Сæрд йæ тыхы нæма бацыд æххæстбæрцæй, фæлæ куыддæр сæрдыгон мæйтæ ралæууынц, афтæ зæрдæ адæймаджы фæхæссы æрдзы хъæбысмæ. Ныртæккæ алкæмæн уыцы уавæртæ нæй, цæмæй зæрдæйы фæндиаг ацæуа æмæ баулæфа санаторийы кæнæ денджызы был. Ахæмтæн та сæ ирвæзынгæнæг у горæтгæрон цад. Ацы цад æрмæст сæрдыгон бонты хинайæн нæу, фæлæ ма, ацæргæ адæмæй йе ‘нæниздзинад мæгуырау кæмæн у, зæрдæйы низтæ кæй тыхсын кæнынц, дохтыртæ тезгъо кæнын кæмæн амонынц, уыдоны ирвæ-зынгæнæг дæр. Сæрд уа æви зымæг, ам æрвылхатт дæр фенæн ис сабиты, фæсивæды, кардзыд адæмы тезгъогæнгæ.
Фæлæ ацы аз цад лæууы сурæй, ныртæккæ дзы дон нæй. Цæмæннæ? Ацы фарст бæлвырддæр базоныны тыххæй горæты администрацийы пресс-службæйы бафарстам. «Ныртæккæ цадæн дзуаппдæттæг у горæт. Цады дон ауагътой коммуналон службæйы кусджытæ. Ныссыгъдæг ын кодтой, йæ быны цы бырон уыд, уый. Раст у, цад ацафон йедзаг вæййы донæй, фæлæ йæм дон цæуы Леуахийы хаххæй. Куыд зонæм, афтæмæй та уымæн дзуаппдæттæг сты мелиорацийы кусджытæ».
Мелиорацийы хайад горæты цад донæй ифтонг кæнынæн æцæгдæр уыдон дзуаппдæттæг сты. Фæлæ сын бардзырд та хъуамæ радта Хъæууон хæдзарады министрад, кæцыйы дæлбар ис мелиораци. «Махæн ныртæккæ дæр у нæ бон дон бауадзын цадмæ, фæлæ уый бакъуылымпы кæндзæн, Зæронд хиды бынаты цы хиды михтæ садзынц, уыдоны куыстытæ. Кæд афоныл арæзт фæуой æмæ нын нæ министрадæй бар лæвæрд æрцæуа, уæд байдзаг кæндзыстæм цад донæй», – ахæм дзуапп радтой ацы уагдоны.
Горæты администрацийы сæргълæууæг Хуыгаты Ромео та зæгъы, цады ныртæккæ дон кæй нæй, уымæн ис цалдæр аххосаджы. Цады дон байдзаг кæнынц Салтвийы къанауæй, кæцы цæуы цæугæдон Леуахийæ. Ацы къанау та цæуы Комаровы уынджы хаххыл. Уынг аразгæйæ фæндагаразджытæ уыцы къанауы уæлцъарыл сæвæрдтой асфальт æмæ доны цæуæн сæхгæдтой. Горæты администрацийы дæлбар нæй сæрмагонд техникæ донуадзæн ныссыгъдæг кæнынæн фæндаг æнæфехалгæйæ. Горæты мэр ма куыд бамбарын кодта, афтæмæй цад донæй байдзаг къуылымпы кæнынц Зæронд хидыл арæзтадон куыстытæ. Цад донæй байдзаг кæнынæн бахъæудзæн 2-3 къуырийы. Хидарæзтадæн та уыйбæрц рæстæг æрлæууæн нæй. «Дон æппындзух хъуамæ циркуляци кæна. Уымæн та ныртæккæ саразæн нæй. Цад иухатт куы байдзаг кæнæм, уæд æй баивын хъæудзæн иу мæйы фæстæ. Ис ма æндæр аххосаг дæр: ныртæккæ Леуахийы дон тынг змæст у. Куыд зонæм, афтæмæй Комаровы уынджы цæрджытæ æмæ ма ноджы æндæртæ дæр хибарæй цæугæдонмæ баиу кодтой сæ канализацион хæтæлтæ. Ахæм донæй цад байдзаг кæнын та нысан кæны антисанитари. Кæй зæгъын æй хъæуы, антибактериалон мадзæлттæ саразæн дæр ис, фæлæ сабитæ ма хъуамæ найой сæхи ахæм доны», – ахæм у йæ дзуапп администрацийы сæргълæууæгæн.
Хуыгаты Ромео ма куыд загъта, афтæмæй цад сыгъдæг, гъæдджын донæй байдзаг кæнынæн ис цалдæр варианты. Уыдонæй иу у Сацхенеты къанауæй, Присы хъæуы ног хæтæл ныппарын. Уый баиу уыдзæн ног хиды фæрсты Салтвийы къанаумæ æмæ афтæмæй цад дзаг кæндзæн сыгъдæг донæй.
Мэр ма зæгъы, зæгъгæ, нырма раджы у уыцы проектыл дзурын. Фæлæ кæддæр горæты цады фарст хъуамæ скъуыддзаг æрцæуа адæмы хæрзиуæгæн. «Ацы фарст мах æрæвæрдзыстæм Хицауады раз, цæмæй Инвестпрограммæмæ хаст æрцæуа фидæны. Уымæн æмæ нæхи тыхтæй йæ нывыл аскъуыддзаг кæнын нæ бон нæ бауыдзæн».
Адæм та домынц – куыдфæндыйæ дæр хъуамæ бацархайой чиновниктæ, цæмæй цад тагъд рæстæджы байдзаг уа донæй.
Уазæгты Марфа
