Октябры мæйы райдыдта сывæллæтты конкурс «Зарæг». Проект уадзы ГТРК «ИР»-ы студи «Аллонфильм». Бацæттæ йæ кодтой Мамиты Григори æмæ Бестауты Юля РХИ-йы Культурæйы министрады закъазæй.

Мамиты Григори куыд загъта, афтæмæй проекты нысан у рæзгæ фæлтæрæн радтын фæзуат æмæ æппæт уавæртæ сæ арæхстдзинад равдисынæн. Проекты фæлгæтты сывæллæттæ зарынц эстрадон, адæмон, героикон æмæ æндæр жанрты алыгъуызон темæтыл, сæхи фæндонмæ гæсгæ.

Проекты райдианы хайад райсыны куырдиæттæ æрбахастой 130-æй, рацыдысты кастинг æмæ афтæмæй проектмæ æрбахызтысты æрмæстдæр 36 сывæллоны. Æртæ хауæны хатдзæгæн жюрийы уæнгтæ, — курдиатджын зарæггæнджытæ, музыкалон аивад амонджытæ Харебаты Вадим, Гæджиты Жаннæ æмæ Гатыгкоты Нинæ равзæрстой хуыздæр зарæггæнджыты. Уыдон сты куыд горæт Цхинвалы, афтæ республикæйы районты скъолаты ахуыргæнинæгтæ; Гатыгкоты Линæ, Къæбулты Кристинæ, Биазырты Алинæ, Теблойты Камилæ, Хаситы Арсен æмæ Дзуццаты Тимур. Æрдæгфиналы азарыдысты æмæ равдыстой сæ цæттæдзинад.

Жюрийы уæнгтæ куыд банысан кодтой, афтæмæй проект «Зарæг»-ы фæлгæтты конкурсы хайадисджытæ сырæзтызты музыкалон аивады, артистизм æмæ вокалы фæдыздæхтыты æмæ сты, фидæны ныфс бавæрæн кæмæй ис, ахæм курдиатджын фæлтæр.

«Проект фадат радта сывæллæттæн, сæхи сæ уарзон аивады бафæлварынæн. Бакуыстой сæхиуыл æмæ, зæгъæн ис, райхæлдис, сæ миддунейы курдиат. Проект сын ссис сæхиуыл бакусынмæ фидар стимул», — загъта Гæджиты Жаннæ.

Зындгонд зарæггæнæг, композитор, жюрийы уæнг Харебаты Тимур та загъта: «Ис нæм бирæ курдиатджын фæсивæд, æмæ уыдонæн æнæмæнгæй хъæуы ахæм проекттæ аразын. Уый сæ разæнгард кæндзæнис аивады бæрзæндтæм тырнынмæ, суыдзæн сын стыр ахъаз æнтыстыты фæндæгтыл».

«Бирæ курдиатджын сывæллæттæ райстой хайад проекты, фæлæ ныртæккæ æрдæгфиналы чи ис, уыдон сты хуыздæрты хуыздæртæ. Сырæзтызты зарæджы фæдыздæхты æмæ сты æрдæгфиналы хайадисджытæ. Нæ рæзгæ фæлтæр уый аккаг сты, цæмæй семæ уагъд цæуа ахæм æнæмæнгхъæугæ куыстытæ. Проекты чи нал ис, уыдонимæ дæр хъæуы бакусын æмæ сын уæд уыдзæн фылдæр æнтыстытæ», — загъта жюрийы æртыккаг уæнг Гатыгкоты Нинæ.

Жюрийы хатдзæгтæм гæсгæ æрдæгфиналы хайадисджытæ се ’хсæз дæр ахызтысты финалмæ æмæ дарддæр хайад райсдзысты проекты.

«Зарæг»-ы финалон хай уагъд цæудзæн Паддзахадон драмон театры, 26-æм декабры изæры 21:00 сахатыл. Бахизæн уыдзæн æнæаргъæй.

Финалы уæлахиздзауы равзардзысты комкоммæ эфиры телекæсджытæ æмæ финалмæ æрбацæуджыты хъæлæсæппæрстæй.

Хуыгаты Миленæ