Къæбысты Георгиимæ интервьюйы кæрон

Райдиан кæс нæ газеты 186 номыры

— 2012 азы дæ иннæ коллегæ, Дмитрий Ивако, дæр ахст уыдис. 2011 азы декабры мæйы Цæгат Ирыстоны йæ ныхмæ уголовон хъуыддаг байгом кодтой æмæ йæ ам йæ бынатæй куыддæр систой, афтæ къуыри фæстæ йæ Уæрæсейы барадхъахъхъæнæн структурæтæ Дзæуджыхъæуы баурæдтой. 10 мæйы фæцыди фæдагуырд. Уый фæстæ та йæ суæгъд кодтой, уымæн æмæ тæрхонгæнæг æнæзакъон хъуыддагæй ницы ссардта йæ архайды. Интервьюмæ цæттæгæнгæйæ, агуырдтон Ивакойы фæд, фæлæ ныртæккæ кæм ис, уый тыххæй ницы ссардтон интернеты. 2015 азы Ивако радта «Эхо Кавказа»-йæн интервью. Бирæ цыдæртæ фæдзырдта, фæлæ мæ фæнды уыцы интервьюйæ цыбыр цитатæ æрхæссын:
«Дмитрий Ивако: Я считаю, что являюсь хранителем каких-то тайн, которые не дают мне жизни. Из-за этих тайн меня держат на каком-то крючке, чтобы я молчал и ничего не говорил. Но я думаю, что если эти тайны будут мною сброшены, то не будет причины держать меня на крючках, подвергать каким-то непонятным уголовным преследованиям, оторванным от закона.
Мурат Гукемухов: Насколько я в курсе, вас преследовали не за тайны, а за воровство…
Дмитрий Ивако: Знаете, в Южной Осетии не сажают за воровство…»

—  Георги, Хуссар Ирыстоны къæрныхы ахæстоны нæ бадын кæнынц?

— Уыцы адæймаг дæсны специалист уыдис, ома, мах ахæмтæ тынг хъуыдис æмæ, раст зæгъгæйæ, йæ куыст хорз æххæст кодта, фæлæ 2011 азы райдианы цæттæ уыдтæн Ивакойы йæ куыстæй сисынмæ. Нæ йæ систон, уымæн æмæ тынг нымад адæймæгтæ мæм бахатыдысты, ныууадз æй, зæгъгæ. Се ‘хсæн президент нæ уыдис, æндæр чидæртæ уыдысты уыцы хатджытæ. Фæстæдæр фæсмоны хай фæдæн, фæлæ цы рцыди, уый æрцыдис. Мæ цард мын фенад кодта уыцы мæнгард аферист æмæ йын Хуыцау тæрхонгæнæг фæуæд. Дæ фарстайæн та комкоммæ «о» кæнæ «нæ» зæгъын мæ бон нæу. Зæрдиагæй мæ фæнды, цæмæй паддзахады кæнæ æмбæстаджы исадмæ йæ чъизи къухтæ чи ивазы, уыдонæн закъон ныхкъуырд дæтта. Мæхæдæг кæй нæ дæн къæрных, уый та мæхæдæг зонын. Æмæ мæ тых мæ бонæй архайдзынæн мæ ном ссыгъдæг кæныныл.

— Ныртæккæ дæр уæрæсейаг телеканалтæ сæ трансляцийыл Хуссар Ирыстоны кæцыдæр организацийæн фидынц. Фехъуыстон, зæгъгæ, Югтелекомимæ баст структурæйæн ис семæ бадзырд…

— Бибылты Робертимæ мын хорз ахастытæ уыдис. Йе ’рвады йын президентæй куы равзæрстой, уæд нæ республикæмæ Ростовæй, Мæскуыйæ, Цæгат Ирыстонæй æрцыдысты бастдзинады специалисттæ. Бадзырдтон Дьякъонты Амыранмæ, фехъусын кодтам президентæн æмæ иууылдæр иумæ сæмбæлдыстæм кафе «Винченцо»-йы. Нæ уазджытæ загътой, зæгъгæ, нæ бон у сымахæн баххуыс кæнын аслам хæрзтагъдсигнал интернет æрбауадзыны фарстайы. Сразы стæм семæ, президент сын зæрдæ бавæрдта 2 мæйы дæргъы хъуыддаг саразынæй. Уыцы рæстæг та сæ уымæн ракуырдтам, нæхи кабелон канал æрмæст тъунелы онг арæзт кæй уыдис. Дзæуджыхъæуимæ йæ баиу кæнын хъуыдис æмæ официалон æгъдауæй ныффыстон «Газпром» æмæ Уæрæсейы «Энергохызæгтæ»-м, цæмæй нæ сæ каналтæм баиу кæной. Уыцы фыстæджыты копитæ мæм ис. Сæттын, мæхи фæндыдис провайдер суæвын. Уыцы рæстæджы иухатт ныхæстæ кодтам Бибылты Робертимæ. Цымыдис кодта, цытæ хъæуы провайдер суæвынæн æмæ йын сæ радзырдтон æнæхинæй. Къуырийы фæстæ мæм Джиголаты Хасан фæдзырдта телефонæй æмæ фехъусын кодта, зæгъгæ, Бибылты Роберт интернет-лæггæдтæ бардæттæг лицензимæ æрбацыдис. Бамбæрстон алцыдæр. Уый фæстæ та базыдтон, телеуынынадæн цы æхцайыл баныхас кодтон, уыдон дæр уыцы лæджы фирмæ исдзæнис. Рамæсты дæн, зæгъын, æрмæст уыдоны чи равзæрста, тендер цæуылнæ саразæм — чи рамбула, уымæн ратдзыстæм бар. Кæй зæгъын æй хъæуы, Бибылты Анатолимæ бахæццæ кодтой мæ ныхæстæ. Рамæсты ис æмæ бардзырд радта, цæмæй мæ цыфæндыйæ дæр «сæхгæной». Зонын æй, афтæ уыдис.

