Проект SputnikPro фæлгæтты Дунеон информацион агентад «Россия сегодня»-йы сæйраг редакторы хæдивæг Наталья Лосева Хуссар Ирыстоны паддзахадон университеты ахуыргæнджытæ æмæ студенттæн бакаст лекци «Нырыккон æмæ фидæны форматтæй пайдагæнгæйæ, куыд дзурын хъæуы ахсджиаг проблемæтыл».
Уæрæсейаг уазæг цы лекци ауагъта, уый уыд медиа æмæ социалон журналистикæйы ног технологиты фæдыл.
Наталья Лосева радзырдта ныртæккæйы социалон проблемæты актуалондзинады тыххæй. Хъусдард аздæхта уымæ дæр, æмæ абоны æмæ фидæны журналисттæ кæй цæрынц, информацион дунейы ахæм интенсивон ивындзинæдтæ куы цæуы, ахæм рæстæджы. Ис, зæгъгæ, ахæм хъуыдытæ, ома, ныртæккæ дуне егъау кризисы уавæры кæй ис, уымæ гæсгæ социалон проблемæтæм нæ цымыдис кæны æхсæнад. Фæлæ уый раст нæу, æхсæнад цымыдис кæны социалон æмæ æндæр темæтæм. Хъæуы сæ, æрмæстдæр, раст æмæ цымыдисонæй рæгъмæ рахæссын æмæ равдисын.
Наталья Лосева куыд дзырдта, уымæ гæсгæ йæ профессийæ дарддæр уый архайы анализ кæныныл — аудиторийы цымыдисдзинад куыд ивы, афтæ ма прикладон фурурологийæ архайын.
«Ахсджиаг у абарын ныры æмæ раздæры информациты — къорд азты размæ информацийы ратæдзæнтæ иттæг хорз кæй хицæн кодтой кæрæ-дзийæ — газеттæ, радио, телеуынынад æмæ æндæртæ. Уæвынад кодтой организацитæ, структурæтæ, уыдонæн хæсгонд цыд ног хабæрттæ хъусын кæнын, сæ цæстæнгас æвдисын, историтæ дзурын. Фæлæ ныртæккæ информацион фæрæзтæ комкоммæ конкуренци кæнынц адæмимæ», — дзырдта уый.
Хъусдард ма аздæхта ноджы иу фактмæ, зæгъгæ, ног хабæрттæ чи хъусын кæны, уыдонæй дарддæр ма сæ хъуыдытæ дзурынц æмæ алфæмблай уæвджытыл æндавынц æндæр институттæ. Уыдон сты, сæхи пресс-службæтæ кæмæн ис, уыцы уæлдæр ахуыргæнæндæттæ, музейтæ, авиакомпанитæ æмæ æндæртæ.
Ныхасгæнæг куыд банысан кодта, уымæ гæсгæ ныртæккæ информацион фæрæзтæн раздæр сæ хæс уыд информаци цæттæ кæнын æмæ адæттын. Фæлæ ныртæккæ æппæт дæр фæивта. Ныртæккæйы уавæрты фылдæр архайд здæхт хъуамæ цæуа информацион æрмæг парахат кæнынмæ. Уый комкоммæдæр хауы алы журналистмæ — хъуамæ сараза афтæ, æмæ йæ æрмæг æхсæнадмæ ацæуа. Афтæмæй журналисты професси ивы, размæ цæуы æмæ тагъд рæстæджы суыдзæн ноджы цымыдисондæр æмæ уыдзæн бæрзонд æмвæзадыл.
Лекцийы кæрон сæйраг редакторы хæдивæг банысан кодта, зæгъгæ, журналисты профессионалон хъысмæт у, цæмæй адæммæ хæццæ кæна рæстдзинад. Студенттæн йæ цæст бауарзта сæ равзаргæ профессийæ æхцондзинад исын æмæ профессионалон къæпхæнтыл размæ цæуын.
Уый фæстæ фембæлд адарддæр ХИПУ-йы журналистикæйы кафедрæйы минæвæрттæ æмæ Хуссар Ирыстоны информацион фæрæзты минæвæртты хайадистæй. Дискусситы хайад райста РХИ-йы Президенты Администрацийы Информацион-аналитикон управленийы къухдариуæггæнæг Уазæгты Юри.
Лосева куыд банысан кодта, уымæ гæсгæ ныртæккæ журналисттæ сæ куысты æмбæлынц технологон ивындзинæдты ног этапыл. Уымæ нæ кæсгæйæ, нырма технологитæ æмæ фæлтæрддзинад кæрæдзимæ дард лæууынц.
Хуссар Ирыстоны Паддзахадон университеты ахуыргæнджытæ æмæ студенттæн лекци æмæ мастер-къласты ахсджиагдзинад æмæ нысаниуæджы фæдыл нын йæ хъуыдытæ загъта:
Журналистикæйы кафедрæйы сæргълæууæг ХЪОДАЛАТЫ Хансиат
— Ахæм фембæлдтытæ, сæйраджыдæр, пайда сты студенттæн æмæ арæзт дæр уыдоны тыххæй æрцæуынц. Дзырд дæр ыл нæй, абоны бон интернет-хызæджы бирæ алыхуызон информаци ис ссарæн, фæлæ, куыд фæзæгъынц, зонæнтæ «лæгæй-лæгмæ» исын æмæ æмбарын æнцондæр у. Нæ уазæг Наталья Лосева уæрæсейаг журналистикæйы чысыл адæймаг нæу. Уый у ног медиатехнологиты фадыджы иттæг хорз дæсны, фылдæрбæрцæй кусы социалон проекттыл, зонадон æгъдауæй дæр ма сæ «фæлындзгæйæ». Абон æм не студенттæ хъуыстой стыр цымыдисимæ, лæвæрдтой йæм фарстытæ, æмæ æз нæ дызæрдыг кæнын, журналистикæмæ сæ ахаст ноджы кæй фæбæстондæр, ууыл.
Журналисттæ цардимæ æмдзу кæнынц, æмæ уымæ гæсгæ æппынæдзух хъуамæ архайой сæхи ног зонындзинæдтæй ифтонг кæныныл. Уыцы хъуыддаджы та сын стыр æххуыс сты практикон мадзæлттæ фæлтæрд специалистты хайадистæй.
SputnikPro у дунеон информацион агентад æмæ радио Sputnik-ы проект. У «Россия сегодня»-йы уæрæсейаг медиакъорды хай. Йæ куыст, сæйраджыдæр, здæхт у журналисттæ, профилон уæлдæр ахуыргæнæдæтты студенттæ, пресс-службæты кусджытæ æмæ медиаменеджертæн кæрæдзийæн сæ фæлтæрддзинад дæттын æмæ фæсарæйнаг коллегæтимæ профессионалон бастдзинæдтæ аразынмæ. Проекты фæлгæтты амонджытæ сты куыд Sputnik-ы медиаменеджертæ, афтæ зындгонд уæрæсейаг эксперттæ дæр.
КЪÆБУЛТЫ Маринæ
Comments are closed, but trackbacks and pingbacks are open.