РХИ-йы Æнæниздзинад хъахъхъæнын æмæ социалон рæзты министр Наниты Сослан кусæгон балцы уыд Ленингоры поселочы, кæцыйы фæлгæтты фембæлд æхсæнады минæвæрттæ æмæ районы рынчындоны кусджытимæ. Ленингоры поселочы цæрджытимæ фембæлд уагъд æрцыд Культурæйы хæдзары районы администрацийы сæргълæууæг Гулиты Владимир æмæ Ленингоры районæй Парламенты депутат Дриаты Зазайы хайадистæй.
Министрмæ фарстытæ æрæмбырд бирæ, ныхас рауад æргом æмæ конструктивон. Республикæйы æнæниздзинад хъахъхъæныны системæйы, уыцы нымæцы районты дæлхæйтты дæр ис проблемæтæ, кæцытæ æмбырд кодтой бирæ азты дæргъы. Конкретонæй Ленингоры районæн ис йæхи спецификæ. Къуындæгпрофилон специалисттæ кæй нæй, уый у районты медицинон уагдæтты риссагдæр фарстытæй иу.
Æнæниздзинад хъахъхъæныны министр радзырдта февралы мæйы бынæттон рынчындонмæ æдзухон бындурыл кусынмæ кæй æрцæудзысты хирург æмæ анестезиолог-реаниматолог. Ахæм специалисттæ хъæуынц экстренон операцитæ саразынæн, рынчынæн республикæйы медицинон центрмæ ласæн куынæ уа, уæд. «Специалисттæ æрцæудзысты Уæрæсейæ, уыдон цæрдзысты æмæ кусдзысты Ленингоры. Районы рынчындонæн лæ-вæрд æрцæудзæн аппаратурæ лапроскопион операцитæ аразыны тыххæй», – загъта Наниты Сослан.
Поселочы цæрджытæ фарст радтой, педиатр сæм кæй нæй, уый тыххæй. Сæ ныхæстæм гæсгæ, чысыл, уæлдайдæр та дзидзидай сабитæ, республикон медицинон центрмæ дард фæндагыл зын ласæн сты. Æнæниздзинад хъахъхъæныны министрады сæргълæууæг ныфс бавæрдта ацы фарст аскъуыддзаг кæнынæй дæр. Йæ ныхæстæм гæсгæ, æввахс рæстæджы скусдзæн бынæттон рынчындоны рентгенкабинет.
Проблемæ, кæцы практиконæй тыхсын кодта поселочы æрæмбырдуæвæг цæрджыты – тагъд бæрзондтехнологон медицинон æххуыс æнæмæнгхъæуæг куы уа, ахæм цауты рæстæджы республикæйæн æддæмæ транспортировкæйы фадат, кæцыйæн алыхатт саразæн нæ вæййы республикон медицинон центры, æмæ йын гæнæн куы уа, уæд та рынчынæн йæ бон не суыдзæн æфцæгыл даргъ фæндагыл бафæразынын. Цæгат Ирыстоны медицинон центртæм ласыны тыххæй дзырд дæр нæ цæуы.
«Махæн сразы вæййынц республикæйæн æддæмæ ацæуыны тыххæй, фæлæ уый фæдыл бар райсыны процедурæ байсы дзæвгар рæстæг, бирæ дзы ис бюрократон ныхдуртæ, æмæ хатт алы сахат дæр гæнæн ис суа скъуыддзаггæнæн адæймаджы цард аирвæзын кæныны тыххæй», – загъта поселочы цæрджытæй иу.
Ацы фарст раразмæ кодта депутат Дриаты Заза дæр. Наниты Сослан сразы ахæм аргументтимæ æмæ ныфс бавæрдта маршруты механизм фæхуымæтæгдæр кæныны фарстыл бакусынæй. «Адæмы цард æмæ æнæниздзинад сты приоритетон. Уæззау, экстренон цауты, æгæрыстæмæй, астæуккаг уæззаудзинады динамикæимæ дæр тæссаг у æфцæгыл даргъ фæндагыл цæуынæн. Уынаффæтæ райсæн ис бынæттон дохтырты æмæ районы администрацийы æмвæзадыл, Æнæниздзинад хъахъхъæныны министрад æмæ республикон медицинон центры дохтыртимæ телефоны консультацитæ кæнгæйæ», – загъта Наниты Сослан.
Фембæлды фæстæ, поселочы къорд цæрæджы министрмæ бахатыдысты сæхи сæрмагонд проблемæты тыххæй, кæцытæ хаудтой уæрæсейаг медцентртæм сæ арвитынмæ. Фембæлды рæстæджы Парламенты депутат Дриаты Заза куыд фехъусын кодта, уымæ гæсгæ æнæниздзинад хъахъхъæныны министры хайадистæй уæрæсейаг медицинон центрты квалификацион медицинон æххуыс райсын сæ бон ссис районы бирæ цæрджытæн.
Районы цæрджыты медицинон лæггæдты гъæд фæбæрзонддæр кæныны тыххæй ныхас адарддæр кодтой Ленингоры районы рынчындоны сæйраг дохтыры хæстæ æххæстгæнæг Джиоты Моника æмæ медицинон уагдоны персоналимæ. Æруынаффæ кодтой кадрон фарстытыл, диагностикон аппаратурæйы куыстыл æмæ къорд æндæр проблемæтыл.
Поселочы цæрджытимæ фембæлды рæстæджы дæр æмæ рынчындоны меди-цинон персоналимæ дæр Наниты Сослан фехъусын кодта, зæгъгæ, районмæ ахæм балцтæ план кæнынц регулярон æмæ арæхдæр саразын.
ИА «Рес»
Comments are closed, but trackbacks and pingbacks are open.