«Зынаргъ редакци!» – номхуындæй, ахæм ныхæстæй райдайынц, газеткæсджытæ нæм цы фыстæджытæ æрбарвитынц, уыдон. Зынаргъ газеткæсджытæ, уæ фыстæджытæ сымахæн вæййынц алыгъуызон темæтыл фыст, вæййы дзы бузныджы, арфæйы фыстæджытæ, вæййы дзы, иу кæнæ иннæ фарсты фæдыл уе нæразыдзинад кæм равдисут, ахæмтæ дæр.
Ныр 95 азы дæргъы царды фæндагыл цæугæйæ, сымах махимæ стут хъыджы дæр æмæ цины дæр, уæ фыстæджыты æвдисут нæ республикæйæн йæ къухы цы æнтыстытæ æфты, уыдоны тыххæй, бирæ хатт нæм æрбарвитут, хъаст кæм фæкæнут, ахæм фыстæджытæ дæр. Кæй зæгъын æй хъæуы, уал азы дæргъы газеткæсджыты активондзинад уыд алыгъуызон, кæцы æнæмæнгæй дæр æндæвта нæ куыстыл. 95 азы дæргъы газеты коллективæн йæ къухы бирæ æнтыстытæ бафтыд, бирæ балæггад кодта нæ республикæйы æмбæстæгтæн. Мах сымахимæ иумæ рацыдыстæм уæззау фæндæгтыл гуырдзиаг-ирон ныхмæлæуды дæргъвæтин азты дæргъы. Æгæрыстæмæй-иу тыхджын æхстыты рæстæджы дæр газеты кусджытæ нæмгуыты бын æрбацы-дысты сæ куыстмæ æмæ та-иу дыккаг бон газеткæсджытæм фæхæццæ кодтой газеты ног номыр, уымæн æмæ хуссарирыстойнаг журналисттæн сæ хæцæнгарз уыд сæ фыссæн сис, уый руаджы мах дæр тох кодтам не знæгты ныхмæ æмæ уæ размæ нæ газеты фæрстыл хастам æцæгдзинад, алыгъуызон хабæрттæ. Газет ирдæй æвдыста гуырдзиæгты фыдракæндтæ арæх фыста æмæ ныр дæр фыссы, хъайтардзинад кæцы лæппутæ равдыстой æмæ сæ сæртæ сæ Ирыстоны сæрвæлтау нывондæн чи æрхастой, уыдоны тыххæй. Махæй алчи дæр, ам, Хуссар Ирыстоны чи уыд, уыдон иууылдæр зонынц, уыцы хъайтар лæппутæ се ‘взонг цард нывондæн кæй æрхастой ирон адæмы, ирон æвзаджы, сæ Райгуырæн бæстæйы сæрвæлтау.
Фæлæ ма бафæрсæм нæхи, махæй алчи дæр бамбæрста, уал азы дæргъы цæуыл тох кодтам, уыцы хъуыддаг? Мæнмæ афтæ кæсы, æмæ йæ алчи нæ бамбæрста, уымæн æмæ нæ республикæйы мадæлон æвзагыл уагъдцæуæг иунæг ирон газет «Хурзæрин» чи нæ рафыссы æмæ кæсы, уый цæй Ирыстоны патриот у. Мадæлон æвзаг кæй нæ хъæуы, уый у Хуыцауæй æлгъыст адæймаг, уымæн æмæ мадæлон æвзагыл зæрдæ сивын нысан кæны Фыдыбæстæ нæ уарзын. Нæ зæрдыл æрлæууын кæнæм ирон адæмы номдзыд лæг Колыты Аксойы ныхæстæ: «Нæ фæлтæртæ цæмæй хорз хъомыл кæной, цæмæй сæ мадæлон æвзаг уарзой, уый тыххæй хъæуы ахуыр æмæ размæдзыд бинонтæ…фыццаджы-фыццагдæр та – размæдзыд сылгоймаг-мад». О, алцы дæр сæйрагдæр мадæй цæуы, бинонтæй. Ирон æвзаджы фарн дæр саби бинонтæй хъуамæ банкъара. Хæдзары саби ирон ныхас куынæ хъуса, йæ ныййарджыты мадæлон æвзагыл газет кæсгæ куынæ уына, уæд уый дæр мадæлон æвзагæн нæ аргъ кæндзæн. Хъуамæ нæ рох ма уа, æвзагыл цас фылдæр дзурой, фыссой æмæ кæсой, уыйас фидардæр кæй кæны. Хъыгагæн, нæ республикæйы уагъдцæуæг газеттæй йæ тираж иууыл къаддæр у газет «Хурзæрин»-æн æмæ афтæ куы ахæсса бирæ рæстæджы, уæд нæ уый хорзмæ кæй не ‘ркæндзæн, уый алчи дæр хъуамæ æмбара.
