22 январæй 29 январмæ Хуссар Ирыстоны территорийыл ӕрцыд иу фыдракæнд ӕмӕ раргом ис. Наркотикон буарадтӕй ӕнӕзакъонӕй спайда кӕныны тыххӕй урӕд ӕрцыдысты цалдӕр ӕмбӕстаджы. Республикӕйы фӕндӕгтыл ӕрцыд ӕртӕ фӕндагон-транспортон цауы. Авариты фӕстиуӕгӕн иу адӕймаг рынчындонмӕ бахаудта.
Алыгъуызон бархалыны фӕдыл бӕрндзинадмӕ ӕркодтой фондз адӕймаджы, цыппар дзы разындысты ӕнӕххӕст кары сывӕллӕттӕ.
Фæндагон змæлды æдасдзинады инспекци дыууæ къуырийы дæргъы сбæлвырд кодта 202 фæткхалæн цауы. Уыдонæй 10 шофыры разындысты нозтджынтӕ кӕнӕ та уыдысты наркотикты ӕндӕвдады бын.
Ӕрӕджы горæт Цхинвалы рынчындонмæ алыгъуызон цæфтимæ бахаудта 18-аздзыд горæттаг цæрæг. Куыд рабæрæг, афтæмæй йæ фыднад фæкодтой нæ горæты 32 æмæ 27-аздзыд цæрджытæ. Фыдгæнджытæ ахст æрцыдысты. Басгæрсты рæстæджы 32-аздзыд фыдгæнæджы дзыппы ссардтой марихуанайы ссадæг æмæ ма психотропон медицинон препараттæ ӕмӕ йӕ тӕрхондон фӕивар кодта 220 мин сомы.
Милицийы экономикон фыдракӕндтӕ ма ӕруадзыны фӕдыл управленийы кусджытӕ рейдон мадзӕлтты рӕстӕджы горӕт Цхинвалы дыууӕ дуканийы баййӕфтой карз нозтытӕ ӕмӕ тамакотӕ уӕййаг, кӕцытӕн нӕ уыд ӕмбӕлон гӕххӕттытӕ. Контрабандон товар сконфискаци кодтой ӕмӕ дуканиты хицӕуттыл административон суагъӕтӕ бакодтой.
25 январы милицимӕ хъаст балæвæрдта горӕттаг 28-аздзыд цӕрӕг, зӕгъгӕ мын 24 январы изӕры мӕ кӕртӕй адавтой мӕ автомашинӕ «ВАЗ-2107». Куыд рабӕрӕг, афтӕмӕй къӕрных разынд нӕ горӕты 23-аздзыд цӕрӕг. Давд автомашинӕйыл ацыд Дзауы районы ‘рдӕм ӕмӕ йӕ Гуфтайы хъӕумӕ ‘ввахс афӕлдӕхта. Шофыр ӕмӕ йӕ бӕлццон, 28-аздзыд горӕттаг цӕрӕг, алыгъуызон цӕфтимӕ бахаудтой рынчындонмӕ. Машинӕйы хицауӕн разиан кодтой 100 мин сомы. Ацы цауы фӕдыл слестгӕнӕн органтӕ бакодтой уголовон хъуыддаг.
24 январы милицимӕ хъаст бадӕтта 31-аздзыд горӕттаг цӕрӕг, зӕгъгӕ мын мӕ дыууӕаздзыд лӕппуйы ӕнӕфӕрсгӕйӕ акодта йӕ фыд, бынӕттон 41-аздзыд цӕрӕг, кӕцыимӕ иумӕ нӕ цӕрынц, ӕмӕ сӕ ныр ницы бӕрӕг ис. Куыд рабӕрӕг, афтӕмӕй фыдӕн йӕ телефон уыд хицӕн. Милицийы кусджытӕ ӕвӕстиатӕй райдыдтой агурын сывӕллоны. 28 январы изӕры сывӕллоны бакодтой йӕ мадмӕ, йӕ цардӕн тас ницӕмӕй у.
Цхинвалы районы милицийы управленийы кусджытӕ баурӕдтой Къостайыхъӕуы 41 ӕмӕ 35-аздзыд цӕрджыты, кӕцытӕ спайда кодтой марихуанайӕ. Дзауы районы милицийы управленийы кусджытӕн та сӕ зӕрдӕ фехсайдта 23-аздзыд горӕттаг цӕрӕгмӕ наркотиктӕй спайда кӕнынмӕ, фӕлӕ фӕткхалӕг медицинон басгӕрстмӕ нӕ бакуымдта. Фӕткхалджыты тӕрхондон фӕивар кодта.
