Цыбырты Людвиджы монографи «Ирон Нартиадæ»-йы Дзæуджыхъæуы рауагътой англисаг æвзагыл.  Монографи ратæлмац кæныныл бакуыста филологон зонæдты кандидат, ЦИПУ-йы фæсарæйнаг æвзæгты кафедрæйы доцент, Хуссар Ирыстонæй рацæугæ Карсанты Еленæ.

Монографи у бындурон куыст, кæцы баст у Нарты кадджыты мифологион гуырæнтимæ. Цыбырты Людвиг анализ скæнынæн æмæ абарынæн æрхаста уæрæх мифологион æрмæджытæ, æмæ сæ абарста иуæрдыгæй ирон Нарты эпос æмæ Евразийы адæмты эпосимæ æмæ иннæрдыгæй та ирон Нарты эпос æмæ Кавказы адæмты Нарты эпосимæ. Уый зонадон æгъдауæй сбæлвырд кодта, зæгъгæ, Нарты эпосæн, кæцы уæвынад кæны ныртæккæ цалдæр национ верситы, ис ирон уидæгтæ æмæ йæ алы æмæ алы рæстæджыты сæхицæн айстой æндæр адæмтæ дæр. Карсанты чызг тæлмацыл куыста иу аз æмæ æрдæг.

Йæ ныхæстæм гæсгæ йæ бафæндыд уацмысы жанры хицæНдзинад банысан кæнын, Европæ æмæ Азийы адæмты эпостимæ параллелтæ уадзгæйæ. Автор, кæй зæгъын æй хъæуы, æвдисы эпосты мифологион хъайтарты. Иу номæн гæнæн ис уа цалдæр варианты, фиппайдæуы орфографийы алыгъуызондзинад. Уый ма куыд банысан кодта, АФТæМæЙ Нарты эпосы хъайтарты нæмттæ фыст не ‘рцыдысты англисаг транслитерацийы, фæлæ Абайты Васойы «Ирон æвзаджы историон-этимологион дзырдуаты» куыд фыст сты, афтæ, ома, иронау, фæлæ латиницæйы. Людвиг Алексейы фырты зæрдæмæ ацы идея фæцыд.

Рауагъд уырыссаг-англисаг кæй у, уый хынцгæйæ, Цыбырты Людвиг ориентаци кæны сæйраджыдæр фæсарæйнаг чиныгкæсæгыл – фæсарæйнаг ахуыргæндтыл, кæцытæ архайынц ирзонынады, иранистикæ, кавказзонынады, мифологийы фарстатыл. Уымæ гæсгæ план цæуы рауагъды тиражы иу хай Франц, Англи, АИШ æмæ æндæр бæстæты æмбæлон уæлдæр ахуырадон уагдæттæм арвитын. Сæвзæргæ политикон уавæр зын кæны ацы процессæн, фæлæ сæ ныфс ис, чиныг тагъд рæстæджы кæй ссардзæн йæ адресатты, уымæй. Монографийы экземплярты бæрæг нымæц баххæст кæндзæн Уæрæсейы библиотекæты æмæ, кæй зæъын æй хъæуы, Цæгат æмæ Хуссар Ирыстоны уæлдæр ахуырадон уагдæтты æмæ зонад-иртасæн центрты.

Чиныг цымыдисон уыдзæн чиныгкæсджыты алы категоритæн дæр. Дызæрдыггæнæн нæй англисаг æвзагыл чиныгкæсджытæ стыр æхцондзинад кæй райсдзысты «Ирон Нартиадæ»-йæ æмæ йын аккаг аргъ кæй скæдзысты, ууыл.

Comments are closed, but trackbacks and pingbacks are open.