— Цæмæй макæйуал хъыгдарай?

— Ӕцæгдæр кæйдæрты тынг хъыг дардтон. Канд бастдзинады фарстаты нæ, фæлæ ма æндæр стыр ахсджиаг æмæ риссаг фарстаты. Уымæй æндæр интервьюйы фæлгæтты ницыуал бафтаудзынæн мæ ныхæстæм, цæмæй мæ ныхмæлæуджыты ма схотыхджын кæнон.

— Дзабиты Иналы фырнадæй куы амардтой, уæд Хуссар Ирыстоны ныннæрыд æхсæнадон-политикон кризис. Уыцы трагикон цауæй мæйтæ раздæр та ахæстоны адæм сызмæстой. Ды уыцы рæстæджы уым уыдтæ. Дæхимæ та дын цы цæстæй кастысты пенитенциарон системæйы, ома, Юстицийы министрады кусджытæ?

— Фыццаджыдæр мæ статьятæм гæсгæ мæнæн нæ уыдис 12 мæйæ фылдæр слесты изоляторы дарын. Ома, иу азы фæстæ мæ хъуамæ кæнæ хæдзарон ахсты хай фæкодтаиккой кæнæ мæ къух хъуамæ æрфыстаин, республикæйæ ацæуыны бар æхгæнæг гæххæттыл. УФ-йы Уголовон-æххæстгæнæн кодексы комкоммæ фыст у — 12 мæйы фæстæ æвæстиатæй суæгъд кæнинаг у. Раст зæгъгæйæ, уым ма фыст ис, исты вазыгджын экспертизæ цæттæ куы нæ уа, уæд ахсты æмгъуыдмæ æфты 6 мæйы. Мæн изоляторы фæдардтой 22 мæйы!!! Стæрхон мын кодтой колонийы иумæйаг режим æмæ уæд æххæстæй «базонгæ дæн» ахæстоны — Фыццаджыдæр, уыцы ахæстон (æндæр нæ республикæйы нæй — ред.) иунæг параметрæй дæр колони рахоныны аккаг нæу. Рудзгуытыл згъæрхызтæ хъуамæ ма уа, махæн та тезгъогæнæн фæзуат дæр уыдонæй æхгæд уыдис. Сæрæй æхгæд! Иннæ ахæм — хæринаг. Нæ бафсæстæ ахæстоны хæринагæй, кæнæ дæ зæрдæ исты æркуырдта, табуафси, ахæстоны дуканимæ бацу, бангон картæйæ бафид æмæ райс, цы дæ фæнды, уый. Уый закъоны домæн у. Фæлæ Хуссар Ирыстоны ахæстоны æгæрыстæмæй дукани дæр нæй! Ӕмæ ма уыимæ ахæстыты бинонтæн хæдзарæй хæринаг хæссыны бар куы нал лæвæрдтой, уæд сызмæстой. Уæдæ куыд æнхъæлдтой? Цæмæй ныфсджын уыдысты системæйы кусджытæ? Бавзæрстон дзы æргом дискриминацион ахаст дæр. Зæгъæм, хилдасæн прибортæ дарыны бар мæнæн нæ уыдис — иу камерæйы кæимæ бадтæн, уыдонæн та уыдис. Паддзахадон сусæгдзинæдтæ хæссæг адæймагмæ цы ахаст æмбæлы, уый дæр нæ фæхатыдтæн. Цыбыр дзырдæй, мердæм æгъатырæй закъон хæлд æрцыдис бирæ хатт. Афтæ хъуамæ ма уа. Ахст адæймагæн дæр ис бартæ. Тæрхоны фæндонæй сæрибар нæу цасдæр æмгъуыд, фæлæ адæймаг у, æмбæстаг æмæ йæм куыдфæндыйы цæстæй кæсæн нæй.

— Дæхи бынтон æнæаххосджыныл нымайыс?

— Классиктæй чидæр афтæ загъта — «на добро ответь добром, а на зло справедливостью» (рагон китайаг философ Конфуций — ред.) Туг исынмæ нæ бæллын. Фæнды мæ алцыдæр закъон æмæ рæстдзинады уæлахизы сæраппонд аразын. Равзæрст фæндагæй нæ ахиздзынæн. Ӕнæдзуапп фыдракæнд ног фыдракæнд сайы. Куы мæ суæгъд кодтой, уæд ныффыстон Генералон прокуратурæмæ, Парламентмæ. Ныхас кодтон депутаттимæ, ракуырдтон сæ, цæмæй мæ хъуыддаджы фæдыл саразой парламентон фæдæвзарæн. Æмæ сын комкоммæ загътон: «Уæхи фæдæвзарæны хатдзæгтæм гæсгæ аххосджын куы разынон, уæд цæттæ дæн дыккаг хатт ахæстоны сбадынмæ. Кæд æмæ æндæртæ разыной аххосджынтæ, уæд та уыдон хъуамæ радтой закъон æмæ адæмы раз æххæст дзуапп».

— Бузныг, Георги.

Дамбегти Иринæ