29-æм апрелы Хуссар Ирыстоны бирæпрофилон медицинон центры Цæгат Ирыстон-Аланийæ æрхонгæ специалисттæ сарæзтой операцитæ катарактæйæ рынчынтæн.
Уазджытæ бакуыстой æрмæстдæр иу бон. Рынчынтæн развæлгъау арæзт æрцыд номхыгъд офтальмологийы хайады. РБМЦ-ы офтальмологийы хайады хистæр Мæргъиты Мадинæ куыд загъта, афтæмæй номхыгъдмæ хаст æрцыдысты ахæм рынчынтæ, кæцытæн цæстыты ацы низ нæ ахызт вазыгджын стадимæ. Цæгат Ирыстоны клиникæ «Офтальма» нæ республикæмæ хуынд æрцыд Æнæниздзинад хъахъхъæнын æмæ социалон рæзты министр Наниты Сосланы хъæппæрисмæ гæсгæ. Æрхонгæ дохтыртæ операцийæн æнæмæнгхъæуæг ифтонгад æрластой семæ. Хирургтæ-офтальмологтæн сæ нывæсты ис цæстыты хрусталиктæ импланттæй баивыны операци саразын. Мæргъиты Мадинæ куыд зæгъы, афтæмæй операцитæ аразынмæ рады сæвæрдтой, сæйраджыдæр, æххуысхъуаг адæмы, Уæрæсемæ йæ бон ацæуын кæмæн нæу, ахæмты. Иу категори та дзы у, уый размæ иу цæстыл чи сарæзта операци æмæ ныр дыккаг операци дæр æвæстиатæй саразын кæмæн хъуыд, ахæм адæймæгтæ. Радылæуджытæй сæ иу Плиты Амиран афтæ зæгъы: «Цæсты катарактæй фылдæр ацæргæ адæм рынчын кæнынц. Цалдæр азы размæ мæ иу цæстыл операци сарæзтон Беслæны клиникæйы. Операцийы фæстæ мæ цæсты уавæр фæхуыздæр. Ныр та мæ галиу цæст тыхсын кæны. Мæ кары нæлгоймагæн дардмæ цæуын зын у. Куы фехъуыстон дохтыртæ операци кæнынмæ нæхи рынчындонмæ æрцæудзысты, уæд уадид æрбацыдтæн нæхи офтальмологийы хайадмæ. Уыдон мæ басгæрстой æмæ мæ номхыгъды ныффыстой. Кæй зæгъын æй хъæуы, æз райгонд дæн, фæндагыл цæуынмæ мæ ныфс нæ хастон, стæй мын операци æнæаргъæй арæзт кæй æрцæудзæнис, ууыл дæр фæцин кодтон. Стыр бузныг зæгъын мæ фæнды, ацы стыр куыст чи бакодта, уыдонæн се ‘ппæтæн дæр».
Уазджытæ сæхæдæг куыд загътой, афтæмæй сæ балц Хуссар Ирмæ у æрмæстдæр иу бон. Сæ хуссайраг коллегæтæ сын раст диагноз сарæзтой алы рынчынæн дæр индивидуалонæй. Операцитæ цæудзысты амбулаторион уавæрты. Катаракты операци саразынæн хъæуы 20 минуты бæрц. Цæсты хрусталик раивынæн та хъæуы фылдæр рæстæг. Кæд æмæ номхыгъды цы рынчынтæ лæууы, уыдонæй искæмæн рабæрæг вазыгджын катарактæ, уæд уыдон та хуынд æрцæудзысты хоскæнынмæ Цæгат Ирыстоны «Офтальма»-йы клиникæмæ.
Уæд зæрдыл уын лæууын кæнæм, уымæй размæ та бирæпрофилон медицинон центрмæ хуынд кæй æрцыдысты Дагъыстанæй травматологтæ. Уыдон бынæттон хирург, травматолог-ортопед Константин Серветникимæ сарæзтой операцитæ. Серветник уымæй размæ иу мæйы дæргъы уыд Дагъыстаны, цыран райста хорз фæлтæрддзинад. Ахæм бæрзондтехнологион операцитæ ныр арæзт цæудзысты нæхи рынчындоны дæр.
УАЗÆГТЫ Марфа
Comments are closed, but trackbacks and pingbacks are open.