А-фæстаг бонты соцхызæджы апарахат, 27 сентябры Цхинвалы ахæстоны ахæсттæ æнæнхъæлæджы æххормагдзинад кæй расидтысты, уый тыххæй дам-думтæ, ома, дам, ахæсттæ æххормагдзинад расидтысты, æвзæр уавæрты кæй сты, æмбæлон хæринаг сын кæй нæ хæрын кæнынц æмæ се ‘хсæн рæуджыты низæй рынчын кæй ис, уыдæтты тыххæй.
Ацы цауы сæраппонд Хуссар Ирыстоны Юстицийы министр Лалыты Зæлинæ куыд радзырдта, афтæмæй иунæг ахæст дæр, йæ уавæртæй райгонд кæй нæу æмæ æххормагдзинад расидынмæ кæй хъавы, уый тыххæй развæлгъау фыстæй нæ фехъусын кодта ахæстоны администрацийæн.
Министр радзырдта, афæдз æмæ æрдæджы размæ республикæйы пенитенциарон системæйы реформæйы ауагъды тыххæй, кæцыйы фæстиуæгæн Цхинвалы ахæстоны уавæртæ максималонæй æрбаввахс сты, Хуссар Ирыстоны къухдариуæгад кæмæй пайда кæны, Уæрæсейы Федерацийы уыцы Уголовон кодексы домæнтæм.
Лалыты Зæлинæйы ныхæстæм гæсгæ, реформæ ацыд æнтыст-джынæй.
Ахæстоны бæстыхай капиталонæй цалцæг æрцыд. Кæд раздæр ахæсттæ иууылдæр иумæ уыдысты, уæд ныр иумиаг æмæ карз режимы ахæсттæ сты хицæн секторты. Сылгоймаг ахæсттæн дæр æмæ барадхъахъхъæнæг органты раздæры кусджытæй ахст чи у, уыдонæн дæр ис хицæн сектортæ. Ахæстоны уавæртæ æвзæр кæй не сты, уый бæрæг у уымæй дæр, æмæ ног цалцæггонд хæрæндоны ахæсттæ бон æртæ хатты хæрынц гъæдджын хæринæгтæ, æгæрыстæмæй камерæты ис телевизортæ дæр. Ис сын медицинон æххуыс дæр, ахæсттæй исчи куы фæрынчын вæййы, уæд ын хос кæнынц амбулаторон æгъдауæй, куы бахъæуа, уæд та йæ схуыссын кæнынц республикон рынчындоны æмæ йын уым алыварсон æххуыс кæнынц, бахъуыды рæстæджы йын саразынц операци дæр.
Реформæйы размæ, тæрхон-гæнæджы тæрхонмæ нæ кæс-гæйæ, æппæт категорийы ахæсттæ дæр уыдысты æмхуызон уавæрты.
«Кæд раздæр ахæстты бартæ хæлд цыдысты, уæд ныр каме-рæтæ ифтонг сты стандарттæм гæсгæ», – банысан кодта министр.
Ахæстты æххормагдзинад расидыны тыххæй та Юстицийы министрады сæргълæууæг бамбарын кодта, зæгъгæ, уый тыххæй дзурын хъæуы, ахæстоны уæвæг фыстæй куы фехъусын кæна, æххормагдзинад расидын кæй фæнд кæны, æрмæстдæр уæд.
«Ныры цау та у ахæстоны мидæггагон фæткы фехæлд», – загъта Лалыты Зæлинæ.
Рарастгæнæн колонийы управленийы кусæг Джиоты Сослан, кæцы колонийы территорийыл хъахъхъæны адæймджы бартæ, банысан кодта, зæгъгæ, рарастгæнæн колонийы куысты фæтк кæй æххæст кæнынц, ома, ахæсттæм æрбацæуджытæ æмæ сæм æддæрдыгæй цы хуынтæ цыд, уыдоны нымæц кæй фæкъаддæр кодтой, уый нæ фæцыд ахæстоны уæвджыты зæрдæмæ.
Ахæстоны хистæр Гуыцмæзты Лев куыд радзырдта, афтæмæй æнæштатон уавæры аххосаг уыд, ахæстоны хæринаг аразæг ахæстоны территори æфснайгæ кæй федтой, уый. Ахæстты хъуыдымæ гæсгæ, хæринагаразæг хъуамæ архайа æрмæстдæр къæбицы.
Ацы факты тыххæй Лалыты Зæлинæ бамбарын кодта, зæгъгæ, ныртæккæ хæри-нагаразæг йæ куыстæй рæстæгмæ иуварс æрцыд, цалынмæ рабæрæг уа, санитарон нормæтæ фехæлдта æви нæ, уæдмæ.
«Кæд санитарон нормæтæ фехæлдта, уæд йæ ныхмæ ист æрцæудзысты закъонон мадзæлттæ, суанг æй йæ банытæй сисыны онг», – банысан кодта министр.
Уый фæстиуæгæн Юстицийы министр ахæстоны къухдариуæгадæн æмæ Юстицийы министрады сæрмагонд æдасдзинады хайадæн бахæс кодта мидæггагон фæдæвзарæн куыст бакæнын.
Ахæсттимæ иумæ рæуджыты низæй рынчыны тыххæй рарастгæнæн колонийы дохтыр Абайты Азæ журналисттæн фенын кодта ахæстты æнæниздзинады тыххæй рентгены нывтæ, амбулаторон журналтæ, цыран фыст уыдысты се ‘нæниздзинады тыххæй ахæстты æппæт домæнтæ æмæ дохтырты хатдзæгтæ.
Дохтыр куыд радзырдта, афтæмæй бон дыууæ хатты басгарынц ахæсттæн се ‘ппæты дæр, ахæсттæй иу дæр нæ баззайы æнæ медицинон æххуысæй.
Бæрæг куыд у, афтæмæй ныртæккæ ахæстоны ис 56 адæймаджы, уыдонæй 38 – тæрхондоны тæрхонмæ гæсгæ æмæ 18 та – зæрдæхсайгæтæ.
Comments are closed, but trackbacks and pingbacks are open.