Нæ горæты Æвзонг техникты республикон станц рæзгæ фæлтæрæн йæ дуæрттæ байгом кодта 1938 азы æмæ уæдæй фæстæмæ ныр 85 азы дæргъы уагдоны куыстуарзаг коллектив алыгъуызон кружокты техникæимæ кусыныл ахуыр кæнынц бирæнымæц æвзонг адæймæгты. Уæлæмхас ахуырадон уагдоны райсгæ зонындзинæдтæй уыдон спайда кæнынц сæ дарддæры царды æмæ афтæмæй пайда хæссынц куыд схæицæн, афтæ æхсæнадæн дæр.
Ацы бонты та Æвзонг техникты республикон станцы педагог-организатор Лолаты Иннæ, уагдоны директор Къалаты Нариманы сæргълæудæй сорганизаци кодтой равдыст-конкурс «В мире миниатюр», зæгъгæ, цыран равæрд æрцыдысты æвзонг техникты куыстытæ. Жюрийы уæнгтæ уыдысты РХИ-йы Ахуырад æмæ зонады министрады консультант Гæджиты Аннæ, Сывæллæтты сфæлдыстады галуаны ахуыргæнæг Харебаты Фатимæ, ацы станцы ахуыргæнæг Доциты Михаил.
Декоративон-прикладон сфæлдыстады республикон конкурс-равдысты нысæнттæ æмæ хæстæ сты: декоративон-прикладон сфæлдыстад популярон кæнын, нырыккон социокультурон практикæйы креативон æхсæнад саразын. Сывæллæтты хисæрмагонд потенциал среализаци кæнынæн фадат радтын. Сфæлдыстадон курдиæтты рæзты фæдыл æвзонг техникты æнтыстытæ равдисынæн ахуырадон организацийы ахуыргæнджытæн уавæртæ саразын. Ахуыргæнджытæ æмæ ахуыргæнинæгты сфæлдыстадон æмгуыстады тыххæй уавæртæ саразын æмæ афтæ дарддæр. Куырдиæттæ ист цыдысты 1-æм мартæй 25 марты онг.
Конкурсы хайад райстой уæлæмхас ахуырады организацийы, Цхинвал æмæ республикæйы районты астæуккаг скъолаты ахуыргæнинæгтæ ахæм кары категоритæм гæсгæ: 9-11, 12-14, 14-17 азы онг. Конкурс уагъд цыд æртæ здæхты фæдыл: 1.Хъæдæй экспонаттæ (миниатюрæтæ); 2. Згъæрæй миниатюрæтæ; 3. Пластикæй миниатюрæтæ. Куысты максималон бæрц 12х12 стырдæр ма хъуамæ уыдаид. Алкæцы куысты цур уыд хайадисæджы тыххæй информациимæ этикеткæ, цыран уыдысты авторы ном æмæ мыггаг, кар, астæуккаг скъола, кълас, куысты ном.
Конкурсы равæрд æрцыдысты станцы, горæты скъолаты ахуыргæнинæгтæ, Цхинвалы районы Дменисы хъæуы æмæ Ленингоры поселочы сфæлдыстадон хæдзары ахуырдзауты куыстытæ.
Куыстытæм æркæсыны рæстæджы жюрийы уæнгтæ саргъ кодтой хайадисджыты куыстытæн: фыццаг кары категорийы (9-11 аздзыдтæ) 1-аг бынат бацахста Цхуырбаты Арсен – Æвзонг техникты станцы ахуыргæнинаг, кæцы тынг хорз сарæзта «Скорпион», йæ ахуыргæнæг у Ефименко Алан. 2-аг бынатыл ацыд станцы ахуыргæнинаг Къодоты Хетæг (11 азы). 3-аг бынат та саккаг кодтой Ленингоры Сывæллæтты сфæлдыстады хæдзары ахуыргæнинаг Куыдзеты Андрейæн (9 азы).
