Аивадыл æнувыд чи вæййы, йæ зæрдæйы арф бынат кæмæн æрцахсы, уый дзы никуыуал фæхицæн вæййы æмæ йын свæййы лæггадгæнæг. Уыцы адæймаг æрмæст йæхиуыл нæ фæхъуыды кæны, фæлæ ма æппæт йæ курдиат æмæ зонындзинæдтæ нæ февгъау кæны, цæмæй дзы хайджын уой æндæртæ дæр. Уыцы кæстæртæ та сомбон равзарой ацы зын, фæлæ арфæйаг фæндаг. Æнцон нæу, аивад чи равзары, уый æрвылбонон архайд æмæ фыдæбон, фæлæ зоны, фæстæдæр æм тæмæнтæкалгæ хурау кæй бахуддзæн цин æмæ амонд.
Ахæм у фæндырдзæгъдæг æмæ аивадыл лæуд кæстæрты хъомылгæнæг Куыдзилты Ноннæйы цардвæндаг дæр. Уый гуыргæ Тбилисы ракодта, фæлæ фæстæдæр йæ ныййарджытæ æрцардысты Цæгат Ирыстоны. Ам уал фыццаг бацыд Дзæуджыхъæуы Ногдзауты галуаны ирон фæндырыл ахуыр кæныны кружокмæ. Зæрдæргъæвд чызг арф айста фæндыры зæлтæ, бахауд сæ уацары, алы зæл дæр ын лæвæрдта æхцондзинад æмæ хъæлдзæг зæрдæйы равг. Йæ ахуыргæнæджы æппæт амындтытæм хъуыста æмæ сæ æххæст дæр кодта æнæзивæгæй. Фæстæдæр та йæ ахуыр адарддæр кодта музыкалон ахуыргæнæндоны. Зæгъæн ис æмæ ам ноджы фергомдæр йæ курдиат, Номдзыд фæндырдзæгъдæг Гæздæнты Булат дзæвгар фæлтæр схъомыл кодта, бирæ кæстæрты бафтыдта ирон фæндыры аив зæлтæ банкъарын æмæ базоныныл. Æвзыгъд чызгæн дæр ацы ахуыргæнæндоны ноджы фæхъæздыгдæр сты йæ курдиаты æвæрæнтæ æмæ ахуыргæнæндон каст фæци æнтысгæйæ.
Алы адæймаг дæр йæ коллективмæ æрбахоны зæрдæргъæвд æмæ куыстуарзаг адæймаджы æмæ ахæм у Ноннæ дæр. Цæгат Ирыстоны Адæмон инструментты паддзахадон оркестры аивадон къухдариуæггæнæг æмæ сæйраг дирижер Гæздæнты Булат фæхуыдта йæ оркестрмæ Куыдзилты чызджы фæндырдзæгъдæгæй æмæ дзы æнтысгæйæ райдыдта кусын.
Фæстæдæр æй йæ амонд æрхаста Хуссар Ирыстонмæ æмæ хæрзбон загъта Цæгаты йæ хорз æмбæлттæ æмæ æмкусджытæн. Æрмæст хæрзбон нæ загъта ирон фæндыр æмæ хъомылгæнæджы куыстæн. Райдианы кусын райдыдта Цхинвалы районы Къостайыхъæуы хæдархайгæ кафджыты къордæн фæндырдзæгъдæгæй. Уыцы иурæстæджы ма фæндырыл цæгъдын амыдта Ногдзауты галуаны æрыгон чызджытæ æмæ лæппутæн дæр. 2005 азæй фæстæмæ та кусы Битеты Павелы номыл №2 музыкалон скъолайы. Ноннæ йæхи нымайы амондджыныл, йæ иугæндзон фыдæбон æмæ куыстæн хорз фæстиуджытæ кæй ис, уымæй. Абон дæр æхсызгонæн æрæмысы йæ раздæры ахуыргæнинæгты æмæ сæ у буц. Зæгъæм, Дудайты Сæрмæт æмæ Плиты Мурат сты Хуссар Ирыстоны зард æмæ кафты паддзахадон ансамбль «Симд»-ы фæндырдзæгъдджытæ. Йæ иннæ æвзыгъд ахуыргæнинаг Къæбысты Сæрмæт та фæндырдзæгъдæг у Президенты цур Дзаттиаты Анисимы номыл лæппуты ирон адæмон зарджыты ансамблæн. Хуыбылты Миланæ йæ дарддæры ахуырæн равзæрста Цæгат Ирыстоны музыкалон ахуыргæнæндон æмæ Тедеты Аленæ та ахуыр кæны Цхинвалы Æлборты Феликсы номыл музыкалон ахуыргæнæндоны.
Ноннæ йæ бирæазон куысты бæстон базыдта æвзонг фæлтæры аивадон гæнæнтæ æмæ курдиат. Кæй зæгъын æй хъæуы, йæ ахуыргæнинæгтæ арæх тыхстысты, сæ музыкалон уацмыстæ æгæр вазыгджын кæй уыдысты, уый тыххæй. Уыдæттæ бахынцгæйæ, сфæнд кодта фæхуымæтæгдæр сæ кæныныл æмæ сæ ахæм хуызы амоныныл. Уымæй дарддæр ма фаг нæ уыд хъæуæг литературæ дæр æмæ æппæт уыдæттæ та къуылымпыйы хос уыдысты ахуыры æнтысгæ куыстæн. Афтæ кæй уыд, уымæ гæсгæ бацæттæ кодта æмæ æрæджы мыхуыры рауагъта чиныг 1-аг æмæ 2-æм кълæстæн. Сты дзы ирон цæгъдтытæ «Симд», «Хонгæ», «Тымбыл кафт», этюдтæ æмæ æндæртæ. Уацмыстæ равæрд æрцыдысты хуымæтæгæй вазыгджынмæ æмæ ахæм хуызы сабитæн сæ ахуыр кæнын уыдзæн бирæ æнцондæр. Ноннæ бузныг у Культурæйы министр Зæгъойты Радæ, йæ хæдивæг Мамиты Гри æмæ Цхинвалы музыкалон ахуыргæнæндоны директор Гæджиты Жаннæйæ сæ иузæрдион æххуысы тыххæй.
Æрæджы ацы чиныгæн уыд презентаци æмæ йын счындæуыд хорз аргъ, банысан кодтой, æнæмæнгхъæуæг кæй у, уый. Чингуытæ уæрст æрцыдысты куыд горæты, афтæ Дзау, Знауыр æмæ Ленингоры музыкалон скъолатыл дæр.
ХУЫБИАТЫ Никъала
