Республикæ Хуссар Ирыстоны Президент Бибылты Анатоли базонгæ ис ветеринарон æмæ фитосанитарон цæстдарды паддзахадон службæ «Югоссельхознадзор»-ы куысты уавæртимæ. Службæ нысан кæны йæ сырæзты юбилей.
Фыццаджыдæр, Бибылты Анатоли раарфæ кодта коллективæн сæ профессионалон бæрæгбоны цытæн æмæ сын йæ цæст бауарзта, æрвылбон дæр сæ куысты гъæд бæрзонддæр цы кæна.
Республикæ Хуссар Ирыстоны паддзахаддзинад сфидар кæныны хъуыддагмæ хайбавæрды тыххæй Президент «Югоссельхознадзор»-ы кусджыты схорзæхджын кодта «Фыдыбæстæйон хæсты ирон адæмы уæлахизыл 10 азы сæххæсты сæраппонд» майдантæй.
Дарддæр паддзахады сæргълæууæгæн æвдыст æрцыд «Югоссельхознадзор»-ы архайды фæдыл иу азы хыгъд, афтæ ма уынаффæ кодтой службæйы уæвынадмæ хауæг фарстатыл.
Службæйы къухдариуæггæнæг Мæргъиты Алан радзырдта, зæгъгæ, службæйы сырæзтæй фæстæмæ республикæйы къухдариуæгад æрæвæрдта Уæрæсейы Федерацимæ хуссарирыстойнаг продукци ласыны, афтæ ма республикæйы территорийыл ветеринарон æмæ фитосанитарон цæстдард æрбæстон кæныны фарстатыл.
«Ацы аз хуымæтæг нæ уыд. Бирæ ахсджиаг проблемæтыл сæмбæлдыстæм: Хуссар Ирыстоны фæзынд ног карантинон объект, мармæрон æхсынкъ кæй хонынц, уый. Хуыты африкæйаг емынæйыл дзургæйæ, мæ фæнды банысан кæнын, ацы низы фæзынд республикæйы территорийыл фыццаг хатт кæй нæу. Ветеринарон службæйы тыхтæй уыцы низыхатт иуварс æрцыд Знауыры районы», – банысан кодта уый.
Бибылты Анатоли дæр банысан кодта, «Югоссельхознадзор»-ы кусджытæ цы куыст бакодтой, уый ахсджиагдзинад. Банысан ма кодта, уæрæсейаг коллегæтимæ, сæйраджыдæр “Россельхознадзор”-имæ æмархайды фæдыл цы куыст æххæст æрцыд, уый.
«Æз зонгæ дæн, Службæ цы продукцийы гуырахстыл контроль кæны æмæ ветеринарийы фадыджы цы куыст кæнут, уыимæ», – загъта уый.
Президент Службæйы кусджытæн бахæс кодта, æмæй бацархайой ууыл æмæ фæлхасгæнджытæ, куыд Хуссар Ирыстоны, афтæ Уæрæсейы Федерацийы дызæрдыг ма кæной продукцийы гъæдыл.
Фитосанитарон контролы ахсджиагдзинад банысан кæнгæйæ, уый зæрдыл æрæфтыдта, бирæ куыстуæттæ раздæр кæй нæ зыдтой, гъæдыл контроль цы у æмæ кæй хъæуы бæрæг мадзæлттæ исын, кæцытæ сын фадат радтаиккой Хуссар Ирыстонмæ продукци ласынæн.
Бибылты Анатоли ма банысан кодта æвзонг специалистты хъуагдзинад ветеринарийы æмæ фитосанитарийы фадыджы.
«Хорз уаид, службæмæ æвзонг специалисттæ куы цæуиккой. Уæд куысты гъæд уаид бæрзонддæр», – загъта уый.
«Югоссельхознадзор» йæ куыст цы уавæрты æххæст кæны, уыдон кой кæнгæйæ, паддзахады сæргълæууæг банысан кодта, зæгъгæ, службæ цы бæстыхайы кусы, уый дзуапп нæ дæтты æмбæлон домæнтæн æмæ ис цалдæр альтернативон вариант æндæр бынатмæ ацæуынæн.
«Тагъд рæстæджы мах уыдонмæ æркæсдзыстæм æмæ иу хъуыдымæ æрцæудзыстæм. Уæ куыст æххæст кæнынæн цы ифтонгад хъæуы, æппæт уыдон балхæндзыстæм æмæ æппæтдæр араздзыстæм, цæмæй уæ куыст гъæдджындæр кæна, уымæн æмæ ууыл баст у не ‘мбæстæгты æнæниздзинад», – загъта Бибылты Анатоли.
Службæйы алыварс цы территори ис, ууыл йæ цæст ахæсгæйæ, паддзахады сæргълæууæг йæ хъус æрдардта чысыл бæстыхаймæ, кæцыйы, куыд ын бамбарын кодтой, афтæмæй ныр цалдæр азы дæргъы цæры ветеринарон лабораторийы хъахъхъæнæг Тыджыты Сослан йæ бинонтимæ.
Бибылты Анатоли цæрæнуатыл йæ цæст ахаста æмæ банысан кодта бинонтæн ам цæрой, уымæн нæй уæвæн, зæгъгæ.
«Уый, кæй зæгъын æй хъæуы, раст нæу. Бинонты æхсæн ис ас адæм, сывæллæттæ. Ацы агъуыст хæдзар нæу, фæлæ у уæлæмхас агъуыст. Ацы бинонты æнæмæнг хъæуы фатер», – загъта Президент.
Уый бынаты бахæс кодта, цæмæй Тыджыты бинонтæн радтой æртæхатæнон фатер «дыккаг цæрæнуат»-ы категорийæ, сæрмагонд фонды фадæттæй.
Comments are closed, but trackbacks and pingbacks are open.