РХИ-йы Президент Гаглойты Алан кусæгон балцы ацыд Мæскуымæ æмæ хайад райста Республикæ Хуссар Ирыстон æмæ Уæрæсейы Федерацийы ‘хсæн социалон-экономикон рæзты фæдыл ХХI Æхсæнхицауадон къамисы рабадты.

Къамисы уæрæсейаг хайы сæрдар, Уæрæсейы Федерацийы Хицауады Сæрдары хæдивæг Александр Новак раарфæ кодта Президент Гаглойты Аланы сæргълæудæй хуссарирыстойнаг делегацийæн.

«Хуссар Ирыстон нæ стратегион цæдисон у. Йе ‘дасдзинад æмæ социалон-экономикон стабилондзинад дзуапп дæтты Уæрæсейы дæргъвæтинрæстæгон интерестæн, уыцы нымæцы ног геополитикон реалиты рæстæджы дæр. Уæрæсейаг-хуссарирыстойнаг ахастытæ рæстæгæй фæлвæрд æрцыдысты æмæ арæзт цæуынц цæдисад æмæ интеграцийы принциптыл.

Динамиконæй рæзынц  æх-хæстгæнæн æмæ закъондæттæг хицауиуæгады хаххыл политикон диалог, хъахъхъæнынады æмæ æддагполитикон фадыджы æмахастытæ. Уыдонæй дарддæр  сæрмагонд хæстон операцийы  солидарон стут Уæрæсеимæ æмæ хæцут йе ‘вварс», – загъта Александр Новак.

Банысан кодта дыууæ бæстæйы ‘хсæн базарадон-экономикон æмгуыстады æвæрццаг дина-микæ, радзырдта Æмцæдисад æмæ интеграцийы тыххæй УФ æмæ РХИ-йы ‘хсæн Æхсæнпаддзахадон бадзырды фæлгæтты химæрайсгæ хæсты æххæст кæнынмæ уæрæсейаг фарсы цæттæдзинады тыххæй.

«2022 азы Уæрæсе æмæ Хуссар Ирыстоны ‘хсæн товарæрзылд уыд 135,7 сомы аргъ, 2021 азимæ абаргæйæ фæфылдæр 4,2 проценты. Уæрæсейаг æххуысы фæрцы Хуссар Ирыстоны реализацигонд цæуынц социалон нысаниуæджы инфраструктурæйы объекттæ, уавæртæ арæзт цæуынц цæрджыты цардуаджы æмвæзад фæбæрзонддæр кæныны тыххæй, социалон-экономикон æмæ культурон-гуманитарон тыгъдады дарддæр рæзы  Уæрæсеимæ интеграци. Нæ зæрдæ дарæм хуссарирыстойнаг партнеры æнгæс ахастыл 2022-2025 азты РХИ-йы рæзты фæдыл Инвестпрограммæйы эффективон реализацийы тыххæй, таможнæйон æмæ хъалонты фадыджы интеграцион процессты фæдыл, уæрæсейаг финансон æххуыс хардз кæныныл карз контролы тыххæй», – загъта Новак.

Дыууæ паддзахады ‘хсæн дыууæварсон æмгуыстады рæзты ахсджиаг фактор Новак схуыдта Хуссар Ирыстоны инвестицион хæрзвадатдзинады æмвæзад фæбæрзонддæр кæнын.

«Уый мидæг ис Уæрæсейы регионтимæ базарадон-экономикон æмæ зонадон-техникон æмахастытæ рауæрæх кæныны ахсджиагдзинад, уыцы нымæцы иумæйаг проектты реализаци. Уыдон руаджы размæ цæуы республикæйы сæудæджерадон æмæ хъæууонхæдзарадон секторы экономикæ. Уый дзуапп дæтты дыууæ фарсы интерестæн дæр. Дарддæры æнтыстджын куыст ахъаз уыдзæн къухыбафтгæ æнтыстытæ ныффидар кæнынæн, импульс ратдзæн ног инициативæтæ æмæ бадзырдтæн. Нæ куыстæн уыдзæн стыр перспективæ, æрхæсдзæн хорз фæстиуджытæ», – загъта Александр Новак.

