Нæ республикæйы кафты аивадмæ уæзгæ бавæрд чи хæссы, уыдонæй сæ иу у Цхинвалы районы культурæйы управленийы адæмон ансамбль “Амонд.” Уый сырæзт 1983 азы æмæ уæдæй фæстæмæ кафты аивадимæ зонгæ кæны канд районы цæрджыты нæ, фæлæ концертон программæимæ æрзилы нæ хъæутыл дæр. Цæвиттон, æрæджы йæ аивадимæ зонгæ кодта Знауыры райцентры æмæ горæт Къуаисайы цæрджыты. Ансамблы коллективыл цæрджытæ æмбæлдысты стыр райгондæй.
Нæ зæрдыл ма хорз лæууы, ивгъуыд æнусы 90-æм азты ансамбль “Амонд” кæд нырма æвзонг уыди, уæддæр уыцы уæззау азты дæр йæхи зонын кодта нæ республикæйы цæрджытæн. Гæнæн уæвгæйæ-иу ралæууыдысты нæ хæствæллад адæмы раз. Архайдтой сæ зæрдæйы равг сын фæхуыздæр кæныныл, царды ныфс сæ бауадзыныл, сæ æнкъард зæрдæтæм сын чысыл хъæлдзæгдзинад бахæссыныл.
Ансамбль “Амонд”-æн йæ репертуары ис ирон кæфтытæ “Симд”, “Хонгæ”, “Тауче”, “Чызджыты кафт”, “Хæххон кафт.” Афтæ ма сæ репертуары ис æндæр адæмты кæфтытæ дæр. “Абхазаг кафт,” “кæсгон кафт,” “азербайджанаг кафт” æмæ æндæртæ дæр.
Ансамбль “Амонд” кæмфæнды куы ратты концерт, уæддæр ыл алы ран æмбæлынц стыр зæрдиагæй. Фæстаг рæстæджы Цæгат Ирыстоны равдыстой аст концерты. «Тынг нæ фæндыд Цæгат Кавказыл дæр æрзилын, фæлæ алцы дæр æхцаимæ баст у æмæ нæ фадæттæ та къуындæг сты. Концерттæ, мах фылдæр радтæм сæрдыгон мæйты æмæ та нæ зæрды ис, уæдмæ Цæгат Ирыстонмæ нæхи бацæттæ кæнын. Уымæн æмæ цыфæнды рæсугъд кафæг куы уай, уæддæр сценæйыл дæ арæхстдзинад куынæ æвдисай, уæд размæ нæ ацæудзынæ. Æнтыст дзы нæ уыдзæн. Сусæггаг нæу, абон бирæ кæй фæкъаддæр ис сценæмæкæсджыты аудитори æмæ сæ хъуамæ цæмæй раздæрау разæнгардæй цæуой нæ концерттæм. Уый тыххæй хъуамæ иумæ сархайой канд культурон уагдæттæ скъолатæ æмæ библиотекæтæ. Программæ саразын. Кæй хъæуы, уый тыххæй арæх дзуры РХИ-йы кулътурæйы министр Зæгъойты Радмилæ æмæ хъæуы йæ фарсмæ æрбалæууын,”- зæгъта Гаглойты Ростик.
Ансамбль “Амонд” уарзон ссис сценæмæкæсджытæн, адæмон сфæлдыстад зынаргъ кæмæн у, уыдонæн. Ууыл дзурæг сты, цы алыгъуызон конкурсты æмæ фестивалты хайад райсынц æмæ йын цы хорзæхтæ раттынц, уыдон дæр.
Уый у адæмон сфæлдыстады дыккаг Æппæтцæдисон æркасты лауреат, 1987 азы советон-индиаг фестивалы Цæцæн æмæ Мæхъæлы республикæты уагъдцæуæг фестивалтæ “Мир Кавказу”-йы лауреат, М.Евдокимовы номыл фестиваль “Земляки”-йы, Цæгат Ирыстоны адæмон кафты цыппæрæм дунеон æмæ Тюмены æппæтуæрæсейон фестивалты лауреат. Ансамбль “Амонд” ма цалдæр хатты фæуæлахиз республикон фестивалты дæр. Йæ коллектив сты æнгом, хæлар. Иууылдæр сæ арæхстдзинад æмæ сæ хъарутæ дæттынц, цæмæй сценæмæкæсджыты размæ хæссой нæ диссаджы адæмон сфæлдыстад.
Районы культурæйы канд адæмон ансамбль «Амонд» нæ архайы, фæлæ ма æндæр сфæлдыстадон коллективтæ дæр. Ахæмтæ сты: адæмон театр, сывæллæтты ансамбль “Малусæг,” вокалон-инструменталон ансамбль “Трио.” Ансамблтæн ахæм æнтыст кæй ис, уый та у районы культурæйы управленийы сæргълæууæг Гаглойты Ростикы æнтыстджын архайды фæстиуæг.
БЕСТАУТЫ Валя
