Знон уыд Хицауады рабадт премьер-министр Джуссойты Константины сæрдариуæгадæй. Боны фæткы уыд 18 фарстайы, 5 фарст та – уæлæмхас.
Мидхъуыддæгты министр Гуыцмæзты Аланы доклад уыд «Транспортон фæрæзты хицæутты æмбæстагон бæрндзинады æнæмæнгхъæуæг фæдзæхстады тыххæй закъон æруромыны тыххæй» закъоны проекты фæдыл.
Докладгæнæг бамбарын кодта, зæгъгæ, уыцы закъон æруромын хъæуы, ныртæккæ Хуссар Ирыстоны машинæты хицæутты фæдзæхстады тыххæй техикон фæрæзтæ кæй нæй, уый тыххæй. Йæ ныхæстæм гæсгæ, ацы закъон йæ тыхы уыдзæн, республикæйы цалынмæ автофæдзæхстады тыххæй кусæг организаци фæзына, уæдмæ.
Закъоны проектыл сразы сты Хицауады уæнгтæ иууылдæр.
Хæлцæй цы ведомствотæ ифтонг цæуынц, уыдоны номхыгъдмæ РХИ-йы Таможнæйон комитеты кусджыты бахæссыны тыххæй уынаффæйы проекты фæдыл доклад сарæзта РХИ-йы Хицауады Сæрдары хæдивæг – финансты министр Тадтаты Дзамболат.
Куыд бамбарын кодта, афтæмæй ис ахæм ведомствотæ, кæцытæ ифтонг цæуынц хæлцæй, таможнæйы кусджытау сменæгай кæй кусынц, уый тыххæй, æмæ, зæгъгæ, уыдоны номхыгъдмæ бахæссын хъæуы таможнæйы кусджыты дæр.
«Кæд Таможнæйон комитеты кусджытæ сменæты куыстой, уæддæр ныры онг хæлцæй ифтонг нæ цыдысты. Уый тыххæй фæндон хæссын, цæмæй ацы ведомство дæр хаст æрцæуа, хæлцæй ифтонг чи цæуы, уыдоны номхыгъдмæ», – бамбарын кодта Тадтаты Дзамболат.
Министрты кабинет закъоны проекты райстой æмхъæлæсæй.
Республикæ Хуссар Ирыстоны «Хъахъхъæнынады министрады æфсæддонтæн æмæ æмбæстагон персоналæн куыстмыздтæ снысан кæныны тыххæй» Хицауады уынаффæмæ ивындзинæдтæ бахæссыны тыххæй доклад сарæзта Хъахъхъæнынады министры хæстæ рæстæгмæ æххæстгæнæг Сабанты Инал.
Банысан кодта, зæгъгæ, ивындзинæдтæ бахæссын хъæуы, Хуссар Ирыстоны Хъахъхъæнынады æфсæддонтæн сæ мыздтæ æмæ æндæр социалон бафыстытæ этапгай фылдæр кæныны фæдыл хæрдзты æмфинанскæнынады тыххæй Республикæ Хуссар Ирыстон æмæ Уæрæсейы Федерацийы хицауадты ‘хсæн сразыдзинадмæ гæсгæ.
Куыд бамбарын кодта, афтæмæй сразыдзинад реа-лизаци куы æрцæуа, уæд РХИ-йы Хъахъхъæнынады министрады æфсæддонты æмæ æмбæстагон персоналы мыздты æмвæзад фæфылдæр уыдзæн.
Хицауады уæнгтæ сразы сты ацы закъоны проектыл.
Сабанты Инал ма уынаффæмæ рахаста РХИ-йы Хъахъхъæнынады министрады æфсæддонты куыстмыздты, æфсæддон чинмæ гæсгæ куыстмыздты, æрсидтмæ гæсгæ службæгæнджытæн куысты бынатмæ гæсгæ æфсæддон куыстмыздтæ снысан кæныны тыххæй закъоны проекттæ дæр.
Министрты кабинет хъæлæсæппæрсты фæстиуæгæн сразы ацы закъоны проекттыл.
Хицауады уæнгтæ райстой æндæр закъæтты проекттæ дæр.
ОСИАТЫ Индирæ
