Паддзахадон киноконцертон зал «Чермен»-ы хорзæхджын æрцыдысты нывкæныны сабион конкурс «Моя любимая и цветущая Осетия»-йы уæлахиздзаутæ. Ацы конкурс уагъд æрцыд нæ бæстæйы Президент Бибылты Анатоли, Нывгæнджыты цæдисы сæрдар Битеты Аланы, сывӕллӕтты барты фӕдыл ӕххӕстбарджын Цхуырбаты Татьянæ æмæ зынгæ æхсæнадон архайæг, чиныг «Осетия и осетины»-йы саразæг Челехсаты Хъазбеджы æххуысæй. Хорзæхджын æрцыдысты 76 финалисты, грамотæты æддейæ ма курдиатджын сывæллæттæ райстой æхцайы сертификаттæ дæр.
Мадзалмæ фæуазæг сты Культурæйы министр Зассеты Жаннæ, Ахуырад æмæ зонады министр Гасситы Натали æмæ æндæр бæрнон кусджытæ, æхсæнадон архайджытæ, ахуыргæнджытæ æмæ ныййарджытæ. Конкурсы хайад райстой 3 мин сывæллоны бæрц – астæуккаг скъолаты райдиан кълæсты, Паддзахадон аивадты лицейы ахуырдзаутæ, Сывæллæтты сфæлдыстадон галуаны, нывгæнæн студиты æмæ рæвдауæндæтты хистæр къордты сывæллæттæ. Йæ нысан уыд, цæмæй рæзгæ фæлтæрмæ фæзына тырнындзинад аивадмæ, уарзондзинад – Райгуырæн бæстæмæ, культурæмæ, традицитæм. Ахæм масштабон конкурс сорганизаци кæнынмæ сæм фæкастысты Ахуырад æмæ зонады министрады кусджытæ.
Конкурсы хайадисджытæ бузныджы ныхæстæ загътой Бибылты Анатолийæн, йе ‘ххуысы къух сæм кæй фæдаргъ кодта æмæ йæ фæрцы мадзал бæрзонд æмвæзадыл кæй ацыд, уый фæдыл. Бибылты Анатоли дæр йæхирдыгæй банысан кодта, зæгъгæ, конкурс ирдæй равдыста, кæй нын ис курдиатджын рæзгæ фæлтæр æмæ ахæм мадзæлттæ та ахъаз кæй сты йæ хайадисджытæн, цæмæй сæ уарзондзинад райгуырæн бæстæмæ æргомæй æвдисой.
«Сывæллæтты цæстытæй куы кæсæм нæ алфæмблаймæ, уæд нæм рæсугъддзинад æндæргъуызон фæкæсы, æндæр æнкъарæнтæ нæм сæвзæры. Сæ куыстытæм сын куы æркæсæм, уæд æй бафиппайдзыстæм, сывæллæттæ алыран дæр кæй уынынц рæсугъддзинад. Ахæм курдиатджын фæсивæд хъуамæ рæзой сыгъдæг арвы бын, райтынг кæной сæ курдиат æмæ мах та, хистæр фæлтæр, хæсджын стæм, цæмæй сын уыцы уавæртæ саразæм», – загъта Президент.
Арфæйы ныхæстæ ма загъта Челехсаты Хъазбег дæр, кæцы стыр аргъ скодта сывæллæтты бакæнгæ куыстытæн æмæ ма сæ рахуыдта «диссаджы нывтæ» дæр.
«Уæ нывтæм кæсынæй адæймаг исы стыр æхцондзинад æмæ сæрыстыр дæн, нæ чысыл Ирыстоны ахæм курдиатджын кæстæр-тæ кæй рæзы, уымæй. Аивад адæймаджы кæддæриддæр размæ кæны, рæсугъддзинад у æмæ уын мæ зæрдæ зæгъы ноджы фылдæр æнтыстытæ. Ӕрмæст уæ курæг дæн, цæмæй уарзат уæ Райгуырæн бæстæ, ирон адæмæн кад кæнат, Ирыстоныл размæ хæцат. Уæ зæрдыл хъуамæ дарат æдзух ахæм ныхæстæ – «хъысмæт – æз бузныг дæн дæуæй, дунемæ æз кæй фæзындтæн иронæй», – банысан кодта Челехсаты Хъазбег.
Ныхасы ма рацыдысты æмæ сывæллæттæн арфæйы ныхæстæ загътой Цхуырбаты Татьянæ, Зассеты Жаннæ æмæ æндæртæ. Гимназ «Альбион»-ы драмон къорд мадзалмæ æрбацæуджытæн равдыста хъæлдзæг инсценировкæтæ æмæ бахъæлдзæг кодтой залы бадджыты зæрдæтæ.
Джиоты Алыксандр
Comments are closed, but trackbacks and pingbacks are open.