Ацы бонты Хуссар Ирыстоны хъæууон хæдзарад баххæст ног техникæйæ. Уыдон сты ахæмтæ, кæцытæй нырмæ ифтонг нæ уыдысты. Техникæ æлхæд æрцыд, банг цы кредитон фæрæзтæ рахицæн кодта, уыдонæй. Лæмбынæгдæр уый фæдыл дзуры хъæууон хæдзарады министрады механизаци æмæ зайæгойты хайады сæргълæууæг Мулдарты Игорь.
– Ныр нæ республикæйы картоф тауыны куыст фæрогдæр уыдзæн. Уыдзæн нæм, чи йæ тауы æмæ йын стæй йæ тыллæг чи æфснайы, ахæм техникæ. Нæ республикæйы территорийыл зæххыты фылдæрмæ æвнæлд нал цыд. Схъæд сты, раздæры колхозы дыргъдæттæ бæлæстæ бахус сты. Цæмæй зæххы ахæм фæзуæттæ ногæй куыстгонд цæуой, зæхх сæрибар уа къутæртæ æмæ хус бæлæстæй, уымæн ахъаз уыдзæн сæрмагонд агрегат.
Ног техникæйы ‘хсæн ис «Беларус» трактор дæр йæ гутæттимæ, Т-150 йæ культиватортимæ, бульдозер, прессгæнæн æмæ æндæр ахæмтæ. Ног техникæйыл кусын нæ механизаторты амонынц бынаты, Уæрæсейæ æрцæугæ специалисттæ. Уый размæ та бы-нæттон механизатортæй сæ иу æрвыст æрцыд Ставропольмæ иу къуырийы æмгъуыдмæ æмæ сахуыр кодта ног техникæ цалцæг кæныны сусæгдзинæдтæ. Уæрæсейæ æрцæугæ специалисттæ ныфс бавæрдтой рæстæгæй-рæстæгмæ кæй æрцæудзысты æмæ бæ-рæг кæндзысты техникæйы уавæр. Уымæй цалдæр мæйы раздæр та Уæрæсейы Федерацийы хъæууон хæдзарады механизаци, химизаци æмæ зайæгойтæ хъахъхъæныны департамент нæ республикæйæн лæварæн æрæрвыста тыллæгæфснайæн комбайн, трактор «Кировец» æмæ минералон хъацæнтæ пырхгæнæн. «Ацы техникæйы хуызтæй нæ хъæууон хæдзарады министрад рагæй цух уыд. Ахæм æфснайæн комбайны фæрцы бирæ фенцондæр – æфсирон культурæтæ æфснайд æрцыдысты афоныл. Зæхкусæгон фермерон хæдзарадтæ дæр иу тыхстысты комбайныл æмæ ныр сæ куыстытæ афоныл бакодтой. Раздæр та-иу нæмыгонтæ æфснайыны сезон йæ тæмæны куы бацыд, уæд карзæй æнкъардæуыд техникæйы хъуагдзинад. Мах стыр бузныг стæм Уæрæсейы Федераци нæм йе ‘ххуысы къух кæй фæдаргъ кодта. Техникæ куы уа, уæд та зæхкусæг фезмæлыны фыдæй ницы фесафдзæн. Ныртæккæ дæр дзæвгар сты, хъæууонхæдзарадон культурæтæм чи зилы, фæлæ æз афтæ хъуыды кæнын æмæ техникæйæ цух куынæ уæм, уæд зæххмæ зилын кæй фæнда, уыдон нымæц дæр фæфылдæр уыдзæн», – загъта Мулдарты Игорь.
Уый радзырдта техникæйы иуæгтæ районтыл æмæ хæдзарадтыл куыд дих æрцыдысты, уый тыххæй дæр. Зæххыты иуыл стырдæр фæзуат бакусынц, Ленингоры æмæ Цъинагары зонæйы цы хæдзарадтæ ис, уыдон. Æфсирон культурæтæ тауæн агрегаттæ дыууæ йедт-тæмæ нæ уыдысты æмæ-иу цалынмæ уыдон Знауыры районы кодтой куыстытæ, уæдмæ æрхæццæ гербецидтæ æмæ минералон хъацæнтæ бахæссыны афон дæр. Ныр иу тауæн лæвæрд æрцыд Ленингоры районæн, иннæ тауæн та лæвæрд æрцыд Цхинвалы районæн, сæ арсеналы ис «Кировец» трактор дæр. Уый фæрцы канд хуым нæ кæнынц, фæлæ ма тракторы фæрцы фæлмæн кæнынц мæр æмæ æххæст кæнынц тауыны куыстытæ дæр. Ныр нæ республикæйы хоргуыстгæнæн техникæ ис 9 иуæджы æмæ уымæ гæсгæ районтæ сæ тыллæг æфснайыны рæстæджы кæрæдзи нæ хъыгдарынц.
Хуссар Ирыстоны хъæууон хæдзарады министрады къухы 2021 азы æмткæй бафтыд 42 техникæйы иуæджы.
УАЗÆГТЫ Марфа
Comments are closed, but trackbacks and pingbacks are open.