Бæрæг куыд у, афтæмæй ацы бонты Иры дзыллæ банысан кодтой Хетæгкаты Къостайы райгуырдыл 160 азы сæххæсты юбилейон бæрæгбон.

2019 аз Къостайы юбилейон аз кæй у, уый тыххæй ацы аз расидт æрцыд конкурс Хетæгкаты Къостайы номыл Паддзахадон преми радтыны сæраппонд.

Хетæгкаты Къостайы номыл Паддзахадон премийæн бындур æвæрд æрцыд советон дуджы. Преми лæвæрд цыд, культурæйы, аивады, зонады фадгуыты стыр æнтыстытæ кæмæн уыд, уыдонæн.

Афтæ рауад, æмæ ивгъуыд æнусы 90-æм азты уыцы преми лæвæрд нал цыд, Хуссар Ирыстоны ныхмæ Гуырдзыстон хæстон-политикон агресси кæй райдыдта, уый тыххæй. Фæлæ та 2009 азы, Хуссар Ирыстон нымад паддзахад куы ссис, уæд преми дæттыны традици ногæй дарддæргонд æрцыд. Райдианы преми лæвæрд цыд дыууæ аз иу хатт. Ныр та, РХИ-йы Президенты барамындмæ гæсгæ, лæ-вæрд цæудзæн Къостайы юбилейон азты, ома фондз аз иу хатт.

Хуссар Ирыстоны Президенты цур Хетæгкаты Къостайы номыл Паддзахадон премийы фæдыл къамисы сæрдар Джиоты Мурат журналисттæн радзырдта, уыцы преми куыд лæвæрд æрцæудзæн, уый тыххæй.

Президенты уагæвæрдмæ гæсгæ, преми лæвæрд цæуы фондз номинацийæ – литературæ, аивад, публицистикæ, ирон филологи æмæ историон зонæдты фадгуыты. Зæгъæн ис, Къоста цы фадгуыты куыста æмæ арф фæд кæм ныууагъта, уыцы фадгуыты.

Уагæвæрдмæ гæсгæ, конкурсы райдианы тыххæй арæзт æрцыд хъусинаг майы мæйы кæрон. Конкурсы хайад райсын кæй фæндыд, уыдонæн уыд дыууæ мæйы æмгъуыд, сæхи раразмæ кæнын æмæ сæ документтæ къамисмæ бадæттыны тыххæй.

Августы мæйы та къамис хатдзæгтæ сарæзта, преми райсынмæ йæ документтæ æмæ куыстытæ чи балæвæрдта, уыдон куыстыты фæстиуджытæн. Къамисы рабадты рæстæджы регистраци æрцыд 14 адæймаджы кандидатурæйы. Уыцы адæймæгтæ раразмæгонд æрцыдысты фондз номинацийæ. Уый фæстæ уыцы адæймæгты номхыгъд æмæ цы куыстытæ æрбавдыстой, уыдон мыхуыр æрцыдысты прессæйы. Уымæй дард-дæр ма æхсæнадæй алкæмæн дæр бар уыд, цæмæй кадидатты куыстытимæ базонгæ уыдаид. Уый тыххæй сын уыд дыууæ мæйы æмгъуыд.

Конкурсы хайадисджытæн дæр æппæт уавæртæ уыд, цæмæй сæ куыстытимæ базонгæ кодтаиккой уæрæх æхсæнады. Номинацигонд мыхуырон куыстытæн арæзт уыд стенд зонад-иртасæн институты библиотекæйы. Сентябры та дыууæ боны фæд-фæдыл уагъд цыд спектакль «Фатимæ», равдыстыты залы организацигонд æрцыд, конкурсмæ раразмæгонд чи æрцыд, уыцы нывгæнджыты равдыст. Ансамбль «Айзæлд»-æн дæр уыд концерт.

14 октябры уыд паддзахадон премиты фæдыл къамисы кæронбæттæн рабадт. Хетæгкаты Къостайы номыл паддзахадон премийы лауреаты ном райсыны тыххæй процедурæ ауагъдæуыд сусæг хъæлæсæппæрстæй. Æппæт процедурæтæ дæр æххæст æрцыдысты. Уый фæстиуæгæн бæрæг æрцыдысты 2019 азы Къостайы номыл Паддзахадон премийы лауреаттæ дæр.

