Нæ республикæмæ кусæгон балцы æрцыди уæрæсейаг инвесторты делегаци не ‘мзæххон Джуссойты Альберты сæргълæудæй.
Амалиуæггæнæг Джуссойты Альберт у «Стройпрогресс»-ы компаниты къорды президент. Делегацийы сконды ма уыд Хуссар Ирыстоны раздæры Хицауады Сæрдар æмæ ныртæккæ компаниты къорды Генералон директор Юри Морозов.
«Стройпрогресс»-ы компаниты къорд у егъау уæрæсейаг компани. Реализаци кæны сæудæджерадон æмæ æмбæстагон нысаниуæджы бирæ егъау проекттæ. Хуссар Ирыстонмæ сæ балцы нысан у, нефты гуырæнтæ сбæрæг кæнын, хæххон уавæрты амал кæныны сæудæджерады фадыджы потенциалæн саргъ кæнын æмæ хисæрмагонд комплекс саразыны фадæттæм æркæсын.
Уæрæсейаг инвесторты делегаци йæхимæ райста бæстæйы разамонæг Гаглойты Алан. Уый банысан кодта Джуссойты Альберты стыр æххуыс Хуссар Ирыстонæн. Уый æгæрон æххуыс кодта æмæ кæны йæ Райгуырæн бæстæйæн.
Бауынаффæ кодта, зæгъгæ, къорд инвестицион проектыл, кæцытæ иумæ реализаци кæндзыстæм. Бузныджы ныхæстæ загъта Юри Морозовæн, уымæн æмæ уый, Хуссар Ирыстонæн уæззау уавæрты разамынад кодта Хицауадæн æмæ æппæтдæр арæзта, цæмæй нæ республикæ размæ цыдаид. Уый нæ бæстæйы ног историйы ныууагъта хорз фæд.
Бæстæйы разамонæг куыд банысан кодта, уымæ гæсгæ нæ республикæйы размæцыдыл цы иузæрдион æмбæстæгтæ хъуыды кæнынц, архайынц, уыдон хъуамæ сæ райгуырæн бæстæйыл бæттæм, хъуамæ сын фадæттæ аразæм, цæмæй нæ адæмæн сæ царды уавæртæ хуыздæр кæной.
Не ‘мзæххон Джуссойты Альберт радзырдта Хуссар Ирыстонмæ сæ балцы нысаны тыххæй. Йæ компаниты къорд конд у вазыгджын профилон фадгуытæй – хæххон-æрзæтон сæудæджерад, нефтгуырæнтæ, банкон архайд, сæудæджерадон арæзтад, логистикæ æмæ афтæ дарддæр. Уæрæсейы Федерацийы 20 регионы архайынц йæ 48 компанийы. Инди, Китай æмæ Арабаг Эмиратты компанийæн ис партнертæ.
Альберты ныхæстæм гæсгæ, хъæздыг фæлтæрддзинад æмæ фадæттæй пайдагæнгæйæ уый фæнды йæ чысыл Райгуырæн бæстæйæн баххуыс кæнын.
«Компанийы директорты совет уынаффæ кодта ацы фарстытыл. Æз мæхæдæг ныхас кодтон Хицауады Сæрдар Джуссойты Константинимæ, базонгæ дæн профилон министртимæ. Æмæ уынын тынг хорз æнгом коллектив, æвзонг зондджын министрты», – дзырдта уый.
Куыд банысан кодта, уымæ гæсгæ компаниты къорд архайдта вазыгджын проекттыл, æмæ уыцы фæлтæрддзинадæй Хуссар Ирыстоны дæр хъæуы спайда кæнын. Уый тыххæй къухтæ фыст æрцæудзæн сæрмагонд сразыдзинадыл æмæ бакæнын хъæуы æмбæлон куыст, цæмæй геологон развæдсгæрсты куыстытæ бакæнынæны фæстиуæгæн бæрæг æрцæуа, Хуссар Ирыстоны нефты фæсауæрцтæ цас уыдзæн, уый.
«50-æм азты бæрæггæнæнтыл ныридæгæн кусы Нижневартовскы институт. Бæрæг у уый, æмæ 1954-æй 57-æм азмæ Цхинвалы районы Громы хъæуы кæй къахтой нефть, фæлæ уый фæстæ æхгæд æрцыд. Ныфс нæ ис, æмæ уыцы гуырæн нæ фесæфт. Уæд Хуссар Ирыстон йæхи ифтонг кæнит æртаг-сæрдæн æрмæджытæй», – дзырдта Джуссойты лæппу.
Йæ ныхæстæм гæсгæ, Дзуарыхъæу-Цхинвалы газуадзæн республикæйæн фадат дæтты электроэнергийы фæсауæрцтæ саразынæн. Уымæн æмæ, зæгъгæ, мах нæ нефты гуырæнты куы кусæм, уæд электроэнерги аразыны тыххæй пайда кæндзыстæм æрдзон газæй.
«Хуссар Ирыстоны æрвылаз дæр дыууæсæдæ милуан кубометр газæй пайдагонд не рцæуы. Уый у 50-70 мегаватты электроэнерги, æмæ йыл бакусын та æнцон у. Уымæ гæсгæ саразын хъæуы энергокомплекс 35-70 мегаваттæн æмæ Хуссар Ирыстонæн уыдзæн электроэнергийæ йæхи фæсауæрцон гуырæн.
Фабрикæтæ æмæ заводтæ арæзт куы цæуой ам, уæд сæ хъæуы сæхи хъомысад. Энергетикæ у тынг ахсджиаг æмæ республикæйæн ис тынг хорз перспективæтæ æрмæст йæхи сифтонг кæнынæн нæ, фæлæ ма электроэнерги уæй кæнынæн дæр», – дзырдта уый.
Уæрæсейаг инвестор хъусдард аздæхта Къуайсайы кæддæры нæргæ æрзæткъахæнтæм, уым, зæгъгæ, ис згъæр дурты фæсауæрцтæ æмæ Хуссар Ирыстонæн ис хæххон-æрзæткъахæн сæудæджерады иттæг хорз потенциал.
Бæрæг у уый дæр, æмæ Хуссар Ирыстонæн хорз фадæттæ кæй ис туризмы фадыджы рæзынæн. Альберты ныхæстæм гæсгæ, туризм бюджетæн хæссид егъау æфтиæгтæ. Уыимæ иумæ ма популяризаци кæнид нæ культурæ дæр.
Джуссойты лæппу куыд банысан кодта, уымæ гæсгæ цæттæ у бангон фадыджы æмгуыстадмæ, уымæн æмæ уыцы системæ тынг ахсджиаг у. Уый у экономикæйы сæйраг дадзин. Æнæ уымæй аразæн ницы ис. Алы уагдон дæр ифтонг хъуамæ цæуа банчы лæггæдтæй, æгæрыстæмæй, криптовалютæйæ фиддонтæй дæр.
«Мах уæ фарсмæ стæм æмæ цæттæ стæм кусынмæ æмæ æххуыс кæнынмæ, цæмæй иууыл уæззаудæр проекттæ царды биноныг кæнæм. Нырма уал дзырд цæуы фондз объектыл», – дзырдта уый.
Не ‘мзæххон куыд банысан кодта, афтæмæй йæ архайдæй хъуамæ æндæр инвестортæн хорз дæнцæг фенын кæна.
КЪÆБУЛТЫ Маринæ
