Æрæджы Дзæуджыхъæуы байгом, цæрджытæ рагæй кæмæ æнхъæлмæ кастысты, уыцы ихын комплекс «Тагбан». Уый у Дзæуджыхъæуы дыккаг ахæм галуан. Фыццаг байгом иу фынддæс азы размæ æмæ, цард куыд равдыста, афтæмæй тынг хъæугæ у. Ихыл бырыны спортимæ йæ хъысмæт сбæттын кæй фæнды, уыдон афтæ сбирæ сты æмæ сын уыцы иу комплекс нал фаг кодта.
Ихын комплексы саразын сæхимæ райстой петербургаг специалисттæ инвесторты æххуысæй. Фыццагæй дыккаг рауад цалдæр ахæм стырдæр — æнæхъæн 32 мин квадратон метры. Ис дзы дыууæ ихын фæзы, стыр трибунæ, тренировкæтæ кæнæн залтæ, фысымуат, хæрæндон, медпункт, ахуырты (сборы) чи архайа, уыдонæн сæрмагонд бынæттæ… Иуныхасæй, Цæгат Кавказы ахæм комплекс арæзт æрцыд фыццаг хатт.
Йæ байгом кæныны кадджын мадзалы архайдтой зындгонд уазджытæ: Паддзахадон Думæйы депутат Вячеслав Фетисов, Тюмены горæты сæргълæууæг Руслан Кухарчук, уæрæсейаг фигуристтæ Санаты Елизаветæ æмæ Павел Дрозд, республикæйы разамынд, уазджытæ сыхаг регионтæй…
«Нæ республикæйы бирæ цардуаджы объекттæ кæй рæзы, уый æхсызгон хабар у. Уæлдайдæр, æвзонг курдиæтты рæзтимæ баст чи у, уыдон. Уырны мæ, «Тагбан» кæй суыдзæн ихын спорты стыр курдиæтты артдзæст æмæ, Ирыстоны кад бæрзонд æмвæзадмæ чи сиса, ахæм бирæ зындгонд спортсментæ кæй бацæттæ кæндзæн, – загъта республикæйы Сæргълæууæг Сергей Меняйло.
Вячеслав Фетисов йæ раныхасы феппæлыд Ирыстонæй. Куыд банысан кодта, афтæмæй ихын фæзы руаджы нæ бирæ зындгонд спортсментыл бафтдзæн æмæ кад æмæ ном скæндзысты Ирыстонæн.
Ирон адæмæн, чысылнымæц уæвгæйæ, сæ ном дардыл хъуыстгонд у спорты къабазы. Æрмæст олимпаг чемпионтæ дæр нæм цас ис. Фæлæ нæм ихыл бырыны спорт размæцыд никуы уыд, уымæн æмæ нæм уымæн фадæттæ нæ уыд. Ныр нæ ныфс ис, уыцы спортæй дæр та нæм дунейыл зындгонд адæймæгтæ кæй фæзындзæн.
Нæ уацх.
