Ирон адæмы ’хсæн фæдзурынц, зæгъгæ, алы ирон хæдзары дæр, æнæмæнгæй, хъуамæ уа Къостайы «Ирон фæндыр» æмæ «Нарты кадджытæ». Æз ма сæм бафтауин нæ республикæйы иунæг ирон газет «Хурзæрин»-ы дæр.
«Хурзæрин»-æн йæ ном зæгъгæйæ дæр адæймаджы зæрдæйы равг фæхуыздæр вæййы, зæрдæмæ хуры тынтæ бакæсы. Цыфæнды фæлладæй дæр, æмæ ахуыргæнæгæн та æнæхъæн боны дæргъы æнæбафæллайгæ нæй, изæрæй ирон газет куы нæ бакæсон, уæд мæ бон баулæфын нæ вæййы.
Сывæллæтты дæр арæх афæрсын, зæгъын, чи уæ исы хæдзары газет «Хурзæрин». Хъыгагæн, алыхатт зæрдæ цæмæй барухс уа, ахæм дзуапп сæ нæ райсын. Æмæ сын уæд бацамонын, æрдзурын адæймаджы царды ирон газеты ахсджиаг ахадындзинады тыххæй.
Мах, ирон адæмы «Хурзæрин» тавы йæ зæрин тынтæй. Йæ фæрстыл ын бакæсæм нæ республикæйы царды æрцæугæ хабæрттæ, дунейы цымыдисон цаутæ æмæ æндæртæ. Арæх мах мадзæлттæ фæуадзæм ирон æвзагыл, газеты уацхæсджытæ дæр нæм фæуазæг вæййынц æмæ сæ равдисынц газеты фæрстыл. Сывæллæттæ сæ къамтæ куы фенынц, газеты сæ кой куы фехъусынц, уæд бацин кæнынц. Кæд се ’хсæн вæййы ирон газет чи нæма рафыста, ахæм бинонтæ, уæд уыдон æнæмæнгæй ныййарджыты сразæнгард кæнынц газет «Хурзæрин» рафыссынмæ. Уæдæ, сывæллæтты ’хсæн ахæм хъомыладон куыстæн вæййы хорз фæстиуджытæ. Ирон газет чи нæма рафыста, уый та батагъд кæнæд йæ рафыссыныл.
Фæнды мæ, цæмæй газет «Хурзæрин» ирон адæмы зæрдæтæ йæ рухс тынтæй тава мин мин азты дæргъы. Уадз, æхцондзинад нын хæссæд!
Дыгъуызты Лианæ,
Цхинвалы 6-æм астæуккаг скъолайы ирон æвзаг
æмæ литературæйы ахуыргæнæг
