Ног терминал аэропорт «Владикавказ»-ы

13-æм декабры цытджын æгъдауæй байгом аэропорт «Владикавказ»-ы ног терминал. УФ-йы президент Владимир Путин видеобастдзинадæй хайад райста цытджын мадзалы.

Аэровагзалы фæзындис ног дыууæуæладзыгон бæстыхай хуыздæр технологон бакуыстытимæ. Ныр аэропорты уадзæн хъомысад дыууæ хатты фылдæр у. Азы дæргъы дзы гæнæн ис спайда кæной 1,5 милуан адæймаджы. Цæгат Ирыстоны Сæргълæууæг Сергей Меняйло УФ-йы президентæн радзырдта транспортон инфраструктурæйы объектты, уыцы нымæцы курорт «Мамысон»-ы тъунелы тыххæй. Радзырдта йын аэрокомплексы дарддæры рæзты пълæнтты тыххæй дæр.

«Ис нæм дунеон рейстæ. Нæ аэропорт кусы æнæхъæн азы дæргъы. Бузныг дын зæгъæм Цæгат Кавказы республикæтæм ахасты тыххæй», — загъта Сергей Меняйло. УФ-йы Президент Владимир Путин: «Аэропорт „Владикавказ“ йæ хъомысадмæ гæсгæ Цæгат Кавказы Федералон зылды ахсы æртыккаг бынат бæлццæттæ ласынæй. Ис ын рæзты хорз перспективæтæ. Алцыдæр арæзт æрцыд тынг хорз». Сергей Меняйло радзырдта Владимир Путинæн нырыккон уадзæн пункт саразыны æнæмæнгхъæуындзинады тыххæй. Ацы нысæнттæн бахъæудзæн 500 милуан сомы бæрц.

Аэропорты ног терминалы бакондимæ республикæ фæхуыздæр кæндзæн туристон химæлвасдзинад. Сырæздзæн рейсты нымæц дæр. Авиабæлццæттæн сарæзтой комфортон бæрзонд домæнтæн дзуаппдæттæг уавæртæ,. Ног бæстыхайы ис 6 лифты, эскалатор, багаж дæттыны æдасдзинады системæтæ. Æнхъæлмæкæсæн залы ис 400 бынаты. Ис дзы регистрацийы цалдæр рудзынджы æмæ сæйраг та — телескопион трап, кæцыйы фæрцы бæлццæттæн сæ бон уыдзæн терминалæй комкоммæ хæдтæхæгмæ бахизы. Ног терминал арæзтой дыууæ азы æмæ фæ эксплуатацимæ радтой пъланмæ гæсгæ.

Фидæны райдайдзæн дыккаг рад. Аэровокзалы бафтдзысты реконструкцийы ноджы иу блок æмæ дунеон авиарейсты бæстыхай.