Республикæ Хуссар Ирыстоны Президент Бибылты Анатоли йæхимæ райста паддзахадон ветеринарон æмæ фитосанитарон цæстдарды службæйы къухдариуæггæнæг Мæргъиты Аланы.
Фембæлды рæстæджы уынаффæ кодтой фарон октябры мæйæ йæ сырæзтæй фæстæмæ службæ цы куыст бакодта æмæ йæ разы æвæрд хæстæ куыд скъуыддзаг æрцыдысты, уый тыххæй.
«Цытджын Анатолий Ильяйы фырт, службæйы сырæзты бонæй фæстæмæ ды сæвæрдтай ахæм хæс, цæмæй «Растдон»-ы фыдызгъæлы продкуцийы Уæрæсейы Федерацимæ ласыны фарст скъуыддзаг æрцæуа. Дæ æхуыссы, афтæ ма уæрæсейаг коллегæты ахъазы фæрцы, ацы фарст скъуыддзаг æрцыд.
Ныртæккæ куыстуаты продукци иртæст цæуы Кæсæг-Балхъары. Ацы бонты æнхъæлмæ кæсæм фæстиуджытæм сертификаттæ райсыны тыххæй, кæцыйы бындурыл куыстуатæн уыдзæн Уæрæсейы территоримæ 10 хуызы бæрц продукци ласыны бар»,- фехъусын кодта Мæргъиты Алан.
Республикæйы цы халсартæ æмæ дыргътæ зайынц, уыдоны ласыны фарстыл дзургæйæ, Мæргъиты Алан банысан кодта, «Югосельхознадзор»-ы специалисттæ кæй кусынц хуссарирыстойнаг амалиуæгадтæй халсæрттæ æмæ дыргъы куыст чи кæны, уыдонимæ æмархайд кæныны тыххæй.
«Амалиуæггæнджытæ нæм куы бахатынц, уæд уый фæстæ службæйы специалисттæ уадзынц æнæмæнгхъæуæг мадзæлттæ иртасæнты, экспертизæйы æмæ æндæрты тыххæй. Кæд продукцийы гъæдмæ фау æрхæссæн нæ вæййы æмæ фитосанитарон домæнтæм гæсгæ у, уæд сæ аласынæн ницы ныхдур ис», – загъта Мæргъиты фырт.
Мæргъиты Алан ма фехъусын кодта, хъæууон хæдзарады министрады ветеринарийы управлени æмæ районы ветеринарон службæимæ иумæ уагъд кæй æрцыдысты профилактикон мадзæлттæ, цæмæй нæм хуыты африкæйаг емынæ ма фæзына.
«Ныртæккæ низы фæзынды ног цаутæ нæма бафиппайдæуыд. Профилактикон мадзæлттæ ма уагъд æрцæудзысты июлы æмæ сентябыры мæйы. Уыцы мадзæлтты фæстиуджыты фæстæ нæ службæйы специалисттæ ауадздзысты республикæйы территорийыл мониторинг.
Мониторингы æмæ цы басгæрстытæ ауагътам уыдоны фæстиуджытæ мах арвитдзыстæм «Россельхознадзормæ» æмæ нæ ныфс ис, хуыйы фыд æмæ кæцыдæр халсæрттæн ласыны бар ногæй лæвæрд кæй æрцæудзæн», – загъта Мæргъийы фырт.
Паддзахады сæргълæууæг йæ рады банысан кодта, ацы фадыджы куысты ахсджиагдзинад, кæцыйы ахадындзинадыл баст у хуссарирыстойнаг амалиуæггæнджыты уавæрыл. Уыдон сæмбæлынц Уæрæсейы Федерацийы территоримæ ласыны æмæ реализаци кæныны проблемæйыл.
«Мах хъуамæ æххæст кæнæм хæлцадон продуктты тыххæй цы домæнтæ ис, уыдон. Сымах хъуамæ дæттат инструкци æмæ æнæмæнгхъæуæг информаци домæнтæ æххæст кæныны тыххæй, кæцытæ нын дæтдзысты Уæрæсемæ продукци ласыны бар.
Низты фæзынды фарста фидар хъусдарды бын хъуамæ уа. Æз æй зонын сымах æнгом куыст кæй кæнут «Россельхознадзоримæ» æмæ мæ фæнды цæмæй уыцы куыст дарддæр дæр цæуа», – загъта Бибылты Анатоли.
Президент ма бацымыдис кодта «Югосельхознадзор»-ы куыст фæхуыздæр кæнынæн сæ исты ифтонгад хъæуы æви нæ.
Мæргъиты Алан банысан кодта, финансты Министрад кæй рахицæн кодта æхцайы фæрæзтæ, цæмæй «Югосельхознадзор»-ы лабораторитæ баххæст кæной ифтонгадæй.
«Мах ныртæккæ агурæм æнæмæнгхъæуæг ифтонгад кæмæй балхæнæм, ахæм фирмæ. Райдыдтам ветеринарон лабораторийæ. Уыцы фарстыл ма мах ныхас кодтам Кæcæг-Балхъары коллегæтимæ. Уыдонæн сæ лаборатори аккредитаци райста æмæ нын сæ фæлтæрддзинад ахсджиаг у. Сразыдзинадмæ гæсгæ, тагъд рæстæджы мах уырдæм ацæудзыстæм æмæ бынаты базонгæ уыдзыстæм сæ лабораториимæ, цæмæй куы æрцæуæм, уæд бæлвырд фæндæттимæ бахатæм Президентмæ æмæ Хицауадмæ», – загъта Мæргъиты Алан.
Comments are closed, but trackbacks and pingbacks are open.