8 январæй 15 январмæ Хуссар Ирыстоны территорийыл ӕрцыд дыууӕ фыдракæнды ӕмӕ раргом сты. Наркотикон буарадтӕй ӕнӕзакъонӕй спайда кӕныны тыххӕй урӕд ӕрцыдысты цалдӕр ӕмбӕстаджы. Уымӕй уӕлдай ма республикӕйы фӕндӕгтыл ӕрцыд ӕртӕ фӕндагон-транспортон цауы. Авариты фӕстиуӕгӕн рынчындонмӕ алыгъуызон цӕфтимӕ бахаудтой дыууӕ адӕймаджы.
Алыгъуызон бархалыны фӕдыл горӕты милицийы управленийы кусджытӕ бӕрндзинадмӕ ӕркодтой цыппар адӕймаджы.
Фæндагон змæлды æдасдзинады инспекци дыууæ къуырийы дæргъы сбæлвырд кодта 268 фæткхалæн цауы. Уыдонæй фондз шофыры разындысты нозтджынтӕ кӕнӕ та уыдысты наркотикты ӕндӕвдады бын.
Экономикон фыдракӕндтӕ ма ӕруадзыны фӕдыл милицийы управленийы кусджытӕ сбæрæг кодтой, Ленингоры районы 69 æмæ 63-аздзыд цæрджытæ уыцы иурæстæджы пенси кæй истой Уæрæсейы дæр æмæ нæ республикæйы дæр. Æрмæст Хуссар Ирыстоны бюджетæн æдæппæт разиан кодтой 900 мин сомы бæрц. Фæлывд миты фæдыл æрмæджытæ æрвыст æрцыдысты Генералон прокуратурæмæ.
8 январы рынчындонмæ уæззау уавæры бахаудта Цхин-валы районы Къостайыхъæуы 40-аздзыд цæрæг. Куыд рабæрæг, афтæмæй ацы æмбæстаг Театралон фæзуатмæ ввахс йæхи фехста дамбацайæ æмæ нæмыг ахызт риуы гуыдыры галиу фæрсты. Дохтырты тагъд æххуысы æмæ арæхстдзинады фæрцы æрыгон адæймаг мæлæтæй аирвæзт. Барадхъахъхъæнæг органтæ бынаты ссардтой æхсæнгарз «GLOK-17» æмæ дарддæр уадзынц слестгæнæн мадзæлттæ.
9 январы рынчындонмæ бахаудтой нæ горæты 44-аздзыд адæймаг æмæ йæ 15-аздзыд чызг, кæцытæ хæдзары уæвгæйæ, фæулæфыдысты сыгъдхъæстæ.
10 январы рейдон мадзæлттæ уадзыны рæстæджы милицийы кусджытæ горæты баурæдтой автомашинæ «ВАЗ-2109», йæ шофыр разынд бынæттон 35-аздзыд цæрæг. Медицинон басгæрсты рæстæджы рабæрæг, фæткхалæг кæй спайда кодта метадонæй æмæ марихуанайæ. Тæрхондон фæткхалæгæн стæрхон кодта ахæстоны сбадын иу мæйы æмгъуыдмæ æмæ ма йæ ноджы ивар дæр фæкæндзысты.
11 январы горæттаг 20-аздзыд цæрæг, Цхинвал-Знауыры фæндагыл цæугæйæ, нæ сарæхст йæ автомашинæ «BMW-525» скъæрын æмæ фæндаггæрон бетоныл сæмбæлд. Куыд рабæрæг, афтæмæй шофыр спайда кодта марихуанайæ.
11 январы миграцийы фарстаты фæдыл милицийы управленийы кусджытæ рейдон мадзæлттæ уадзыны рæстæджы дыууæ фæсарæйнаг æмбæстаджы рæстæгмæ цæрæнуаты хатӕны ссардтой полиэтиленæй конд пакет цъæхбын ссадæгимæ. Эксперттæ куыд сбæрæг кодтой, афтæмæй ацы буарад разынд, дымгæ кæй нæ кæнынц, ахæм тамако «насвай».
Милицийы наркотикты æрзылдыл контроль кæныны управленийы кусджытæ баурæдтой Цхинвалы районы Дменисы хъæуы 36-аздзыд цæрæджы, кæцы спайда кодта наркотикон буарадтæ метадон æмæ марихуанайæ æмæ психотропон медицинон препарат лирикайæ. Баурæдтой ма нæ горæты 47-аздзыд цæрæджы, марихуанайæ кæй спайда кодта, уый тыххæй. Цхинвалы районы милицийы хайады кусджыты зæрдæ ма фехсайдта горæттаг 24 ӕмӕ 30-аздзыд цæрджытӕм наркотиктæй спайда кæнынмæ. Фæткхалджытӕ медицинон басгæрстмæ нæ бакуымдтой æмæ сæ тæрхондон фæивар кодта.
