Мидхъуддæгты министрад хъусын кæны

30 январæй 6 февралмæ Хуссар Ирыстоны территорийыл фыдракæнд не ‘рцыдис. Наркотикон буарадтӕй ӕнӕзакъонӕй спайда кӕныны тыххӕй урӕд ӕрцыдысты цалдӕр ӕмбӕстаджы. Уымæй уæлдай ма республикæйы фæндæгтыл æрцыдис фондз фæндагон-транспортон цауы. Авариты фæстиуæгæн рынчындонмæ бахаудтой цыппар адæймаджы.

30 январы милицимæ фехъусын кодтой, зæгъгæ Цхинвалы районы Хеиты хъæуы ссардæуыд рæмудзæн æрмæджытæ. Бынатмæ бацыдысты сапертæ æмæ дзы ссардтой, сæ уæз 6 килограммы кæмæн уыд, ахæм 30 аммонитæй конд шашкæйы, æмæ ма сæрмагонд шнур 9 метры дæргъæн. Уымæй уæлдай ма Додоты хъæуы ссардтой рæмудзæн æрмæджытæ æмæ нæмгуытæ – 3 тратилæй конд шашкæйы, гранатæхсæны рæмудзæн хай, 1,5 метры бæрц сæрмагонд шнур æмæ алыгъуызон калибры нæмгуытæ. Цхинвалы районы та Арцеуы хъæумæ ввахс хъæды ссардтой 12 гранатæхсæны рæмудзæн хæйттæ.

1 февралы рынчындонмæ бахаудта 85-аздзыд горæттаг цæрæг, кæцы, йæ хæдзары уæвгæйæ, фæулæфыд сыгъдхъæстæ газ. Бахаудтой ма рынчындонмæ сыгъдхъæстæ фæулæфыны фæстиуæгæн 40-аздзыд сылгоймаг æмæ йæ 7-аздзыд сывæллон, кæцытæ уыдысты уæззау уавæры æмæ сæ æвæстиатæй арвыстой  республикæйæ хос кæнынмæ.

1 февралы наркотиктыл æрзылдыл контроль кæныны æмæ фæндагон змæлды æдасдзинады управлениты кусджытæ Дзауы районы Хуыцъейы хъæуы баурæдтой автомашинæ «Лада Приора», кæцыйы шофыр разынд нæ горæт Цхинвалы 30-аздзыд цæрæг. Машинæйы ма бадтысты бæлцæттæ – 38 æмæ 29-аздзыд горæттаг цæрджытæ. Басгæрсты рæстæджы милицийы кусджытæ фæстаг дуары рахизæны зæххыл ссардтой 21 таблеткæйы наркотикон опиоидон анальгетик «Трамадол». Уагъд цæуынц сæрмагонд мадзæлттæ, цæмæй бæлвырд æрцæуой æмæ бæрндзинад ма æркæной аххосджынты.

1 февралы Ленингоры районы милицийы хайадмæ фехъусын кодтой, зæгъгæ Циры хъæуы 51-аздзыд цæрæг бонраздæр ацыд хæдзарæй æмæ нал æрбаздæхт. Йæ агурæг ацыдысты районы тыхон структурæты кусджытæ æмæ йæ ссардтой уадзыгæй Лехурайы цæугæдоны былгæрон. Бирæ рæстæг æддæ баззайыны фæстиуæгæн сæфт адæймаджы  уазал бацыд æмæ йæ æвæстиатæй аластой рынчындонмæ.

Наркотикты ӕрзылдыл контроль кӕныны милицийы управленийы кусджытӕ баурӕдтой 31, 38 æмæ 29-аздзыд горæттаг цæрджыты, кæцытæ спайда кодтой наркотикон буарад «лирика»-йæ. Уымæй уæлдай ма Дзауы районы милицийы управленийы кусджытæ та баурæдтой 27-аздзыд горæттаг æмæ 38-аздзыд Дзауы поселочы цæрджыты, кæцытæ спайда кодтой марихуанайæ.