Дыккаг кары категорийы (12-14 аздзыдтæ) 1-аг бынат бацахста Лалазашвили Алан (14 азы, Ленингор), 2-аг бынат – Коцты Анастасия (13 азы), 3-аг бынат – Хъотайты Аннæ (13 азы). Æртыккаг кары категориийы (15-17 аздзыдтæ) 1-аг бынат бацахста Хъуылымбегты Давид – (15 азы, Æвзонг техникты станц), 2-аг бынат – Хуыбылты Радион – (16 азы, Æвзонг техникты станц), Бететы Хъазбег – (15 азы, Æвзонг техникты станц). Сæрмагонд номинацийы уæлахиздзау ссис Дзæгъиаты Хазби (12 азы, «Судомоделирование).
Горæт Цхинвалы æмæ республикæйы районты астæуккаг скъолатæ: Фыццаг кары категори (9-11 аздзыдтæ): 1-аг бынат бацахста 11-æм астæуккаг скъолайы 3-æм къласы ахуыргæнинаг Хуыджеты Линдæ. 2-аг бынат – 6-æм астæуккаг скъолайы ахуыргæнинаг Багаты Миланæ (10 азы), 3-аг бынат – 3-æм астæуккаг скъолайы ахуыргæнинаг Æлборты Дианæ (9 азы).
Дыккаг кары категорийы (12-14 аздзыдтæ) 1-аг бынат бацахста 11-æм астæуккаг скъолайы ахуыргæнинаг Цхуырбаты Азæмæт (14 азы), 2-аг бынат – 9-æм астæуккаг скъолайы ахуыргæнинаг Чертхъоты Сослан (14 азы), 3-аг бынат – 11-æм астæуккаг скъолайы ахуыргæнинаг Табуты Сæрмæт (11 азы).
Организатор Лолаты Иннæйы ныхæстæм гæсгæ конкурс-равдыст «В мире миниатюр» уагъд æрцыд фыццаг хатт. «Сывæллæттæ дзы хайад райстой райзæрдæйæ. Хъыгагæн, дзы нæ республикæйы районтæ иууыл хайад нæ райстой, фæлæ нæ ныфс ис иннæ хатт кæй фæактивондæр уыдзысты, уымæй», – загъта уый.
Æвзонг техникты республикон станцы директор Къалаты Нариман куыд банысан кодта, афтæмæй дыууæ къуырийы фæстæ Станцы кæрты конкурсы уæлахиздзаутæ хорзæхджын æрцæудзысты зæрдылдарæн лæвæрттæй. Иумиагæй йæ хайадисджытæн иууылдæр ратдзысты сертификаттæ, сæ ахуыргæнджытæн та саккаг кæндзысты Кады грамотæтæ.
Æвзонг техникты станцы ахуыргæнæг Цхуырбаты Роллан сывæллæттимæ кусы зынгæ нывгæнæг, æрхъуыдыгæнæг æмæ ахуыргонд Леонардо да Винчийы механизмтæм гæсгæ. Уый у тынг цымыдисон, ацы механизммæ гæсгæ, сывæллæттæ сарæзтой чысыл хъæдын дзаумæттæ.
Банысан кæнын хъæуы уый дæр æмæ станцы ахуыргæнджытæ мастер-къластæ кæй ауадзынц республикæйы скъолаты ахуыргæнинæгтæн. Фæстаг хатт сæм фæуазæг сты Къостайыхъæуы скъолайы ахуырдзаутæ. Арæх станцы кусджытæ цæугæ мастер-къластæ ауадзынц республикæйы районты скъолатæн дæр. Станцы уæвынад кæнынц алыгъуызон кружоктæ: «Умелые руки», «Выжигание», Судомоделирование», «Юный оператор», «Радиоэлектроника», «Резьба по дереву» «Робототехника» æмæ æндæртæ. Ахуыры азы райдианы ацы кружктом æрбацæуынц бирæнымæц ахуыргæнинæгтæ. Уыдонæй бирæтæ ацы станцы равзарынц сæ фидæны дæсныйад дæр.
ДЖИОТЫ Екатеринæ
