112/28, 06, 2022
23-24-æм июны Республикон бирæпрофилон медицинон центры Санкт-Петербургаг, «Скандинави»-йы клиникæты хызæджы травматологтæ æмæ нейрохирургтæ сæхимæ райстой нæ республикæйы цæрджыты.
Уыдон нæ республикæмæ æрцыдысты Æнæниздзинад хъахъхъæныны æмæ социа-лон рæзты министр Наниты Сосланы æрхуындмæ гæсгæ. Сæдæгай адæймæгтæ рады слæууыдысты уæрæсейаг дохтыртæм. Рынчынты басгæрстой æнæаргъæй.
«Скандинави»-йы клиникæты хызæджы травматолог Михаил Агрелкинмæ развæлгъау цы номхыгъд сырæзт, уым уыд 140 адæймаджы, фæлæ ма уымæй уæлдай, рады ноджыдæр лæууыд дзæвгар адæймæгтæ. Травматолог куыд загъта, афтæмæй дыууæ бонмæ басгæрста 70 пациенты бæрц. Зæгъы, зæгъгæ, 2007-2008 азты куыста, нæ горæты Фидауынгæнæг тыхтæн цы медицинон центр уыд, уый хистæрæй. Уый фæстæ куыста Санкт-Петербурджы Æфсæддон медицинæйы егъау æрхæгты эндопротез кæныны хайады.
«Ирыстонмæ æрцæуын мын æхсызгон уыд. Бирæ зонгæтæ мын дзы ис. Хъыгагæн, уæ республикæйы бирæ ис æрхæгты низæй чи тыхсы, ахæм рынчынтæ. Цы рынчынты басгæрстон, уыдонæн сæ фылдæрæн хъæуы операци скæнын. Уыдон æрвыст æрцæудзысты Цæгат Ирыстон-Аланимæ. Ам, уæхимæ дæр ис уавæртæ операцитæ аразынæн. Сæ протезтæ ивинаг кæмæн сты, уыдон æрвыст æрцæудзысты сæрмагонд клиникæтæм», – зæгъы Михаил Агрелкин.
Нейрохирург Василий Кашинмæ дæр дзæвгар адæм слæууыд рады. «Басгæрст æрцыдысты бирæнымæц пациенттæ. Уыдонæй бирæтæн бахъæудзæн операцитæ саразын. Иннæ пациенттæн та радтам рекомендацитæ. Операци кæнын бахъæудзæн 29 адæймагæн, кæцытæ хъизæмар кæнынц остеохондроз æмæ алыгъуызон травмæтæй», – загъта Кашин.
Нейрохирургы ныхæстæм гæсгæ, Хуссар Ирыстонмæ уæрæсейаг дохтырты радон балц уыдзæн сентябры мæйы.
Басгæрстытæ ма уагътой акушер-репродуктологтæ дæр. Сæ ныхæстæм гæсгæ 50 пациентæн хос кæнын бахъæудзæн республикæйæн æддæйæ. Уыдоны бахъæудзæн сæ документтæ бацæттæ кæнын.
Æнæниздзинад хъахъхъæныны æмæ социалон рæзты министрад сын рахицæн кæндзæн фæндаггаг æмæ операцитæ та арæзт æрцæудзысты æнæаргъæй. Гуырæн хæдзары гинеколог-репродуктолог Цоциты Аленæ куыд зæгъы, афтæмæй, уыдон дарддæр дæр хондзысты УФ-йæ дохтырты, кæцытæ бынаты скъуыддзаг кæндзысты, пациенттæн цы методмæ гæсгæ хъæуы хос кæнын, уыцы фарстатæ.
УАЗÆГТЫ Марфа