Гаглойты Алан арфæйы ныхæстæ загъта УФ-йы Хицауады Сæрдары хæдивæг Александр Новак, УФ-йы экономикон рæзты министры хæдивæг Дмитри Вольвач æмæ уæрæсейаг делегацийы иннæ уæнгтæн.

«Президенты статусы фыццаг хатт исын хайад Æхсæнхицауадон къамисы рабадты, къамисы уæрæсейаг хайы сæрдары бынаты дæуæн дæр ацы мадзал фыццаг у. Æхсæнхицауадон къамисы фæстаг рабадт уыд Цхинвалы цыппар азы размæ. Нæ уæрæсейаг коллегæтимæ нын ис æдзухон бастдзинад. Фæлæ уæддæр æз  Æхсæнхицауадон къамисы нымайын тынг ахсджиагыл, йе сконды дыууæ бæстæйы æппæт министрадтæ æмæ ведомствоты минæвæрттæ кæй ис æмæ нæ фæндæттæ æмæ алыгъуызон фарстатыл комкоммæ кæй уынаффæ кæнæм, уый тыххæй. Æз мæ хæсыл банымадтон Æхсæнхицауадон къамисы ацы рабадты хайад райсын», – загъта Гаглойты Алан.

Президент банысан кодта æппæт фарстаты тыххæй дæр æмæ фыццаджы-фыццаг социалон-экономикон фарстаты фæдыл æнгомдæр æмгуыст кæныны ахсджиагдзинады æнæмæнгхъæуындзинад.

«Кæд КОВИД-ы пандеми дæр æмæ Украинæйы сæрмагонд хæстон операци дæр тынг фæивтой Хуссар Ирыстоны æмæ Уæрæсейы æрвылбонон динамикæ, уæддæр æз фæндвидар дæн, нæ дыууæ паддзахады æппæт дунейæн кæй фенын кодтой сæ сæрмагонд, æнгом æмæ хъарм ахастытæ», – загъта Президент.

Уый банысан кодта, зæгъгæ, республикæйы къухдариуæгад ныридæгæн æрæвнæлдта социалон-экономикон мидисы алыгъуызон фарстатæ æнæэффективонæй скъуыддзаг кæныны ахастытæ ивынмæ æмæ бахахх кодта, зæгъгæ, иумæйаг æмæ æнтыстджын куысты фæстиуæг кæй разындзæн канд республикæйы масштабы нæ, фæлæ æппæт Кавказы регионы масштабы.

Александр Новак: «Хуссар Ирыстон æмæ Уæрæсейы Федерацийы ‘хсæн æнтыстджын куыст импульс ратдзæн ног инициативæтæ æмæ бадзырдтæн»

«Фæстаг азты дæргъы Хуссар Ирыстоны æндидзынгæнæн куыстæй экономикон рæзтмæ рахизыны процесс артикуляци кодта. Кæд нæ къухы стыр æнтыстытæ нæ бафтыд, уæддæр уыцы хæслæвæрд боны фæткæй ничи систа. Куыдфæндыйæ дæр æй мах хъуамæ сæххæст кæнæм 2025 азы онг Хуссар Ирыстоны социалон-экономикон рæзты программæйы фæлгæтты. Дзырд дæр ыл нæй, æнæ Уæрæсейы æххуысæй нæ бон нæ бауыдзæн нæ разылæууæг хæстæ аскъуыддзаг кæнын. Кæй зæгъын æй хъæуы, мах ныфс æвæрæм нæ уæрæсейаг хæлæртты æдзухон æххуысæй», – банысан кодта хуссарирыстойнаг паддзахады сæргълæууæг.

Уый бузныджы ныхæстæ загъта уæрæсейаг коллегæтæн, сæ конструктивон ахасты æмæ Хуссар Ирыстоны разылæууæг хæсты вазыгджындзинад кæй æмбарынц, уый тыххæй.

Рабадты фæстиуджыты тыххæй арæзт æрцыд суагъæ. Уæрæсейаг фарсæрдыгæй суагъæйыл йæ къух æрфыста Уæрæсейы Федерацийы Хицауады Сæрдары хæдивæг Александр Новак, хуссарирыстойнаг фарсы æрдыгæй та – Хуссар Ирыстоны Хицауады Сæрдар Джуссойты Константин.

Comments are closed, but trackbacks and pingbacks are open.