Инциденттæ ма æруадзын æмæ сæм хъусдард здахыны фæдыл механизмты фæлгæтты техникон фембæлдтыты ныр фæндзæм хатт дзырд цæуы иу фарстыл – Цънелисы цур гуырдзиаг блокпост сисыныл. Хуссарирыстойнаг æмæ гуырдзиаг фæрстæ, афтæ дунеон организациты минæвæртты хайадистæй та радон техникон фембæлд не ‘рхаста бæрæг фæстиуджытæ.
Механизмты фæлгæтты хуссарирыстойнаг делегацийы сæргълæууæг, Фæсконфликтон фарстатæ бæстон кæныны фæдыл Президенты æххæстбарджын минæвары хæдивæг Коцты Егор информацион фæрæзтæн куыд радзырдта, уымæ гæсгæ Хуссар Ирыстоны Знауыры районы Цънелисы хъæуы гуырдзиаг полициæгтæ цы æнæзакъонон пост сæвæрдтой, уыцы фарсты фæдыл уынаффæ цæудзæн Женевæйы дискусситы фæлгæтты. Куыд банысан кодта, уымæ гæсгæ активонæй дзырд цыд ацы сæвзæргæ уавæр æрбæстон кæныныл, йæ раздæры уагмæ йæ æркæныныл. Хуссарирыстойнаг фарс радон хатт фехъусын кодта, зæгъгæ, Хуссар Ирыстоны территорийыл æндæр бæстæйы полициæгты уæвынадæн гæнæн нæй, уымæн æмæ уый у тæссагдзинады сæйраг æууæл æмæ ноджыдæр домынц, цæмæй уыдон ацæуой уыцы бынатæй. Фæлæ ацы здæхты серьезон къахдзæфтæ арæзт нæма æрцыд.
Гуырдзиаг фарс ацы фарсты фæдыл банысан кодта, зæгъгæ, уыцы бынаты сты хуссарирыстойнаг тыхон структурæтæ дæр: «Уый тыххæй та сын ахæм дзуапп скодтам – уыцы структурæты кусджытæ уыцы районы сты æрмæстдæр иу нысанæн – цæрджыты æмæ республикæйы бахъахъхъæныны нысанæн», – банысан кодта Егор.
Коцты Егоры ныхæстæм гæсгæ, ацы ахсджиаг фарстыл Женевæйы дискусситы фæлгæтты дзырд цæудзæн, æмæ уый фæстæ бæлвырд æрцæудзæн, ме-ханизмты фæлгæтты радон техникон фембæлд ауадзыны.
Коцты Егор ма куыд банысан кодта, уымæ гæсгæ цалынмæ гуырдзиаг блокпост Хуссар Ирыстоны территорийыл ис, уæдмæ иунæг фарстыл дæр дзырд нал цæудзæн механизмты фæлгæтты.
Comments are closed, but trackbacks and pingbacks are open.