Хуссар Ирыстоны зонад-иртасæн институты кусджытæ сæ директор Гаглойты Роберты сæргълæудæй дарддæр реализаци кæнынц проект «Популярная наука», зæгъгæ. Йæ сæйраг нысан у ахуырдзауты цымыдисдзинад зонадон зонындзинæдтæм рæзын кæнын. Проекты фæлгæтты каст цæуынц лекцитæ скъоладзаутæн, зонадмæ чи цымыдис кæны, уыдонæн.
Цхинвалы 1-æм астæуккаг скъолайы хистæркъласонтæн лекци бакаст институты директор Гаглойты Роберт. Уый сын радзырдта РХИ-йы территорийыл археологон скъахæггæгты тыххæй. Ахуырдзаутæ йæм хъуыстой стыр цымыдисимæ æмæ йæм лæвæрдтой алыгъуызон фарстатæ: куыд свæййынц археолготæ, археологон экспедици цас рæстæджы вæййы, археологтæ куыд базонынц, стæгдар сылгоймаджы у æви нæлгоймаджы æмæ афтæ дарддæр.
Гаглойты Роберт ахуырдзаутæн равдыста иуæй-иу артефакттæ, кæцыты бахаста йемæ. Скъолайы директор Гобозты Русудан банысан кодта, зæгъгæ ахæм фембæлдтытæ раздæр дæр уагъд цыдысты, фæлæ бæрæг аххосæгтæм гæсгæ фæстаг рæстæджы айрох сты. Уый раарфæ кодта уазджытæн цымыдисон лекцийы тыххæй æмæ сæм бахатыд, цæмæй дарддæр дæр уагъд цæуой ахæм лекцитæ.
Дыккаг бон, 15-æм февралы та Хуссар Ирыстоны зонад-иртасæн институты ног æмæ ногдæр историйы хайады сæргълæууæг, профессор Дзугаты Къоста лекци бакаст 12-æм астуæккаг скъолайы ахуыргæнинæгтæн. Лекцийы темæ уыд: «Æхсæнадæмон ахастытæ», зæгъгæ. Дзугайы фырт хъусджыты базонгæ кодта йæ зонадон куыстытимæ. Скъолайы библиотекæйæн балæвар кодта йæ чингуытæ.
Ахуырдзаутæ бахатыдысты уазджытæм, цæмæй сын ахæм фембæлдтытæ арæхдæр уадзой.
Нæ уацх.
