Рухс æрнымæг. Фыццаг артисты рахызт æмæ йæ фыццаг репликæимæ залы райхъуыстис театрдзауты худт  –  Хуссар Ирыстоны паддзахадон драмон театры райдыдта Саулохты Мухтары пьесæйыл арæзт  спектакль «Усгур Гаци».  4 октябры уыдис  официалон премьерæйы размæ «лæвæрд».

Театры аивадон къухдариуæггæнæг æмæ спектаклы режиссер Дзуццаты Тамерлан театрдзаутæн радзырдта: «91-æм театралон сезон гом кæнæм премьерæ «Усгур Гаци»-йæ. Спектакль æвæрд æрцыд Мухтары фырт, ирон кафты аивадмæ уæзгæ хуынтæ чи бахаста, уыцы Саулохты Мелсы рухс ном  арынæн .

Ацы спектакль Хуссар Ирыстоны Паддзахадон драмон театры сценæйыл æвæрд æрцыд цыппæрæм хатт. Фыццаг хатт Гацийы фæлгонц сценæмæкæсджыты размæ рахаста Гуыбиаты Георги, стæй та Цхуырбаты Барис, æртыккаг хатт Къадзты Филипп.  1986 азæй фæстæмæ æвдыст никуыуал æрцыд театры сценæйыл. Абон та Гацийы роль æххæст кæны Хуыгаты Дзамболат.

Банысанкæнинаг у уый, æмæ комедийы архайджыты фылдæр хай кæй сты  Мæскуыйы Щепкины номыл театралон ахуыргæнæндоны рауагъдонтæ-æмкурсонтæ Хуыгаты Дзамболат, Бибылты Сослан, Гаглойты Артур, Таугазты Дзерассæ, Дыгъуызты Жаннæ, Джиоты Беллæ, Пæррæстаты Дмитри, Козаты Ромик æмæ Елбачиты Рамаз. Афтæ ма комедийы хайад исынц Хаситы Сослан, Сагирова Миленæ æмæ Кокойты Нинæ. Адæмон сценæтæ æххæcт кæнынц  Паддзахадон университеты  актерон факультеты студенттæ. Ацы спектакль дæргъвæтин рæстæджы сценæйыл æвæрд кæй нал баййæфта, уымæ гæсгæ дзы зæгъæн ис æмæ сæ уд бавæрдтой, нывгæнæг Цхуырбаты Тамерлан, композитор Æлборты Ланæ, балетмейстер Чилæхсаты Георги, спектаклы зæлвидыцæй сфæлыста Саппиаты Зæлинæ, сценæйы архайджытæн дарæс равзæрста Сиукъаты Ларисæ. Театр у сабырдзинады бынат, стæй уый хъæздыг кæны адæймаджы миддуне. Кæд ныры дуг сау æмæ æнæмбаргæ у, уæддæр театры фæрцы адæймаг æрбайрох кæны дун-дунейы цаутæ, зæрдæ æмæ хъуыдыйæ ахицæн вæййы зындзинæдтæй.  Æхцондзинад райсы артистты дæсныйад, музыкæ æмæ  театралон атмосферæйæ.

Ивынц режиссертæ, артисттæ, театрдзаутæ, фæлæ нæ ивы пьесæйы худæг апп: у актуалон. Афтæ мæм кæсы мæнмæ.

Йæ сюжет, йæ персонажтæ ивгъуыд рæстæджы баззадысты æви иугæндзон цымыдисаг сты нырыккон фæлтæртæн дæр, уый алчидæр равзардзæн йæхицæн. 6-7 октябры театры дуæрттæ гом сты Цхинвалы  æмæ республикæйы театрдзаутæн.

БАГАТЫ Элинæ,

ХИПУ-йы  «Æппæтдунеон журналистикæйы» студент

Ацы æрмæджытæ дæр бакæс:

Цæстуарзон критикæ – спектаклты æнтыстæн, фæлæ  нæм иу театралон критик дæр нæй… МХАТЫ ФÆСТАГ ФЫРТ Default ThumbnailБАЙГОМ ЮБИЛЕЙОН ТЕАТРАЛОН СЕЗОН Номдзыд театралон нывгæнæг Радон гастролон балцы

Comments are closed, but trackbacks and pingbacks are open.