Уæрæсейы Федерацийы ног паддзахадон программæ “Развитие Северо-Кавказского федерального округа на период до 2025 года” стыр ныфс бауагъта Цæгат Ирыстоны цæрджыты дæр. Æрæджы республикæйы амынд программæйы фæлгæтты реализацигонд æрцыд фондз инвестицион проекты экономикæйы алы къабазы: Куырттаты комы туристон комплексы арæзтад фысымуатимæ; Хойраг куыстгæнæн æмæ æфснайæн комбинат (ООО “Диг – Агро”); Колбас æмæ пельменты продукци уадзæн цех (ООО “Сигма Премиум”); 122 гектарыл талатæ ныссадзын æмæ 5 мин тоннæйы дыргъ кæм бафснайай, ахæм цех саразын (ООО “Владка”) æмæ Æрæфы машинæты уавæр иртасæн технологон станцæйы арæзтад. Ацы куыстуæттæ ныридæгæн куыстæй сифтонг кодтой 285 адæймаджы.
Цæгат Кавказы хъуыддæгты фæдыл министр Сергей Чеботарев куыд фехъусын кодта, афтæмæй программæ бирæ рæстæг нæма кусы, фæлæ ныридæгæн йæ фæлгæтты арæзт æрцыд бирæ хорз хъуыддæгтæ. Цæгат Кавказы субъекттæм се ‘ргом раздæхтой æмæ алы проектты хицæуттæ систы бирæ инвестортæ, фæзынд сæдæгай куысты бынæттæ.
Амынд паддзахадон программæмæ ма Цæгат Ирыстонæй бахаудысты акционерон æхсæнадтæй цыппар дæлпрограммæйы республикæйы æмвæзадыл: “Фундук Алании”, “Колос-2019”, “Грин” æмæ “Арæзтæдты иугонд компани 21 æнус”. Уыдон дæр республикæйы рæзтмæ бахæсдзысты стыр бавæрæн.
“Республикæйы разамынд стыр бузныг сты Уæрæсейы Хицауадæй, Цæгат Кавказы рæзтæн ахæм программæ кæй бацæттæ кодтой, уымæй. Цæгат Кавказы алы регионæн дæр уый æрхæсдзæн стыр пайдатæ. Æрмæст махæн цы фондз федералон проекты æмæ цыппар дæлпрограммæйы банымадтой, уыдонæн аргъ нæй. Цыбыр рæстæгмæ республикæйы фæрныгадыл ахадгæ бæркад бафтаудзысты”, – загъта республикæйы Сæргълæууæг Битарты Вячеслав.
АИВАДОН ÆРМАДЗТÆН – НОГ БЫНАТ
Цæгат Ирыстоны промышленность æмæ транспорты министр Хайдарбек Бутов рахаста ахсджиаг уынаффæ: республикæйы аивадон æрмдæснытæн иумæйаг куыстуат саразын завод “Бином”-ы раздæры территорийыл. Куыд зонæм, афтæмæй Ирыстоны бирæ æрмдæсныйы куыстгæнджытæ ис, фæлæ сын нæй бынæттæ, æвзарынц зындзинæдтæ, чи йæ хæдзары кусы, чи стыр æхцатæ фиды… Министры фæндонмæ гæсгæ, чи нал кусы, уыцы заводы стыр фæзтæй иу хъуамæ лæвæрд æрцæуа аивадон æрмадзтæн. Уый суыдзæн æнæхъæн республикæйы зындгонд аивадон куырдадз. Алцы дæр ссарæн уыдзæн уым. Министры хъуыдымæ гæсгæ, æрмадзтæ иу ран куы уой, уæд сæм адæм цæудзысты æнæзивæгæй, стæй паддзахадон æххуыс райсдзысты, æнтыстытæ кæцы куыстуатæн уа, стыр заказтæ чи иса, уыдон.
Ныртæккæ министрады разамонджытæ æмæ æрмдæснытæ бæрæг кæнынц бынат, ласынц æм хъæугæ техникæ, цæттæ кæнынц документтæ.
Амынд министрады пресс-службæйы куыд загътой, афтæмæй раздæры завод “Бином”-ы фæзы цы алыхуызон æрмадзтæ уа, уыдоны араздзысты алы нациты сувениртæ, сылгоймаджы аивгæнæнтæ, ирон чындзытæ, хуыйдзысты национ уæлæдарæс æмæ бирæ æндæртæ.
Нæ уацх.
Comments are closed, but trackbacks and pingbacks are open.