Президент Гаглойты Алан, Хицауады уæнгтæ, йæ Сæрдар Джусойты Константины сæргълæудæй, «Стройпрогресс»-ы компаниты къорд йæ президент Джуссойты Альберты сæргълæудæй кусæгон балцы ацыдысты горæт Къуайсамæ. Ирон æгъдаумæ гæсгæ уазджытыл сæмбæлдысты Къуайсайы сæйраг фæзуаты. Уый фæстæ Президент Гаглойты Алан æмæ Джуссойты Альберт хайад райстой ирон литературæйы бындурæвæрæг Хетæгкаты Къостайы бюст æрбакæныны церемонийы. Къуайсайы администрацийы сæргълæууæг Хуыгаты Алан куыд загъта, афтæмæй ацы бюст горæт Къуайсайæн балæвар кодта Джуссойты Альберт. Уый фæстæ Къуыдаргомы цæрджытимæ цытджын уазджытæ сæ фембæлд адарддæр кодтой Культурæйы хæдзары.
Йæ ныхасы райдианы Гаглойты Алан æрдзырдта Хуссар Ирыстонæн ахсджиаг проекты реализацийы фæдыл. Уыдонæй сæ иууыл ахсджиагдæр, æвæццæгæн, нымад у Къуыдаргомы цæрджыты æрдзон газæй сифтонг кæнын, уымæн æмæ ацы къахдзæф бирæбæрцæй фæрогдæр кæндзæн Къуыдаргомы цæрджыты царды уавæр.
«Махæн нæ сæйраг хæс у, цæмæй нæ æмбæстæгты цардыуаг фæрогдæр кæнæм. Хуссар Ирыстоны къухдариуæгад тынг ахсджиагыл нымайын горæт Къуайсайы газификацийы проект среализаци кæнын, уымæ гæсгæ тагъд рæстæджы газификаци æрцæудзæн горæт Къуайса. Мах сымахимæ бирæ хæттыты фембæлдыстæм, æмæ-иу нæ сæйраг ныхас уыд иудзинад æмæ консолидацийы фæдыл. Абон мах стæм иу!» – банысан кодта бæстæйы сæргълæууæг. Уый фæстæ æрæмбырдуæвджытæн цыбыртæй æрдзырдта, Джуссойты Альбертимæ æмархайды бадзырдтыты процесс куыд цыд, ууыл, афтæ ма егъау нысаниуæг цы проекттæн ис, уыдоны реализаци кæныны хъуыддаджы уæрæсейаг инвесторты хайад райсыны фæндон.
2008-æм азы августы хæстон архайдтыты рæстæджы хъайтардзинад æмæ сгуыхтдзинад равдисыны тыххæй Гаглойты Алан «Уацамонгæ»-йы орденæй схорзæхджын кодта Къуайсайы цæрæг Теблойты Олегы. Орден «Уацамонгæ»-йæ йæ мæлæты фæстæ хорзæхджын æрцыд Хуыгаты Сослан.
Къуайсайы горæты цытджын æмбæстаджы ном лæвæрд æрцыд Хуссар Ирыстоны раздæры Хицауады Сæрдар Юрий Морозов æмæ Сохты хъæуæй рацæугæ, бархионты батальон «Алания»-йы командир Остъаты Русланæн (йæ фæсномыг «Скиф»). Цытджын æмбæстаджы паспорттæ сын рад-та Къуайсайы администрацийы сæргълæууæг Хуыгаты Алан.
Йе ‘мзæххонтæн Джуссойты Альберт, загъта: «Абон уе ‘хсæн кæй дæн, уый мын тынг æхсызгон у. Раст загъта Алан Эдуарды фырт, æхсæнады иууыл ахсджиагдæр хъуыддаг у иудзинад. Æрмæстдæр иудзинады фæрцы нæ бон бауыдзæн размæ цæуын. Фæстаг 20 азы дæргъы Хуссар Ирыстон бирæ зындзинæдтæ баййæфта, фæлæ рæстæг æрцыд, цæмæй нæ тыхтæ баиу кæнæм æмæ æппæт дæр саразын хъæуы, цæмæй нæ республикæ размæ цæуа алы фадыджы дæр». Уый ма егъау ныфсытæ йе ‘мзæххонтæн бавæрдта, арæх сæм кæй цæудзæн, æмæ йæ бон куыд уа, афтæ сæм йе ‘ххуысы къух кæй фæдардзæн æмæ сæ фарсмæ кæй уыдзæн, уый тыххæй.
Уый фæстæ Культурæйы хæдзары уыдис зынгæ зарæггæнæг Цæрикъати Феликс æмæ Галаты Барисы номыл кафт æмæ зарды паддзахадон ансамбль «Симд»- ы концерт.
ТАНДЕЛАТЫ Вилена