***

16 октябры Паддзахадон драмтеатры Хетæгкаты Къостайы 160-æм юбилейон азы цытæн цытджын æмбырды рæстæджы Президент Бибылты Анатоли конкурсы фæуæлахизуæвджытæн радта, стыр поэты номыл Паддзахадон премитæ. Преми уыд 350 мин сомы.

Литературæйы фадыджы Хе-тæгкаты Къостайы номыл Паддзахадон премийы лауреат ссис поэтессæ, Уæрæсейы Федерацийы Фысджыты цæдисы уæнг Чехойты Ольгæ. Преми йын лæвæрд æрцыд йæ чингуытæ «Нæ Иры зæринхур, Къоста!», (Цхинвал, 2017), «Дæуыл хаст дæн, «Ирон Фæндыр!» (Цхинвал, 2017), «Ты мне дана, «Осетинская лира» (авторы тæлмац)  (Цхинвал, 2017), «Хетæгкаты Къостайæн» (йæ райгуырды 160 азы бонмæ), (Цхинвал, 2019) тыххæй.

Йæ рады Чехойты Ольгæ бузныг загъта Бибылты Анатолийæн æмæ бахатыд паддзахады сæргълæууæгмæ, цæмæй, преми дихгонд æрцæуа республикæйы æртæ скъола-интернатыл.

Аивады фадыджы преми лæвæрд æрцыд Республикæ Хуссар Ирыстоны сгуыхт артисткæ, адæ-мон инструментты Паддзахадон оркестр «Айзæлд»-ы аивадон къухдариуæггæнæг Уалыты Нинæйæн. Уый та преми райсыны тых-хæй конкурсмæ бавдыста оркестримæ ирон фæндыры тыххæй му-зыкалон композици «Хæхтыл».

Публицистикæйы фадыджы преми дихгонд æрцыд  дыууæйыл – журнал «Фидиуæг» æмæ Республикæ Хуссар Ирыстоны сгуыхт журналист, историон зонæдты кандидат Хъуылымбегты Роберты ‘хсæн. Хъуылымбегы фырт конкурсмæ бавдыста чингуытæ «Южная Осетия. От прошлого к настоящему» (Цхинвал, 2017) æмæ «Южная Осетия. Год за годом» (Цхинвал, 2018).

Ирон филологийы фадыджы премийы аккаг ссис филологон зонæдты кандидат, профессор, Республикæ Хуссар Ирыстоны зонады сгуыхт архайæг Дзабиты Зарбег.

Уый та премийы лауреат суæвыны тыххæй конкурсмæ бавдыста чиныг «Ирон æвзаджы фразеологон дзырдуат»-ы дыккаг, баххæстгонд рауагъд (Дзæуджыхъæу, 2018).

Историон зонæдты фадыджы преми дæр дихгонд æрцыд дыууæ историкыл. Сæ иу уыд филологон зонæдты кандидат, доцент, Республикæ Хуссар Ирыстоны зонæдты сгуыхт архайæг, «Историйы» номинацийы кавказаг тематикæйы фæдыл хуыздæр чиныджы Æппæт уæрæсейаг конкурсы лауреат Дзугаты Къоста, кæцы конкурсмæ раразмæ кодта  æртæ чиныгæй монографи «Понятие «окна возможности» применительно к интеграционно-воссоединительному процессу Осетии (1917-1921, 1925, 1936 гг.)» (Цхинвал, 2017-2018). Иннæ та уыд историон зонæдты кандидат, профессор, Республикæ Хуссар Ирыстоны зонæдты сгуыхт архайæг, Хетæгкаты Къостайы номыл Республикæ Хуссар Ирыстоны Паддзахадон премийы дыууæ хатты лауреат Гаглойты Юри. Преми йын лæвæрд æрцыд, йæ зонадон куыстыты æм-бырдгонд «Нарты и Аланы»-йы конкурсы кæй фæуæлахиз, уый сæраппонд.

ОСИАТЫ Индирæ

Comments are closed, but trackbacks and pingbacks are open.