Нæ республикæйы Æнæниздзинад хъахъхъæнын æмæ социалон рæзты министры хæдивæг Цоциты Аллæ, сæйраг инфекцион дохтыр Джиоты Элеонорæ æмæ нæ сывæллæтты рынчындоны поликлиникæйы хайады сæргълæууæг Хæныкъаты Ларисæйы хайадистæй «Спутник – Хуссар Ирыстон»-ы уагъд æрцыд брифинг. Мадзалы сæйраг темæ уыд нæ республикæйы ныртæккæ гриппы ныхмæ вакцинæ аразыны программæйы фæдыл æмæ цæмæй хицæн кæны грипп хуымæтæг уазалдзыдæй.
Министрады минæвæрттæ куыд фехъусын кодтой, афтæмæй 15 октябрæй суанг 30 ноябрмæ не республикæйы уагъд цæуы не ‘мбæстæгтæн гриппы ныхмæ вакцинæ аразыны программæ. Нæ республикæйы сæйраг инфекцион дохтыр Джиоты Элеонорæ куыд фехъусын кодта, афтæмæй æрвылаз дæр уазал рæстæджы гриппæй рынчынты нымæц фæфылдæр вæййы. Уымæ гæсгæ ахæм рæстæджы æмбæстæгтæ хъуамæ сæхи хизой гриппæй рынчын адæмæй, сæ къухтæ арæх æхсой, хъуамæ дарой хи хъахъхъæныны индивидуалон маскæтæ. Цæмæй грипп ма сытынг уа, уый тыххæй та нуазой гриппы ныхмæ хостæ, æмæ æнæмæнгæй хъуамæ вакцинæ арæзт æрцæуа.
«2006 азы йæ тыхы бацыд вакцинæ аразыны националон проект æмæ Уæрæсейы Федерацийы Æнæниздзинад хъахъхъæныны министрады æххуысæй ныр 12 азы бæрц 2,6 хатты фæфылдæр æмбæстæгтæн вакцинаци аразыны хъуыддаг, уымæ гæсгæ гриппы хуызтæй рынчынты нымæц фæкъаддæр. Кæй зæгъын æй хъæуы, вакцинæ куы саразай, уæддæр гæнæн ис æмæ адæймаг фæрынчын уа, фæлæ ахæм рынчынæн йæ адзæбæх кæнын æнцондæр уыдзæн. Кæд кæмæндæр йæ бон не ссис гриппы ныхмæ вакцинæ саразын, уæддæр гæнæн ис æмæ йæ сараза эпидемион сезоны рæстæджы дæр» – банысан кодта Джиоты Элеонорæ.
Брифинджы ма уый куыд фехъусын кодта, афтæмæй алы аз дæр гриппы вакцинæ ивд цæуы раздæры эпидемион сезонмæ абаргæйæ Æппæтдунеон æнæниздзинады организацийы ауадзгæ анализмæ гæсгæ.
«Кæй зæгъын æй хъæуы, тынг зын у аст мæ-йæ раздæр прогнозтæ аразын, фæлæ уымæ нæкæсгæйæ, æрвылаз дæр вакцинæты сконд ивынц дыууæ цыппар компонентон вакцинæйы, кæцыты сконды уыдзæн вакцинæ дыууæ штамм гриппы А(Н1-N1, Н3-N2) æмæ дыууæ штаммы та грипп Б ныхмæ. Нæ республикæйы Æнæниздзинад хъахъхъæныны министрад балхæдта тынг хорз уæрæсейаг вакцинæ, уымæн ис хорз фæстиуджытæ æмæ йæ адæймаг тынг æнцонтæй схæссы» – банысан кодта сæйраг инфекционист.
Уый æрсидт нæ республикæйы æмбæстæгтæм, цæмæй вакцинæтæ саразой гриппы ныхмæ. Кæд искæмæн зын у вакцинæ аразыны тыххæй поликлиникæмæ бацæуын, уæд нæ министрад æппæт уавæртæ дæр аразынц не ‘мбæстæгтæн, цæмæй сæм куысты бынатмæ цæуой æмæ уым вакцинаци аразой.
