Ведомствойы сæргълæууæджы бардзырдмæ гæсгæ, милицийы æхсæнадон æдасдзинады хистæры хæдивæгæй нысан æрцыд милицийы дæлбулкъон Гæззаты Витали Таймуразы фырт, кæцы ныры онг службæ кодта горæты милицийы хайады.
Гæззаты Витали райгуырд Цхинвалы 1975 азы 2 августы. 1992 азы 17-аздзыд лæппуйæ бацыд ОМОН-ы рæнхъытæм æмæ дзы алыгъуызон бынæтты фæкуысты суанг 2007 азы онг. 2020 азы нысан æрцыд Фæндагон-постон службæйы батальоны командиры хæдивæгæй. 2021 азы йæ рахизын кодтой горæт Цхинвалы милицийы хайадмæ æхсæнадон æдасдзинады хистæрæй æмæ дзы баслужбæ кодта ныры онг. Ис йын паддзахадон æмæ ведомствойон хорзæхтæ.
Паддзахадон унитарон куыстуат «Ирбис»-æн дæр снысан кодтой ног директоры – мидхъуыддæгты министры приказмæ гæсгæ се ‘ууæнк бафтыдтой Къæбысты Николай Ефимы фыртыл.
Къæбысты Николай райгуырд Дзауы районы Сыхты хъæуы 1963 азы. 1992 азы службæ райдыдта ОМОН-ы рæнхъыты æмæ фæлтæрд хæстоныл нымад кæй уыд, уымæ гæсгæ дзы бæрнон бынæтты баслужбæ кодта суанг 2006 азы онг. 2006 азæй 2010 азмæ службæ хаста Юстицийы министрады. 2010 азы йæ фæстæмæ ракодтой мидхъуыддæгты министрадмæ æмæ йæ снысан кодтой Знауыры районы милицийы хайады хистæры хæдивæгæй. 2016 азы йын пенсийы ацæуыны афон кæй æрхæццæ, уый тыххæй йæ ссæрибар кодтой милицийы рæнхъытæй.
Къæбысты лæппу бирæ азты дæргъы егъау хайбавæрд кæй хаста нæ республикæйы æдасдзинад æмæ фæткæвæрдмæ, уый фæдыл ын радтой «Республикæ Хуссар Ирыстоны барадхъахъхъæнæг органты аккаг кусæг»-ы кадджын ном. Уымæй уæлдай ма хорзæхджын æрцыд æндæр паддзахадон æмæ ведомствойон хорзæхтæй дæр.
ДЖИОТЫ Алыксандр
