Тедеты Вадимæн се стыр æххуысы тыххæй.
Фæсарæйнаг хъуыддæгты министрады минæвар Джиджджойты Таймураз нын йæ тæлмæнтæ радзырдта æвзонг нывгæнджыты куыстыты фæдыл: «Зæгъæн ис, æмæ куыстытæ се ‘ппæт дæр сты уникалон æмæ зæрдæмæдзæугæ. Фæлæ се ‘хсæнæй рахицæн кæндзынæн Дыгъуызты Марияйы нывтæ. Уый у æцæг курдиаты хицау, йæ нывтæ афтæ рæсугъд æмæ аив сты æмæ сæм адæймаг кæсынæй не ‘фсæды. Равдыстмæ æрбацæуджытæ æнæрахатгæ нæ фæуыдзысты Кокойты Марияйы куыстыты аивдзинад дæр. Абон мæ зæрдæ сæрыстырдзинады æнкъарæнтæй байдзаг нæ курдиатджын фæсивæды архайдæй. Мæ зæрдæ сын зæгъы ноджы фылдæр æнтыстытæ.
Аивадæн табугæнджытæн сæ бон у равдыстмæ æрбацæуын ХИПУ-йы музейон комплексмæ 9.00 – 18.00 сахаты онг.
КОКАЙТЫ Зæринæ
