Æрæджы не ‘мзæххон курдиатджын фыссæг Тадтаты Тамерлан ссис зындгонд уырыссаг поэт æмæ литературон критик, Александр Пушкины хæлар, «Литературная газета»-йы бындурæвæрæг æмæ йæ фыццаг редактор Антон Дельвигы номыл æрвылазон преми «За верность Слову и Отечеству»-йы финалист.
Тадтаты Тамерлан хайад исы номинаци «Аивадон дзырд æмæ публицистикæ»-йы, кæцымæ бавдыста йæ радзырдты æмбырдгонд «Ангел Бесы». Автор йæ радзырдты фыссы Цхинвалы хæсты тыххæй æмæ йæ цæрджыты цард уыцы уæззау уавæрты рæстæджы. Йæ радзырдтæ ма сты уарзондзинад, тас, фыдæх æмæ æндæр темæты фæдыл.
Антон Дельвигы номыл преми фидар æрцыд тынг раджы, фæлæ 2012 азæй ссис æрвылазон æмæ иумиагнацион. Уымæ гæсгæ конкурсы хайад райсынц Уæрæсейы Федерацийы æндæр æмæ æндæр регионты фысджытæ.
Тамерлан йæхæдæг куыд зæгъы, афтæмæй кæцыфæнды фыссæгæн дæр стыр кады нысан у литературон конкурсмæ бахауын, æмæ ма уыимæ иумæ лонг-листы, ома, литературон конкурсы сфæлдыстадон куыстыты номхыгъды бынат бацахсын дæр. Уымæ гæсгæ йын тынг æхсызгон уыд уырыссаг фысджыты æмрæнхъ конкурсы хайадисæг кæй у, уый. Фыссæг уый тыххæй бузныджы ныхæстæ зæгъы журнал «Дарьял»-ы сæйраг редактор Цхуырбаты Алан, «Литературон газет»-ы сæйраг редактор Максим Замшев, уырыссаг литературон æхсæнад æмæ «Литературон газет»-ы пресс-секретарь Вероника Одинцовайæн се ‘ххуысы тыххæй.
Хуссарирыстойнаг фыссæг Антон Дельвигы номыл премийы конкурсы хайад кæй исы, ууыл стыр цины æнкъарæнтимæ сæмбæлдысты сæхæдæг «Литературон газет»-ы разамынад. «Литературон газет»-ы пресс-секретарь Вероника Одинцова банысан кодта, зæгъгæ, Тадтаты Тамерланы размæ преми «Золотой Дельвиг»-ы хайад райста зындгонд хуссар-ирыстойнаг фыссæг Уанеты Владимир æмæ йæ уацмыс «Белые облака на черном небосклоне»-йы тыххæй ссис уæлдæрбанысангонд премийы лауреат.
Вероника Одинцова куыд банысан кодта, уымæ гæсгæ рæхджы рабæрæг уыдзысты премийы уæлахиздзаутæ æмæ мæйы кæрон та уыдзæн преми радтыны цытджын церемони.
ЦХУЫРБАТЫ Ларисæ
