Уæрæсейы Президент Владимир Путины идейæтыл чи æууæнды æмæ сæ цардмæ чи хæссы, Украинæйы сæрмагонд æфсæддон операцийæн йæ райдайæнæй нырмæ активон æххуыс чи кæны, иумæйаг уæлахизмæ аккаг æвæрæн чи хæссы, республикæйы уыцы 25 цæрæджы, Адæмон фронты хъæппæрисæй, хорзæхджын æрцыдысты ног хæрзиуджытæй, «Команда Путина», зæгъгæ, стæй æхцайы премитæй. Уыдон сты дохтыртæ, журналисттæ, æхсæнадон архайджытæ, волонтертæ…
Путины фарсхæцджытæ бирæ сты, рæстуд адæм ыл æууæндынц æмæ дзы стыр ныфсытæ æвæрынц, фæлæ хæрзиуджыты аккаг систы хуыздæрты хуыздæртæ – республикæйы зындгонд адæймæгтæ: Æхсæнадон палатæйы сæрдар Нина Чиплакова, Социалон æххуысы центры директор Дзоблаты Альбинæ, журналисттæ Хъуысаты Тимур æмæ Мамсыраты Георги, меценат Битарты Алик, зарæггæнæг Хъæбæлоты Руслан æмæ æндæртæ. Ноджыдæр ма фынддæс адæймаджы фæбæрæг кодтой премитæй. Ацы адæймæгтæ ма активон æххуыс кæнынц, тагъд цы президентон æвзæрстытæ уыдзæн, уым дæр.
Кæстæртæ – нæ фидæн
Æнахъомты хъуыддæгты фæдыл ведомствоты ʻхсæн къамисы æмбырды архайдтой республикæйы æххæстгæнæг хицауады, барадхъахъхъæнæг æмæ цæстдарæг ведомствоты минæвæрттæ.
Ныхас цыд æнахъомты культурæйæн, æнæниздзинадæн, æдас цардæн фадæттæ аразыны, наркотиктæ, психотропон æмæ сæ карз нозтæй бахизыны фарстатыл. Æмбырды архайджыты ныхасмæ гæсгæ, уыцы куыстытæ алы районты дæр цæуынц. Пайда кæнынц нырыккон фæрæзтæй, тематикон тренингтæй, диспуттæй, сфæлдыстадон конкурстæй. Сывæллæтты хонынц зæрдæмæдзæугæ проекттæм, æнæниз царды уагыл сæ æфтауынц.
Æрæджы Ахуырад æмæ наукæйы министрад царды рауагъта проект «Балц ахуыргæнæгимæ, зондамонæгимæ, инспекторимæ», зæгъгæ. Республикæйы йæ кæнынц фыццаг аз. Сæйрагдæр у сывæллæтты алыхуызон тæссаг фæрæзтæй æнæниз цардыуагмæ раздахын. Уарзон фыдыбæстæм æмæ культурæмæ сын сæ хъуыдытæ, сæ фæндæттæ бафтауын. Ацы проекты фæлгæты, азы райдайæнæй скодтой цалдæр балцы: Цымытимæ, Фыййагдонмæ, Дзывгъисмæ, Дзинагъамæ… Ацы балцытæн ис стыр хъомыладон æмæ патриотон нысаниуæг. Кæстæр фæлтæрæн сæ зæрдæты гуыры сæ райгуырæн зæхмæ уарзондзинад, ахуыр кæнынц нæ истори, нæ традицитыл.
Æмбырды ма фæбæрæг кодтой ахсджиаг фæзилæнтæ. Сывæллæтты барты фæдыл бæрнон адæймæгтæ райстой амынддзинæдтæ.
Нæ уацх.