Цоциты Аллæ куыд фехъусын кодта, афтæ-мæй ныртæккæ æлхæд æрцыд уæрæсейаг компани «Микроген» Совигриппы ныхмæ вакцинæ.
«Нæ министрады мах аскъуыддзаг кодтам, цас нæ хъæуы вакцинæ балхæнын, уый. Уымæ гæсгæ балхæдтам 7 мины бæрц, уыдонæй 4 мины бæрц арæзт æрцыд. Фыццаджыдæр вакцинæ арæзт æрцæуы ахæм æмбæстæгтæн, йе ‘нæниздзинад лæмæгъ кæмæн вæййы. Æнæмæнгдæр хъуамæ вакцинæ саразой æнæниздзинады къабазы кусджытæ, ахуыргæнæндоны кусджытæ, транспорты фадыджы кусджытæ, æмæ хистæр кары адæймæгтæ, уымæн æмæ сæ кармæ гæсгæ уыдонæн тæссагдæр у гриппæй фæрынчынæй. Æнæмæнг хъуыддагыл нымайæм, цæмæй нæ республикæйы сывæллæттæн рæстæгыл арæзт æрцæуа гриппы ныхмæ вакцинæ, уымæн æмæ уыдонæн сæ иммунон системæ тынг лæмæгъ вæййы. Рох кæнын нæ хъæуы уый дæр æмæ нæ республикæйы кæй уæвынад кæны закъон «Инфекцион низты иммунон профилактикæ»-йы тыххæй, кæцы фидар кæны паддзахадон политикæйы барадон бындуртæ инфекцион низты иммунопрофилактикон фадыджы, сæйраджыдæр хъахъхъæд цæуы нæ республикæйы æмбæстæгты æнæниздзинад æмæ санитарон-эпидемиологон ифтонгад. Нæ республикæйы æмбæстæгтæ хъуамæ æмбарой, æнæниздзинадмæ хъусдарын кæй хъæуы, уый. Саразын хъæуы æнæмæнг коллективон иммунитет. 80 проценты бæрц вакцинаци цы коллективы арæзт æрцыд, уым гриппæй фæрынчын тæссагдзинад къаддæр у. Афтæ ма куыстуаты хистæрæн йæ бон у, кусæг гриппæй рынчын куы уа, уæд æй йæ куыстæй рæстæгмæ ссæрибар кæна. Афтæ не скъолаты æмæ сывæллæтты рæвдауæндæтты дæр. Гриппæй рынчынтæ рæстæгмæ уагъд ма хъуамæ цæуой ахуырадон уагдæттæм. Уый хъуамæ æмбарой, фыццаджыдæр, хъомылгæнджытæ, стæй – ахуыргæнджытæ æмæ организациты сæргълæуджытæ»- банысан кодта Цоциты Аллæ.
Нæ республикæйы сывæллæтты рынчындоны поликлиникæйы хайады сæйраг дохтыр Хæныкъаты Ларисæ куыд загъта, афтæмæй æрвыл аз дæр гриппы ныхмæ вакцинæ аразынц æрмæстдæр иуæй-иутæ.
«Æрвыл аз дæр сæ сывæллæттæн гриппы ныхмæ вакцинæ аразын кæнынц æрмæстдæр иуæй-иу ныййарджытæ, иннæтæ та равдисынц æнæразыдзинад. Вакцинæ хъахъхъæны гриппы хуызтæй адæймаджы. Æмæ уый хъуамæ æмбара алкæцы ныййарæг дæр» – банысан кодта Хæныкъаты Ларисæ.
Уый æрсидт ныййарджытæм, цæмæй серьезон ахаст равдисой ацы хъуыддагмæ.
Нæ уацх.
Comments are closed, but trackbacks and pingbacks are open.