Аивад æххуыс кæны уæззау рæстæджыты, æвдисы циндзинады уысмты рæсугъддзинад
Киноконцертон зал «Чермен»-ы уыд Тугъанты Махарбеджы номыл Цхинвалы нывгæнæн ахуыргæнæндоны 85-азы бæрæгбон. Мадзалмæ æрбацыдысты Культурæйы министр Зæгъойты Рада, Хуссар Ирыстоны Россотрудничествойы минæварады сæргълæууæг Сергей Скворцов æмæ бирæнымæц уазджытæ Хуссар æмæ Цæгат Ирыстонæй.
Мадзал амыдтой паддзахадон телерадиокомпанийы уацхæссæг Бязырты Стеллæ æмæ информацион рауагъд «Абон»-ы амонæг Хуриты Батрадз.
Киноконцертон зал «Чермен»-ы фоейы равæрдтой ахуырадон уагдоны рауагъдонты хуыздæр дипломон куыстыты коллекци. Цхинвалы районы культурæйы управленийы хорегорафион ансамбль «Амонд»-ы нæлгоймæгты вокалон къорды зарæгæй райдыдта бæрæгбон.
Уагдоны директор, РХИ-йы сгуыхт нывгæнæг Зассеты Сæрмæт раарфæ кодта мадзалы архайджытæн: «Абон мах нысан кæнæм стыр бæрæгбон. Уыимæ ацы бæрæгбон у иумиаг бæрæгбон Цæгат æмæ Хуссар Ирыстонæн, уымæн æмæ Тугъанты Махарбег йæ уацмыстæ фæлдыста Ирыстоны хуссары æмæ цæгаты дæр».
Адæмон нывгæнæг, Станиславскийы номыл паддзахадон премийы лауреат æмæ ахуыргæнæндоны рауагъдон Чилæхсаты Магрез банысан кодта æппæт Ирыстонæн тынг уарзон æмæ ахсджиаг кæй у ахуыргæнæндон.
«Ам ахуыр кодтой æмæ куыстой бирæ курдиатджын нывгæнджытæ. Кæддæриддæр сæрыстыр дæн æмæ мын абоны онг цæвиттойнаг сты мæ ахуыргæнджытæ», — загъта уый.
Юбиляртæн раарфæ кодта Цæгат Ирыстон-Аланийы Нывгæнджыты цæдисы сæрдар Мæргъиты Таймураз: «Тынг æхсызгон мын у абон ам уæвын. Тугъанты Махарбег сарæзта ацы ахуыргæнæндон. Фæлæ йæ нæ зыдта цас бакусдзæн, уый. Æмæ ныр 85 азы дæргъы ахуыргæнæндоны къæсæрæй рахызтысты бирæ курдиатджын нывгæнджытæ», — банысан кодта уый æмæ Цæгат Ирыстон-Аланийы Культурæйы министр Галазты Эдуарды номæй Зассеты Сæрмæтæн радта Кады гра-мотæ ахуыргæнæндоны рæзтмæ се стыр хайбавæрды æмæ юбилейы цытæн.
Уагдоны кусджытæн зæрдæбын арфæ ракодта Культурæйы министр Зæгъойты Рада. «Цхинвалы нывгæнæн ахуыргæнæндон у кадрты куырдадз хъæздыг истори æмæ традицитимæ. Уагдон у Ирыстоны æнгомдзинады символтæй сæ иу», — банысан кодта Культурæйы министр æмæ ахуыргæнæндоны хуыздæр студенттæй дыууæйæн радта стипендитæ.
«Тугъанты Махарбег уыд ирон сфæлдыстадон интеллигенцийы зынгæдæр минæвæрттæй иу, махæй алкæйы зæрдæйы дæр ныууагъта хорз мысинæгтæ. Ацы адæймаг куыста, арæзта истори æмæ бæрæг фæхъæздыгдæр кодта национ нывкæнынады аивад. Махæн ис сæрыстыр кæмæй уæм, уый. Нывгæнæн ахуыргæнæндон аккагæй хæссы зынгæ нывгæнæг Тугъанты Махарбеджы ном. Абон ацы залы сты ветерантæ, кæцытæ раздæрау зæрдæйæ сты махимæ æмæ немæ дих кæнынц бæрæгбон. Нæ мысынады цæрæнбонтæм баззайдзысты ахуыргæнджыты æмæ рауагъдонты нæмттæ, кæцытæ ахицæн сты цардæй», — дзырдта мадзаламонæг.
Æрæмбырдуæвджытæ иу уысм æмырæй алæууынæй ссардтой цардæй чи ахицæн уыцы ветеранты æмæ рауагъдонты нæмттæ.
Уагдоны 85 азы дæргъы рауагъта цалдæр мин ра-уагъдоны. Бирæтæ дзы сæ нæмттæ ныффыстой нæ паддзахады историйы, систы зынгæ нывгæнджытæ, архитектортæ, дизайнертæ, культурæйы кусджытæ.
Юбилейон мадзалы кæрон уыдис цымыдисон концерт. Зарджытæ æмæ кæфтытæ кæрæдзи ивтой. Сæ арæхстдзинад равдыстой ансамбль «Амонд», зарæггæнджытæ Харебаты Вадим, Гатыгкоты Нинæ, Харебаты Мартæ, адæмон инструментты ансамбль «Сæрмæт» æмæ æндæртæ.
Джиоты Екатеринæ