Зынаргъ æмбæстæгтæ, мах абон иудадзыг дзурæм нæ мадæлон æвзаджы хъысмæтыл, архайæм, цæмæй фидæнхуыздæр кæна, уымæн æмæ уый у нæ адæмы культурон царды, нæ удварны сæйраг атрибуттæй иу. Æмæ ирон æвзагæн газет «Хурзæрин» цы бавæййаг у, уый та алчи дæр зоны æмæ йæ рафыссынмæ мачи хъуамæ зивæг кæна, уымæй дæр ын ис хъæздыг традицитæ. Советон Цæдисы иууыл рагондæр газетты æмбай у, бирæ ахъаз фæцис рухсад æмæ зонады интеллигенцийæн, æмткæй нæ национ культурæйы рæзтæн æмæ йыл аудын бæргæ хъæуы, фæлæ…
«Югосетпечать»-ы хистæр Саулохты Зоя йæ катайдзинад равдыста, абоны онг не ‘мбæстæгтæй газеттæ бынтон цъус цæрджытæ кæй рафыстой, уый тыххæй…
Æмæ та мæ зæрдыл æрлæууыд, цалдæр азы размæ Сæлбиты Алан ирон æвзаджы тыххæй йæ интервьютæй иуы куыд загъта, уый. Журналист æм фарста радта, зæгъгæ, цæмæн тæрсынц нæ ныййарджытæй би-рæтæ ирон æвзагæй, цы у йæ сæйрагдæр аххосаг? Сæлбийы фырты дзуапп уыд ахæм: «Ирон æвзаг цалынмæ æрвылбоны царды бахъæуа, цалынмæ бамбарæм, Ирыстоны цæргæйæ, мадæлон æвзаг куынæ зонай, уæд дæ никуыдæм дæр куыстмæ исдзысты, нæдæр – ахуырмæ, уæдмæ ницы рауайдзæнис нæ фыдæбæттæй. Мах дæр бакæнын хъæуы, тæтæр куыд кæнынц, афтæ. Уым тæтæйраг æвзаг куынæ зонай, уæд нæдæр аттестат райсдзынæ, нæдæр уæлдæр ахуырмæ бацæудзынæ. Уымæ гæсгæ сæ мадæлон æвзагæй гъæйттмардзæйæ пайда кæнынц. Цалынмæ махмæ, Ирыстоны дæр, ахæм вазыгджын цæстæй не ‘ркæсой ацы фарстмæ, уæдмæ хъуыддагæй ницы рауайдзæн». Тынг раст загъта Сæлбийы фырт, уымæн æмæ ирон адæмæй бирæтæ сæ мадæлон æвзагыл афтæ суæлæхох сты, æмæ сын цалынмæ закъоны хуызæн суа мадæлон æвзаг зонын, мадæлон æвзагыл периодикон мыхуыр кæсын, уæдмæ нæ фæчъил уыдзысты. Афтæ куынæ уа, уæд сомбоны нæ мадæлон æвзаджы хъысмæт бæлиццаг кæй нæ уыдзæн, ууыл дызæрдыг кæнын нæ хъæуы. Абон дæр Цæгат Ирыстон-Аланийы астæуккаг скъолаты ахуырдзаутæй иуæй-иутæ мадæлон æвзаг ахуыр кæнынц, фæсарæйнаг æвзаг куыд ахуыр кæнынц, афтæ.
Зынаргъ газеткæсджытæ, алы хатт дæр немæ ут, куы бахъæуа, уæд нæм уæ фидар уæхсчытæ дæр æрбадарут, фыссут нæм, дих кæнут немæ уæ цинтæ дæр æмæ уæ хъыгтæ дæр. Республикæ Хуссар Ирыстон махæн у нæ иумиаг Райгуырæн бæстæ, æрмæстдæр сымахимæ иумæ сараздзыстæм нæ республикæйæ æнтыстджын æмæ дидинæфтаугæ паддзахад.
Иу мæй ма баззад æмæ та нæ къæсæрыл æрбалæудзæн Ног 2020 аз. Зынаргъ æмбæстæгтæ, батыхсут бынæттон периодикон мыхуыры фæрæзтæ рафыссыныл. Газеткæсджытæн ма мæ зæгъын фæнды, бахатут, уæ хиуæттæй, уæ зонгæтæй ирон газет чи нæ рафыссы, уыдонмæ, цæмæй кад кæной æмæ кæсой ирон æвзагыл иунæг ирон газет «Хурзæрин»-æн. Кæд алцы дæр фæзынаргъ, уæддæр газет рафыссыны аргъ æрдæг азæн баззад 330 сомæй. Газетæн рафыссæн ис æрвылмæй дæр. Табуафси, æрбацæут «Югосетпечать»-мæ, кæнæ та газеттæ уæйгæнæн киосктæм æмæ рафыссут газет «Хурзæрин».
ДЖИОТЫ Екатеринæ
Comments are closed, but trackbacks and pingbacks are open.