Згъудеры уæлмæрды фæндæгтæ мæгуырау уавæры уыдысты æмæ зиæнтты рæстæджы адæм уæлдай зындзинæдтæ æвзæрстой. Уавæр нæ горæты цæрджытæй алчидæр зоны. Уый бахынцыдтой паддзахады разамонджытæ æмæ уæлмæрды фæндæгтæ сцалцæг кæныны куыстытæ бахæс чындæуыд «ЮгОсетСтройСервис»-æн. Уагдоны прорабтæ Лолаты Захар æмæ Хæбæлаты Алыксандр ацы куыстытæм æрæвнæлдтой 9-æм апрелы. Ныридæгæн уал фæндаг ныххафтой, ставд цъæлдурыл ныккалдтой æмæ асфальтмæ бацæттæ кодтой иу километр æмæ 250 метры дæргъæн фæндаг. Уымæй дарддæр ма, цæмæй асфальтмæ цъыф хаст ма цæуа, уый тыххæй дыууæсæдæ метрæй фылдæрыл та калд æрцæудзæнис цъæлдур. Ацы куыстыты æрвылбон дæр хайад фæисы техникæйы 15 иуæджы. Уыцы нымæцы уæзтæласæн машинæтæ, хуыр æмæ асфальтлæгъзгæнæн æмæ æвгæнæн трактортæ.
Куыстытæ цахæм темптæй цæуынц, æмæ сæ гъæд цахæм у, уый бабæрæг кæныны сæраппонд фæндаг аразджытæм 12 арелы бацыд Хуссар Ирыстоны Президент Гаглойты Алан. Уымæн фæндагаразджытæ ныфс бавæрдтой, цы куыстытæ сæххæст кæной, уыдонмæ кæй нæ уыдзæн фау æрхæссæн æмæ æххæст кæй æрцæудзысты афоныл, ома, æввахс бонты.
ГÆЗЗАТЫ Иван
